Read Pochuri Naga KÜMTSAZHÜ 25 Bible Online

KÜMTSAZHÜ 25 - Pochuri Naga bible

KÜMTSAZHÜ 25

¹Hamari nga Hezekiah kajiwa nyiri nüh rhüküsa Solomon Küthsüzhüri.

²Zanyo küüthiküsü tü Saküüwuowa kütholathovü, thitü kajiwa kütholathovü thuoüji zanyo küphahzhu.

³Atülüri nüh kümsie, thi azhih nüh aküsheh üta, kajira luoveh tü mphahra.

⁴Rakasawa vünüh arühsü vijam luo thi mürüküsari tü küfüküjuh kenüh sietsokrü pehveh;

⁵Kajiwa tsatü vü nüh kümsüküsari vijam luo, jüta thuoüji ma kükajipewa tü künyitsa vünüh vishura na küveh kenüh.

⁶Noh mpa nüh noh vi kajiwa shütü wuovü müthse tüm, nyutü aküji azhievü mütsie tüm;

⁷küpakenühnyunü, “Hala shuhru luo,” ta küüza nüh küümpha küsa kenüh kajitsara shütü kükhu vü thsem na küsanü. Noh notha nüh nguküveh wa.

⁸Prelepreza ashihzheh vü siemru tümluo; küpakenühnyunü noh tü asehkhe vü mota sanaveh ünüh, noh zhephruwa nüh küzükrü vü noh vi küthse vü?

⁹Noh shihwa tü noh zhephruwa vü mpa siesaluo, küpara küüzhe müküthsü tüm;

¹⁰noh zhü küünarari nüh küzükrü nohri vü viru üsü nüh, thi noh povükümsü tü asehkhe münyie.

¹¹Azhü küsü kükato küphrara tü rakasa tsorhe vü suna sholo küthse khe wie thuoh.

¹²Akhüna vi aküthsüzhü küüna tü suna tüjükhe nyutü suna süriesüvo kümjie wie thuoh.

¹³Küzhütsanyitsa zhühleküvü küüzewa vü tü kümahwie tsotho vü amüra küüji kümjie wie thuoh, ma nüh ma vüwa sakürherho tsü veh.

¹⁴Aküte vü kuoti nü mükütsüwa thuoüji akülu thi amürhü atsohrümkütsü kümjie wie thuoh.

¹⁵Küüzhikezhikhri vünüh atakrüri tü nyiaza ti, thi amizhi kürünyi vünüh arü zokhuo ra veh.

¹⁶Mükütüküzü noh tü awejuh ngura thuoüji, noh kenüh kütsa kükatosanü tsaluo, noh tü jüma vünüh zhu nü küwuo üsü nüh.

¹⁷Noh zhephruwa zheh vü shiekhinyi noh mpha wa künyike müsa tüm, ma nüh noh no arüthasü nü noh mürhü üsü nüh.

¹⁸Ma zhephruwa vü küzhühjah povü küsa thuoüji, arie thsoshi, nyutü anyu chuwa, nyutü ashüchu kütu küsü kümjie wie thuoh.

¹⁹Küsüro tsotho vü kütsotü küzülawa vü alehküno tü aha kümsü nyutü ampha künyicho khe wie thuoh.

²⁰Luoveh küüzhori vü azah sakütsü thuoüji küüji rülo vü thsünyawa foküja kümjie wie thuoh, thi rhelivijuh vi akhüma lovü küthse üta wie thuoh.

²¹ Mükütüküzü noh mükünongüwa nüh rüma veh üji, alohse vi ma kütsaluo; thi ma nüh kürieh veh üji, ajuh vi ma küzhu luo;

²²küpakenühnyunü anyihie ma lü rügivü küraküthse kümjie wiethuoh küsa kenüh, thi VÜWA nüh noh jisuo satsü naveh.

²³Zhietü mürhü nüh atsohkürü viruruti; thi kürhüsanyote mizhi, rüküshu atso viru veh.

²⁴Azheh rügi jühke vü kürho thuoüji nyimza kürüthuorüshewa sie nü azheh lovü kürho nüh küümpha khe.

²⁵Nyuji kületsuo vünüh zhühthe kümhie küünara thuoüji, kürholi küüriehri vü ajuh küüji kütsü khe wie thuoh.

²⁶Kümsüküsara tü vü künyitsari tsü küüze thuoüji asüpriküüthu juwi nyutü küwuzhu saküümne küsü kümjie wie thuoh.

²⁷Awejuh hozake kütsa tü mümhie, nyuri küsiekezhü küphrate nga jüüta wie thuoh.

²⁸Anyi ma mpa ma müküketewa thuoüji anyuji küsü zokhuoriem nü azie münyie nüh jaküm kümjie wie thuoh.