Read Pochuri Naga KÜMTSAZHÜ 3 Bible Online

KÜMTSAZHÜ 3 - Pochuri Naga bible

KÜMTSAZHÜ 3

¹Eh tsa, eh küsosie müküma tümluo, thitü noh luoveh tü eh zhühtsüri vü küüsaluo;

²küpakenühnyunü rülo hothake thi akürho mahviri, thi mari nüh noh vü kümhie küwale vi noh tsü naveh.

³Künyitsasheh thi küzhütsanyitsa tü noh müküükule tümluo; jümari tü noh ku vü huke luo, jümari tü noh luoveh lokhie rügivü rhüke luo.

⁴ Jükenüh noh tü küütso thi küsara kümhie ngu naveh, Saküüwuowa thi anyira notha vü.

⁵Noh luoveh aveh vi VÜWA vü alehnoluo, thi noh mpa nüh noh küthsükümshi aleh müno tümluo.

⁶Noh leh aveh vü ma sieke luo, thi ma nüh noh lekhujiri sakümsho tsü naveh.

⁷ Noh mpa noh notha vü aküthsü müsa tümluo; VÜWA krüluo, thi kümsü vünüh kürele tewaluo.

⁸Jümatü noh satsa vü rozaküümhie küsü sanaveh, thi noh rüri vü saküürherho sanaveh.

⁹Noh künyirhie vi nü VÜWA chierhe luo, thi noh vünüh küshu apokhu viri vi ma chierhe luo;

¹⁰jütathuoüji noh luo tü aküzhi nüh pro naveh, thi noh teri tü akhah nüh vüphuom naveh.

¹¹ Eh tsa, VÜWA küsosie müma tümluo, nyutü ma nüh küphra vünüh müthasü tümluo,

¹²küpakenühnyunü VÜWA tü ma nüh külori phranü sosieveh, apari küsü nüh atsa ma nüh künolowa vü küsa kümjie.

¹³Kümahtsa küphahra anyiwa tü loküzhewa, thi küthsükümshi küngura anyiwa tü loküzhewa,

¹⁴küpakenühnyunü jüma vünüh akünyia thuoüji, rakasa vünüh akünyia nyieh vünüh kümhie kenüh, thi ma zakütsa tü suna nyiehvü nüh mühiem.

¹⁵Nyimzawa tü rakasa nyieh vünüh küüzhi rhe veh, thi noh nüh kümngu zanyo küsü nga nüh, nyimza jüma sie kümjiera münyie luo.

¹⁶Küsuokürho tü ma ke azhie wuovü pehveh; ma ke azhie wuovü thuoüji künyirhie, thi küchiekürhe pehveh.

¹⁷Ma lehri tü loküm alehri, thi ma lekhujiri aveh tü luoveh kürüzih.

¹⁸Ma tü ma küthuoke kütseri vü kürho thsoh küsü; ma küüthuo phohkeri thuoüji loküzheri ta ji.

¹⁹VÜWA nüh kümahtsa vünüh azhihwa sazhu; küthsükümshi vünüh ma nüh atülüri sazhu;

²⁰ma zanyoküthsü vünüh akükuori tü shute ru, thi aküluri tü aküzo kürütsuo küturu.

²¹Eh tsa, küzhütsa kümahtsa thi aküthsü viluo, jümari tü noh notha vünüh mükümrie tümluo,

²²thi jümari tü noh kürholi kenüh akürho sanaveh, thi noh ku kenüh küsiakesheh sa ra naveh.

²³Jüta thuoüji noh tü noh leh vü luovehji nü tsera naveh, thi noh jih tü kümshüwa nyu.

²⁴Mükütüküzü noh nüh tsuo shupeh wienga, noh tü kükrüwa nyu; noh nüh tsuo küzeh vü, noh küzeh tü mhie naveh.

²⁵Zhürüluo ngosetu kenüh mükrü tümluo, nyutü kümsüküsara küferie küru vü mükrü tümluo;

²⁶küpakenühnyunü VÜWA nüh noh rükie na küveh kenüh, thi noh mpha rete na küsa vünüh vite naveh.

²⁷Kümhie kütsülehri vünüh müküjehte tümluo, noh vünüh jüma sana küsa vü.

²⁸Noh tü noh zhephruwa vü, “Waluo, thi ru le luo, thuotü hi nüh jüma tsü naveh ünüh,” ti müküza tümluo, noh vü jüma pehküveh vü.

²⁹Noh zhephruwa vü kümsü mürüzhe tümluo, noh nato vü alehno nü kürhowa vü.

³⁰Zhünyo münyie nüh nyiri vü müküjakünya tüm, ma nüh noh vü küsü nga küsüro müküsa vü.

³¹Küvürie nyiri no nü lomüküra msatüm, thi ma lehri küsü nga mürüka tüm;

³²küpakenühnyunü küreleteküwa nyiri tü, VÜWA vü akükre küsü küsa kenüh, thitü kümshori thuoüji ma küüzhewa.

³³VÜWA kümzü tü kümsüküsara zheh rügivü pehveh, thitü ma nüh künyitsara lojipe tsiatsü veh.

³⁴Ma nüh müküchieküzhüri vü müchiemzhü shehtsü veh, thitü kürünyieri vü thuoüji, ma nüh küütso kütsa veh.

³⁵Aküthsüri nüh küchiekürhe aka vinaveh, thitü müküthsüri thuoüji küzükrü ngu veh.