Read Pochuri Naga KÜMTSAZHÜ 30 Bible Online

KÜMTSAZHÜ 30 - Pochuri Naga bible

KÜMTSAZHÜ 30

¹Masawa Jake atsa Agur azhüri, Anyiwa nüh Ithiel vü; Ithiel thi Ukal vü:

²Azhütsa, hi tü anyi küsü sana küsa zhehphro shehm. Hi tü anyira küthsükümshi münyie luo.

³Hi tü aküthsü müthsüra nüh sam, nyutü hi tü Kümtsewa zanyoküthsü müthsü nüh sam.

⁴Thawa nüh atülüwa vü kuo thi turu lo? Thawa nüh ma müshe lovü nüh amürhü vizhuh lo? Thawa nüh thsünyawa vünüh ajuh tieh lo? Thawa nüh azhih küpoteri aveh vi shu lo? Ma nyo tü thawa lo, thi ma tsa nyo thawa lo? Azhütsa noh nüh thsü veh!

⁵Saküüwuowa zhü aveh tü azhütsa ta kütoh; ma tü ma vü kümnyipe küviri vü ajohuo.

⁶Ma zhüri vü küthsephe müsa tüm, ma nüh noh shüke üji sü nüh, thi noh tü akürie nguji sü nüh.

⁷Zanyo künyi hi nüh noh vü khuo veh, hi müjie küsü tüvü jümasü mükürü tüm.

⁸Küzhüjah thi akürie hi vünüh vikületsuom tüluo; kümkhuo nyutü künyirhie hi mütsü tüm; eh kenüh kütsakütse ashie mpa nüh vi hi tsüluo,

⁹hi tü zhile nüh noh rüm üsü nüh, jüti sanü, “VÜWA tü thawa lo?” ta sa üsü nüh, nyutü hi tü mükhuo taji rühuo üsü nüh, thi eh Saküüwuowa nyo phrakümnem üsü nüh.

¹⁰Siepewa tü ma siepewa vü mürhüsarhüpie tüm, ma nüh noh müzü üsü nüh, thi noh tü Künakhiem üsü nüh.

¹¹Mari pari kümzü pehveh, thi mari zari tsiamkütsü pehveh.

¹²Nyiwuori mari mpa mari notha vü mütsem ta küsa pehveh, thitü mari kümne samkümtse.

¹³Mari mpa nothari tü küzakele zü nüh mshe pehveh, mari nohu tü küzakele nga müsie nüh!

¹⁴Azhih vünüh kümkhuori, anyiri aza vünüh küthotsari shohrietsanta, aha anyuchuwa kümjie, ma hari tü anyuju kümjie pehveh.

¹⁵Arüwi tü atsavüh künyi pehveh; “Tsü luo, tsüluo,” ta masü tü ziezieti. Zanyo küche tü piketü aloküra münyie; amüzüawa tü, “Walethuoh,” ta küsa münyie.

¹⁶Küsürazhie, rüla lehkhuji küm, azhih ajuh müküüriehtsatsa, thi anyi ti nüh, “Walethuoh,” ta piketü müphrahte.

¹⁷Apari müküchie notha, thi azahri azhü mvi nüh kümsamnyiwa tü anyuo vü amwari nüh vitewa naveh thi khujorüri nüh tsam naveh.

¹⁸Azanyo kücheri tü eh kenüh ngoshehm; müzü thuoüji hi tü müthsümümshi:

¹⁹atülü vü aluomü lehkhuji, alokrü vü arehsü lehkhuji, juhküji kümsie vü ajuhie, thi anyira lehkhuji vü rülavüri sie taji.

²⁰Hamatü küüphroküphriehvühwa lehkhuji: ma tü tsanü ma pone kümtse taji, “Hi tü müküleh küsü nga müsa,” ta küzazati.

²¹Zanyo küche kükhu vünüh azhih tü küshühshühti; zanyo müzü kükhu vünüh nü jüma tü müküzhikera.

²²Atükha küsü nüh kaji sateküru vü, thi zanyomküthsüri küsü nüh ashie tsakümwa küm vü;

²³mükülovühri küsü nüh avüpa küngura vü, thi rülavü küsü nüh ma vüvühwa aka viküm vü.

²⁴Azhih vü zanyo müzüri tü zahm, thitü jümari tü thsü sheh:

²⁵Amietsa tü mükükhra nyiri, tü thsehthe vü mari tü ashie küchera veh;

²⁶Amüzhü tü mükümzho nyiri, tü mari tü alokrü vü mari aku phiera veh;

²⁷Ashukrieri tü kaji münyie luo, tü mari aveh nga awule vünüh tsezhuwa veh;

²⁸noh tü asozhi noh kenüh rera naveh, tü jüma tü kajira zheh vü pehveh.

²⁹Zanyo kücheri tü maleri vü küzü nguraveh; müzüri thuoüji mari kükha vü küzü peveh:

³⁰Amiewuowa, asari azhievü kükhratsawa thi küpa küsü atüvü nga nüh asevü müküsühlewa;

³¹Asaküzhe shuh, anyihsü vo, thi kaji küsü nüh ma nyiri atüvü khachuh veh.

³²Mükütüküzü noh tü zanyomthsü nüh sataji noh mpa nüh noh sakümsie, nyutü mükütüküzü noh nüh kümsü müshetse thuoüji, noh ke vi noh po mürhete luo.

³³Tünüjuh kütsü vünüh maküthüri vizhu veh, anyaku küünyi vünüh azüh shu veh, thi arüküshu kütsü vünüh küsaluo vishu veh.