Read Pochuri Naga KÜMTSAZHÜ 9 Bible Online

KÜMTSAZHÜ 9 - Pochuri Naga bible

KÜMTSAZHÜ 9

¹Kümahtsa tü ma zheh sasa veh thuoh, ma nüh ma tovüh türüri khakemthuoh.

²Ma nüh ma sasüri rehthesavehthuoh, ma nüh ma khah wurü savehthuoh, ma nüh ma toküsape nga savehthuoh.

³Ma nüh ma rülavüri nga ji üta küzemthuoh, natonahuori kümsie azhieri vünüh,

⁴“Thawa nüh jühlo veh ünüh, ma tü hala sühle küüturu luo,” ti küza! Thawa nüh ase münyie nüh ma nüh,

⁵“Ra nü eh lohse tsaluo, thi hi nüh akhah wurü küsa zhu luo.

⁶Küjühlo jam luo, thi rholuo, thi kümütsa leh vü tse luo,” ti küza.

⁷Thawa nüh saküümsho riesarienyi veh ünüh ma tü ma mpa nüh saziveh, thi thari nüh kümsüküsari sosiekükatotsü veh nüh kümsamna nguveh.

⁸Küriesarienyieri müsosietümluo, nyuthuoüji ma nüh noh mürhüm naveh ünüh; aküthsüri sosieluo, jüta thuoüji ma nüh noh lo naveh ünüh.

⁹Aküthsüri vü küsüphie tsüluo, jüta thuoüji ma tü thsüwiehü naveh ünüh; künyitsari sosieluo, jüta thuoüji ma tü küthsüra zhihwa wie naveh ünüh.

¹⁰ VÜWA kükrü thuoüji kümahtsa küsatekhuwa, thi kümtsewa zanyoküthsü thuoüji kümahtsa,

¹¹küpakenühnyunü hi vünüh noh rülori tü saküzhitsü na küveh kenüh, thi amahviri tü noh kürho vü thsephetsü naveh.

¹²Mükütüküzü noh nüh thsüveh thuoüji noh mpa noh kenüh thsükeveh wie; mükütüküzü noh nüh riesarienyi veh üji jüma tü noh mpa nüh vü naveh.

¹³Zanyomüküthsüvühwa thuoüji kajakaram; ma tü küweküsiemü thi küzükrü müthsü.

¹⁴Ma thuoüji ma zheh mükhie vü shupehpehti, ma tü natonahuori kümsie azhieri vü ape vi nü pehpehti,

¹⁵kükashukariri ji taji nü, mari aleh vü külesho kuoküwari,

¹⁶“Thawa nüh jühlo tseveh ünüh ma tü sühle halovü küüturu luo,” ta jijiti! thi ase müküthsüri vü ma nüh,

¹⁷“Kürühura ajuh tü müngem, thi küüzhe vünüh alohse kütsa tü lom,” ta küzazati.

¹⁸Thitü nyimpawa tü aküsüri jüla pehveh ta küsa müthsü, nyimzawa küzehri tü küsürazhie aküsheh vü.