Read Pochuri Naga KÜMTSAZHÜ 28 Bible Online

KÜMTSAZHÜ 28 - Pochuri Naga bible

KÜMTSAZHÜ 28

¹Kümsüküsari tü nyi küsü nga nüh zhemtse wie ketenga zhütewawati, thitü künyitsari thuoüji amiewuowa kümjie luovehzem.

²Azhihwa küphrürie vü awuhle hozake pehveh; thitü küthsükümshi thi zanyoküthsü nyiri kenüh thuoüji ma küütokta hothake pehwa naveh.

³Kümkhuori nüh kümkhuowa kümrü vü atsorhü nüh aluoshü müküükhe nüh küsa kümjie wie thuoh.

⁴Khonyo kükulewa thuoüji kümsüküsa siake veh, thitü khonyo kümzheri thuoüji jümari sie saluo veh.

⁵Anyi kümsüri thuoüji kümsho müthsü, thitü Vüwa küphahri thuoüji jüma thsü kheh veh.

⁶Nyirhieri ma lehkhuji mkünyu vü tekütsewa sana küsanü kümkhuowa ma künyitsa vü kütsewa küsanüh kümphakhe.

⁷Khonyo kümzhewa thuoüji atsa aküthsüwa, thitü rüthaküna müwiküji thuoüji ma pa saküzükrüh veh.

⁸Saküüzhi thi azahkütsa vünüh ma künyirhie phakütsewa thuoüji kümkhuowa ma vü külonyi wa kenüh vizhuh veh.

⁹Mükütüküzü nyiküsü nüh khonyo küüna vünüh ma khüna viküreke tewa thuoüji ma kükhuo tü akükre küsü.

¹⁰Kümshori küjo lehkhuji kümsü vü küüze wa thuoüji ma mpa ma shohku lovü tsuotsake naveh; thitü kümtemkünyiewa thuoüji aka kümhie sara naveh.

¹¹Nyirhiewa tü ma mpa ma notha vü azanyothsü, thitü kümkhuo küthsükümshiwa nüh ma thsütewa naveh.

¹²Künyitsari nüh küchara vü, kütholathovü aküji peh; thitü kümsüküsari küsüra vü, anyiri tü mari mpa nüh küthi.

¹³Ma küphrürie küüzhühwu wa thuoüji mütsarhiera, thitü jümari phrazhu thi kükulewa thuoüji külohna ngu naveh.

¹⁴Tsotho aveh vü VÜWA kükrüwa thuoüji kütsiaküvüwa; thitü ma luoveh saküükhowa thuoüji kümsü vü küluke naveh.

¹⁵Amiewuo kütiwa nyutü awie aphelekühuowa tü kümsüküsa takrüri nüh kümkhuori vü küsa kümjie wie thuoh.

¹⁶Takrü küthsükümshi küzülawa thuoüji kükutehkurü kümrüri; thitü mükümsho vünüh akünyia kümrhüwa thuoüji ma rülo saküsuo naveh.

¹⁷Mükütüküzü nyi küsü tü küpara züh kenüh akhuoküzho veh thuoüji, müjie küsü küju nü ma tü jüti küsam luo, nyiküsü nga ma mükükra tümluo.

¹⁸Küzhü vü tsewa thuoüji vizhu naveh, thitü ma lehkhuji kürele kütsewa thuoüji küchuphierake lovü tsuotsake naveh.

¹⁹Ma zhuh kürohkütsewa thuoüji alohse pro naveh, thitü mame mükünyie zhekütsewa thuoüji kümkhuo pro naveh.

²⁰Künyitsazhütsari thuoüji akütsia nüh wuzhi naveh, thitü nyirhie nta pretsaprelo kütsewa thuoüji kümnomna mütsütü külewa nyu.

²¹Kümrhümze küsa tü mümhie, thitü lohse vehküsü vünüh anyiri tü müküleh sam naveh.

²²Kükhokütuori tü preratsarmie künyirhie ase zhetsetseti, thi mükünyie ma vü ru naveh ta küsa müthsü nüh sasati.

²³Nyuri nüh ma küphrawa tü thuotü vü nü küütso küzhitsa ngu naveh, ma mizhi nüh nyuri rienü küsie nyieh vünüh.

²⁴Ma pa nyutü ma zah azhi rühu taji, “Küphrürie münyie,” ta küüzawa thuoüji, küzoriera refüwa wie thuoh.

²⁵Küürükürari tü küsaluo kükezhuzhuti, thitü VÜWA vü alehkünori thuoüji sakünyirhietsü naveh.

²⁶Ma mpa ma müshe lehkünowa thuoüji zanyomkü thsüri, thitü kümahtsa vünüh kütsewa thuoüji vizhutsü naveh.

²⁷Kümkhuori vü kütsüwa thuoüji mükünyie küsawa nyu, thitü ma notha küthikümwa thuoüji kümzü khielota ngu naveh.

²⁸Kümsüküsari süra thuoüji anyiri tü küthithitü, thitü mari pokahm thuoüji, künyitsari tü zhiwawati.