Read Pochuri Naga KÜMTSAZHÜ 26 Bible Online

KÜMTSAZHÜ 26 - Pochuri Naga bible

KÜMTSAZHÜ 26

¹Tsomzhü vü amüra nyutü mahwie vü atsohkürü üta, zanyomküthsüri kenüh nü küchiekürhe tü jüüta wie thuoh.

²Kakhrü thekütse üta, arhünyie prükütse üta, kümzü tü mazhühnyomshu nüh küturuwa nyu.

³Rawuh kenüh küürhiewuze, sarüliehrawuh kenüh akuli, zanyomküthsüri kenüh akütsüh.

⁴Ma küzhehphro müzhe nü zanyomküthsüwa vü mürüle tümluo, noh nga ma üta sam üsü nüh.

⁵Ma küzhehphro müzhe nü zanyomküthsüwa vü rületsüluo, ma mpa ma notha vü thsüm ta sa üsü nüh.

⁶Zanyomküthsüri vü zhühle küüze thuoüji ma mpa ma jih rehthuo thi küvürie zhu veh.

⁷Zanyomküthsüra po vü küthsüzhü tü ajih kümsü küthuoküveh kümjie wie thuoh.

⁸Zanyomküthsüri vü küchiekürhe kütsü tü awurüh vü aloh huke küsa kümjie wie thuoh.

⁹Zanyomküthsüra po lovü küthsüzhü tü kümshera ke vü arüzhü küsü küwa kümjie wie thuoh.

¹⁰Zanyomküthsü nyutü kümsheri rutseküwa kümsa thuoüji, lawikükari nüh anyiri aveh saküümsamna kümjie wie thuoh.

¹¹ Zanyomküthsüri nüh ma küzhehphro vü küwa le tü, ashuh küsü nüh ma küüwuo vü shele küwa üta wie thuoh.

¹²Noh tü anyi ma mpa ma notha vü ma tü thsü veh ta küsa ngu ülo? Ma nyiehvü nga nüh zanyomküthsüri nüh küluozhe peh veh.

¹³Küliechuwa nüh, “Lehkhuji vü amiewuowa pehveh! Alezari vü amiewuowa pehveh,” ti küza!

¹⁴Amükhie nüh ma tovü vü küüreke kümjie, küliechuwa tü ma ze rügivü küreke tewa veh.

¹⁵Küliechuwa tü ma khu lovü ma ke chohwuwuti; jüma tü ma po lovü vithse le na küsa ma saküthasüsüti.

¹⁶Küliechuwa tü ma mpa ma notha vü nü mtsaveh ta msheveh türükeri nyieh vünüh thsüm.

¹⁷Nyuri küüraluo vü nyi mküjakünya thuoüji ashuh küzhukütse küsü akhüna vünüh shohkütse kümjie wie thuoh.

¹⁸Küzheküzari nüh nyisheju, ashüchu, thi aküsü raja küüze tü,

¹⁹nyi küsü nüh ma zhephruwa müramizhi taji, “Hi nüh jokujozhie küveh wie,” ta küüza kümjie wie.

²⁰Athsoh küzüla kenüh anyih tü netewawa ti; küzhühweri münyie thuoüji küüraluo tü münyie nüh sasati.

²¹Anyihie nüh nyithülo tsoküsa thi athsoh nüh anyih tsolo küju üta, küüraluongüri tü küsaluo tsoküju tsütsüti.

²²Küzhühwera zhü tü ashieküüngu vehküsü kümjie; jüma tü asümo alotsa vü tetututi.

²³Kümsüra luoveh tü azhih küfü anyiehvü thseküürieh mari pomie tü küzhum

²⁴Nyuri kümrhüri tü ma pomie nüh küthiveh thi ma luoveh lovü kürieriekhri mshe peveh.

²⁵Ma nüh lozhisheh nü küza wie ketünga ma mütsotü tümluo, küpakenühnyunü akükre türü ma luoveh lovü tü küveh kenüh.

²⁶Ma kümrhü tü arokümsü nüh küzhute wie nga, müza atüvü ma kümsüküsa tü küngum wie naveh.

²⁷Azhikrie küchüwa thuoüji jüma lovü tsuotsake naveh, thi thawa nüh aloh küpri küze nüh jümawa vü küpri shelewa naveh

²⁸Akürie mizhi tü jüma chakümri mürhürhüti, thi athuoüjih küsawa apo tü küferie kürohrohti.