Read Pochuri Naga KÜMTSAZHÜ 31 Bible Online

KÜMTSAZHÜ 31 - Pochuri Naga bible

KÜMTSAZHÜ 31

¹Masa kajiwa Lemuel azhüri, ma zah nüh ma küsosierieri.

²Mowa lo, eh tsa? Mowa lo, eh shiekuo atsa? Mowa lo, eh küphrahzhu atsa?

³Noh kükhra nyimzari vü mütsü tümluo, kajiri küzoriera lehkhuji vü mütsütüm.

⁴Jümatü kajiri kenüh nyu, O Lemuel, jüma tü kajiri kenüh akhah zhu na küsa nyu, nyutü atakrüri kenüh akhah kümüzo kümngu leh nyu;

⁵mari tü zhu nü mowa phrake kümamüsü, thi kümnomna kükato aveh kürelem üsü.

⁶Pokahm na saküvehri vü aküzhu kümüzo tsüluo, thi amüshekümnomnashehri vü akhah tsüluo;

⁷mari tü küüzhu nü mari kümkhuo küümam luo, thi mari lokürü müküümsheke tümluo.

⁸Zhü mkührateri kenüh noh po kaluo, küzoküza nü jaküm awuhleri aveh.

⁹Noh po kaluo, künyitsa vünüh alesaluo, kümkhuori thi küthotsara kükato vünüh notüluo

¹⁰Thawa nüh avüvüh kümhie ngura na lo? ma thuoüji sitheloh nyiehvü nüh rhem.

¹¹Ma vüpa luoveh thuoüji ma vü aleh no, ma thuoüji akünyia küzülawa nyu.

¹²Ma tü ma vü kümhie sasati, thi kümsü müsa, makürho ajü.

¹³Ma tü akünehlo thi thsüküüzhu phahphahti, thi apashe ake nüh vi küroh.

¹⁴Ma tü süküsara juhie kümjie, kületsuo vünüh ashie viruruti.

¹⁵Ma tü atsoküzo vünüh tesürarati, thi ma zhehlori kenüh ashie küchetsütsüti, thi ma siepevühri kenüh küüroh totsütsüti.

¹⁶Ma tü azhehzhuh kenüh müshe nü jümari süsüti, ma ke athsoviri vi nü ma nüh rhelivi shieshieti.

¹⁷Akükhra vi nü ma tü ma küshih tsekeketi, thi ma pie sakükhrakhrati.

¹⁸Ma sü küsa tü azahtsara veh ta ma tü thsüra veh. Arüza vü ma lati tü netemwa.

¹⁹Ma tü ma ke anguh vü küjehkeketi, thi ma ke tü akhierhü küjehke.

²⁰Ma tü ma müza kümkhuori vü satsütsüti, thi ma ke küthotsari vü wajujuti.

²¹Ma tü ma zhehlori kenüh amüra mükrü, küpakenühnyunü ma zhehlori aveh tü athsü müruküchiechie müphie kheh küveh kenüh.

²²Ma tü ma mpa nüh akruzhuri sasati; ma thsümnyi tü mürilo thi küsümo.

²³Ma vüpa tü nyuri nüh akheri vünüh ma thsü, anyu vü kükhruori azavü nyi küpeh vü.

²⁴Ma tü mürilo thsünyawa to nü zhuzhuti; ma tü asüküsari vü ashile zhutsütsüti.

²⁵Akükhra thi küsieke tü ma thsümnyi, thi kürule tsotho vü kenüh ma tü kükhripehpehti.

²⁶Ma tü aküthsü vi ma po kakati, thi külonyi küsosie tü ma mizhi vü peh.

²⁷Ma tü ma zhehlora lehkhuji kümhie ta nonoti, thi ma tü küliechu lohse mütsa.

²⁸Ma tsari tü sühra nü ma tü akütsiaküvüwa ta jijiti; ma vüpa nga ma siakeketi.

²⁹“Krevühri hozake wie nga mhiesheveh, thitü noh tü jümari aveh anyieh vü nüh küümpha khe,” ta küzazati.

³⁰Külajilale tü müramizhi, thi aküzü tü müjuju wie, thitü krevühri vüwa kükrüwa thuoüji küsiake küzü.

³¹Ma ke aviküpe vi ma tsüluo, thi ma küürohri tü akheri vünüh ma küüsiakeluo.