Read Pochuri Naga KÜMTSAZHÜ 29 Bible Online

KÜMTSAZHÜ 29 - Pochuri Naga bible

KÜMTSAZHÜ 29

¹Shiekhinyi phrakekü pehuo tü ma ku khrokem thuoüji, samküümhiera nyiehvü tewa naveh.

²Künyitsari nüh wulekükhra vi küveh vü, anyiri tü nyierakhruokhruoti; thitü kümsüküsari nüh takrü küveh vü anyiri tü lüchi pehpehti.

³Aküthsü külowa thuoüji ma pa sa aloküwie veh, thitü muomuokürho sie kürefüwa thuoüji ma künyirhie saküpoka veh.

⁴Künyitsazhütsa pethuoüji kajiwa tü azhiwa vü küüoküta kürho tsüveh; thitü aküte kükhuori thuoüji jüma ferie veh.

⁵Ma zhephruwa rhüküsawa thuoüji ma mpha kenüh aneh vehjake veh.

⁶Anyi kümsüri tü ma küphrürie vünüh küzazati, thitü künyitsari thuoüji azah sa thi nyierakhruokhruoti.

⁷Künyitsari thuoüji kümkhuori vü kükatori thsü, kümsüküsari thuoüji jükümjie küsa zanyoküthsü müthsü mümshi.

⁸Küriesarienyiri anyuji vü anyizhu thsetsütsüti, thitü zanyoküthsüwa thuoüji rükümtho saküürelemümti.

⁹Mükütüküzü aküthsüri küsü nüh zanyomküthsüri sie ruoluo thuoüji, zanyomküthsüwa mpa nüh riesa thi kükhrikhriti, thi zota müpeh nüh sasati.

¹⁰Azüküüthüngüri tü kümte mükünyieri mürhürhüti, thi kümsüküsari tü ma kürho phaphati.

¹¹Zanyomküthsüri tü ma rüküshu vü akuküpie aveh tsütsüti, ma küjiri aveh tü müsüm naveh

¹²Mükütüküzü atakrüri nüh küzhüjah küna thuoüji, ma küjiri aveh tü müsüm naveh.

¹³Kümkhuori thi kümrüri tü kürü serürüti; VÜWA nüh masükhürü notha vü aküwie tsütsüti.

¹⁴Mükütüküzü kajiri nüh küzarike vünüh kümkhuori alesa thuoüji ma kükajipe tü küsuokürho pehra naveh.

¹⁵Akütsüh thi phraküsosie tü kümahtsa tsüra veh, thitü ma mpa jaküüzewa tsa thuoüji ma zah vü küzükrü viru veh.

¹⁶Kümsüküsari nüh akükhra vi küveh vü küphrürie zhizhiti; thitü künyitsari thuoüji mari küluteküwa no naveh.

¹⁷Noh tsa sosieluo, jüta thuoüji ma nüh noh kümnyie tsü naveh ünüh; ma nüh noh luoveh vü künolo tsü naveh.

¹⁸Setsaküthsüzhü mükünyie vü anyiri tü poka veh, thitü akhonyo küsawa thuoüji akütsia ngu veh.

¹⁹Azhü mpa vünüh nü asiepe tü mü msosiera, ma nüh thsümshi wie nga ma tü kütsakewa nyu.

²⁰Noh tü anyi ma zhü preratsarmie kütse ngunguti ünü nyu lo? Ma nyiehvü nüh zanyomküthsüri vünüh küüluozhe pehveh.

²¹Ma siepe kürünguo vünüh küünyiwa tü, asehkhe vü thuoüji ma wurhuwa sanaveh.

²²Anyi arükümthowa thuoüji küsaluo kükezhu veh, thi anyi arüküshu sa kütsüwa thuoüji küphrürie khielota sashushuti.

²³Anyi kürhiezarhiechiewa tü vükütsuom naveh, thitü sietse vü kürünyiewa thuoüji küchiekürthe ngura naveh.

²⁴Kürühuri siekütsejuwa tü ma mpa ma kürho mürhü veh; ma nüh kümzü künararati, thitü zanyoküsü nga müküpierhuo.

²⁵Anyiri kükrü tü küjurü sakhe salala ti, thitü VÜWA lehkünowa thuoüji toterarati.

²⁶Anyi hozake wie nga atakrüra küütso phahphahti, thitü anyiri tü VÜWA vünüh kümshowa ngurarati.

²⁷Mükümshori tü künyitsari vü akükre küsü, thitü thawa lehkhuji nü müsho veh ünüh kümsüküsari kenüh akükre küsü.