Read Pochuri Naga KÜMTSAZHÜ 8 Bible Online

KÜMTSAZHÜ 8 - Pochuri Naga bible

KÜMTSAZHÜ 8

¹ Kümahtsa tü müji ülo, küthsükümshi tü ma jikhi müzie ülo?

²Aleh nato kümsie vü, ma tü lekhujiri vü akütsie sasati;

³natonahuori shütü vü akheriri nato vü, ma nüh akheriküjiri lehpie vünüh zie kümsiesieti:

⁴“Nohri vü, O anyiri, hi nüh ji veh, thi eh küzie thuoüji anyi tsari vü.

⁵O kümshohmlohri, khruokümkürho thsüluo; O, zanyomküthsü nyiri, lieke luo.

⁶Künaluo, küpakenühnyunü hi nüh kütseküju zanyori küza na küveh kenüh, thi mowa nü kato veh ünüh eh pomie vünüh shuru naveh;

⁷eh po nüh küzhütsawa phrahshu na küveh kenüh; eh pomie vü kümsüküsa akükre küsü.

⁸Eh po vü azhüri aveh tü künyitsa; jümari vü zanyo küsü nga küüre nyutü küükhuh münyie luo.

⁹Thawa nüh thsümshira veh ünüh jümari aveh tü müshom, thi zanyoküthsü küphahrari tü katom.

¹⁰Rakasa müthoh vünüh eh küsüphie vi luo, thi kürüka suna nyieh vünüh zanyoküthsü vi luo;

¹¹küpakenühnyunü asitheri nyieh vünüh kümahtsanüh küümphakhe kenüh, thi noh nüh kümngu aveh tü küsü nga jüma ma vü vi mümjiehra.

¹²Hi, kümahtsa tü, azhüküzhü vü nüh rho veh, thi hi tü zanyoküthsü thi kümahtsa phahra veh.

¹³VÜWA kükrü thuoüji kümsü münongü. Kükuoti, kürhieza thi kümsü leh thi küreleküm zhüküphra hi mürhüm.

¹⁴Hi tü kümshe thi kümahtsa kümhiewa peh veh, hi tü küthsükümshikera pehveh, thi akükhra pehveh.

¹⁵Hi vünüh kajiri tü kükaji sa veh, thi mowa nü müsho veh ünüh atakrüri nüh phrazhu veh;

¹⁶hi vünüh kajitsari tü takrü veh, thi zanyoküthsüri tü azhihwa mükhrü veh.

¹⁷Hi tü hi küümzeri lom, thi kükhakükhe taji hi küphahri thuoüji hi ngura veh.

¹⁸Künyirhie thi küchiekürhe tü hi vü pehveh, küpehra künyirhie thi kütsarhie tü hi vü pehveh.

¹⁹Eh vi thuoüji suna nyieh vünüh mhiem, suna akülotsawa nyiehvü nga nüh, thi kürüka rakasa nyiehvü nga nüh eh kütsü nüh küümphakhe.

²⁰Hi tü künyitsa le vü tse veh, kümsho lekhujiri vü,

²¹hi küümzeri vü künyirhie vi tsü, thi mari künyirhie saküprotsü.

²² VÜWA nüh ma küüroh apokhu vünüh hi saküjetsü, khanavü ma küürohküli pokhuwa.

²³Mahvi hozake teküwa vünüh hi tü vizhuthuoh, apokhu vünüh, azhih müjie küsate atüvü nüh.

²⁴Aküshehri mükünyie vü hi vizhu ru, ajuwiri ajuh nüh müküwuzhi vü.

²⁵Aküzhiri müjie küsazhu atüvü nüh, küzhihori atüvü hi tü vizhumthuoh;

²⁶ma nüh azhih thi ma zhuhri müjie küsa tüvü nüh, nyutü azhihnyieh azhitho pokhuwa.

²⁷Ma nüh atülüri küvishuvü, hi tü jüla pehveh, ma nüh aküshehwa nyieh vü kümkieke vü,

²⁸ma nüh arügivü thajüwuri sa sakümzhoküm vü, ma nüh aküshehwa küwuzhuri sashu küm vü,

²⁹ma nüh juhküjiwa vü ma kete sakütsü vü, jüta sanü ajuhri tü ma nüh azhükütsü müküphrürie nüh sana küsa kenüh, ma nüh azhihwa alope tuoküm vü,

³⁰hi nüh ma nato vü peh, küürohra küsosieri küsü kümjie; thi hi tü rülotsotho ma nokülowa sa, tsotho aveh vü ma tüvü nyierakhruo taji,

³¹ma kürhie azhihnyieh vü nyierakhruo taji, thi anyira tsari vü nolo taji.

³²Thi khinyi thuoüji, eh tsari, eh zhü künaluo: eh lehkhuji küsari tü loküzheri.

³³Küsüphie künaluo thi mütsaluo, thi jüma mükule tümluo.

³⁴Aloküzhewa thuoüji thawa nüh eh zhükünaveh ünüh, eh kheriri vü nopeh huo, eh mükhieri nato vü huopeh huo taji,

³⁵küpakenühnyunü hi küphahrari thuoüji akürhowa phahra veh, thi VÜWA vünüh küütso ngura veh;

³⁶thitü hi sazihkümwa thuoüji ma mpa nüh müsamnanati; hi kümrhüri aveh thuoüji aküsü lo veh,” ta zie.