Read Pochuri Naga KÜMTSAZHÜ 5 Bible Online

KÜMTSAZHÜ 5 - Pochuri Naga bible

KÜMTSAZHÜ 5

¹Eh tsa, eh kümahtsazhü vü künaphoke luo, eh küthsükümshi vü noh khüna kümrheti künaluo,

²jütathuoüji noh tü aküthsü ngu naveh, thi noh pomie tü zanyoküthsü huotera mühie veh,

³küpakenühnyunü küüweküsie pomie vü tü awejuh rütsuoküveh kenüh, thi ma zhüküphra tü avüjuh nyiehvü nüh küzhum;

⁴thitü asehkhe vü thuoüji ma tü amürü kümjie kha, anyuchu awuowuo zhieh hakümjie tu.

⁵Ma mpha tü aküsü vü tetsuotsuoti; ma lekha tü küsürazhie lekhuji vü müzhetewawati;

⁶ma tü akürho lekhuji vü amüshemthse; ma lehri tü tsem, thi ma nüh jüma müthsü nüh sam.

⁷Thi khinyi thuoüji, O atsari, eh zhü künaluo, thi eh po lovü azhüri vünüh temwa tümluo.

⁸Noh leh tü ma vünüh küületsuo sam luo, thi ma zheh mükhie vü rhietso müwa tümluo;

⁹noh nüh noh küchiekürhe nyuri vü thama küütsü kenüh, thi noh mahviri vi külohna mükünyieri vü thama küütsü kenüh;

¹⁰anyitheri nüh noh kükhra vi mari saküprom jisü nüh, thi noh küürohri anyiliera zheh vü tewa üsü nüh;

¹¹thi noh kürho sehkhe vü noh tü lüchih, noh sa thi asümo tü müpe nüh sateküwa vü,

¹²thi noh nüh, “Hi tü mokümjie khuoke kümhie küsosie mamthuoh lo, thi eh luoveh tü saküüto rüküzemthuoh lo!

¹³Hi nüh eh küsosiera jikhi müküna nüh samthuoh lo, nyutü eh küsüphieri vü eh khüna mükümrheke nüh samthuoh ülo.

¹⁴Hi tü ferie kümkhe vü peh, ashieji kümhu vü,” ta küza.

¹⁵Noh mpa noh juhku lovü nüh ajuh zhu luo, noh mpa noh juhkhre lovü nüh ajuh lizhu küveh lovü nüh.

¹⁶Noh juwi tü zürie kümza naveh ülo, akuza juh tü lekhujiri vü zürie naveh ülo?

¹⁷Jümari tü noh kenüh mpa nüh küüsaluo, thi noh siekütse anyitheri kenüh nyu nüh.

¹⁸Noh tü akütsiawa saluo, thi noh küviza vüvüh vü nyierakhruo luo,

¹⁹asühnyi külo küsü, nguzuowie aküzü küsü, ma kvnyiwa nüh künolo vi tsotho aveh vü noh küprotsüluo,

²⁰noh tü mokenüh lona lo, eh tsa, nyimza küüphroküphrievüh küsü sie nü, thi küüweküsievühri tüso kheke taji?

²¹küpakenühnyunü nyimpari küsü notha tü VÜWA tüvü pehküveh kenüh, thi ma tü ma lekhuji aveh nokütse kenüh.

²²Kümsüküsara künakhieri nüh ma tietemthuoh, thi ma thuoüji ma kükhiemuo küürohri vünüh küzamthuoh.

²³Khuokekümhie küzüla vünüh ma tü süsüti, thi ma khielota küzhehphro vünüh ma tü kriemthuoh.