Read Pochuri Naga KÜMTSAZHÜ 27 Bible Online

KÜMTSAZHÜ 27 - Pochuri Naga bible

KÜMTSAZHÜ 27

¹ Thuotü kenüh mürhiehza tüm, küpakenühnyunü mowa rülo viru naveh ünüh noh tü müküthsü kenüh.

²Küpari nüh noh küüsiakeluo, noh mpa noh po nüh nyu nüh, anyitheri nüh, noh mpa noh pomie nüh nyu nüh.

³Aloh tü küzhom, thi ashünyi tü küzhom, thitü zanyomküthsüri thuoüji jümasü nyiehvü nüh küzhom.

⁴Rükümtho tü kutekurü, rüküshu tü külüwute, thitü noküüma atüvü thawa nüh tsie ra na lo?

⁵Küthi nü kümze na küsanü künyitoh küphra nüh küümpha khe.

⁶Afüri vünüh müsamnam wie ketenga küzhütsanyitsa pehveh; mükünongüra küüme thuoüji shehshe veh

⁷Zhukümri tü awejuh nyakuo, thitü kürümawa thuoüji zanyo kükha küsüküsü nga münge.

⁸Anyi ma zheh vünüh tseteküwawa tü amüwa ma phra vünüh tseteküwawa kümjie wie thuoh.

⁹Vüjuh thi rheküünguju tü aluoveh alowie veh, thitü kürholi tü küsühro nüh zokhrimümti.

¹⁰Noh fü, thi noh pa füri mükule tüm; thi noh lokürü rülo vü noh nü azheh vü müwa tümluo. Noh nü kületsuo vü küpehwa nyiehvü nüh azhephru küshenyiwa nüh kümpha khe.

¹¹Zanyo thsüluo, eh tsa, thi eh luoveh alowie luo, thi hi tü eh küüjo wa vü kürülera saluo.

¹²Kümahtsawa tü kükrü ngu nü ma mpa nüh küthithiti; thitü küjühlowa thuoüji towa nü jüma kenüh münomnanati.

¹³Anyitheri kenüh nyi küsü nüh azhü kütsüwa thsünyawa vi luo, thi alienyira kenüh ma nüh azhühtsüwa vü küshiete vünüh vi luo.

¹⁴Arüne kümto sühra taji; ajikhi zie nü, ma zhephruwa tsiakütsüwa thuoüji kümzü vü chieketsü naveh.

¹⁵Atsokürü rülo vü mükütuo nüh kürütsuo thi kürüthuorüshevühwa masü tü zarike wie,

¹⁶nyimza hama kükhete tü amürhü kükhete wie thuoh nyutü ma ke azhiewuo vü nüh avüjuh küjetena küsa wie thuoh.

¹⁷Amürü nüh amürü küzah veh, thi nyi küsü nüh anyi küpawa küzah veh.

¹⁸Müpahrhu küüjewa thuoüji ma vi tsanaveh, thi ma vüwa kühuotewa thuoüji chierhe naveh.

¹⁹Ajuh vünüh noh nyieh küprüke nü kürüle kümjie, anyira müshe tü anyiri künguveh.

²⁰Küsürazhie thi küsüpe tü aloküraju münyieh, thi alomküraju thuoüji anyira notha.

²¹Anyih tü rakasa kenüh, thi nyitsoku tü suna kenüh, thi anyiri tü ma küsiake nüh kümsümhie reveh.

²²Zanyomküthsüri küsü ashehla lovü thse nü arüne vi atsuo lovü shünyie wie ketenga, ma küzhehphro tü ma vünüh teküwawa nyu.

²³Noh nyihnyihhri mokümjie ünüh kümhie ti thsüluo, thi noh mieshümiesari vü amüshe thse luo;

²⁴küpakenühnyunü künyirhie tü aküsuo müküpeh kenüh; thi kajilüwe tü awuhle aveh vü wa veh ülo?

²⁵Are kreteküwa vü, thi kürüthe shile thuoüji, thi aküzhi vü zhihkhane tü küsazhuh vü,

²⁶nyihzhüzahri nüh nohri thsümnyi tsü naveh, thi anyihsü nüh azhuh ame tsü naveh;

²⁷noh shie kenüh anyihsü tünüjuh tü küwale sanaveh, noh zhehlora shie kenüh, thi noh siepevühri küno kenüh.