Read Pochuri Naga KÜSOSIEZHÜ 1 Bible Online

KÜSOSIEZHÜ 1 - Pochuri Naga bible

KÜSOSIEZHÜ 1

¹Hi, Küsosiewa azhüri, David atsa, Jerusalem kajiwa. Momaküsa tü momasa ta Küsosiewa nüh küza,

²momasa tü momasa! Aveh nga momasa kheh wie.

³Anyiri tü arünyi kükhu vünüh küüroh küsa ma küürohri vünüh mowa nyie lo?

⁴Awuhle küsü tewa veh, thi wuhle küsü shele ru veh, thitü azhih thuoüji küsuokürho zarike peh wie veh.

⁵Arünyi tü shuru nü tetu le veh, thi ma küshupe vü pretewa le veh.

⁶Amürhü tü zhiese vü mürhü tewa veh, thi zhietü wuovü küzüle tewa veh; amürhü tü küzülezüza wa veh, thi amürhü tü mükiele nü shele teru veh.

⁷Akuza aveh juhküji vü li tuveh, thitü juhküjiwa tü müpro; akuzari nüh liküveh azhie vü, jümari tü jüla li le wie veh.

⁸Zanyo aveh vü wie nga kümno nüh pro; anyiri nüh jüma tü müphratekhera nüh sam; jüma tü anotha nüh no nü alomükütukhera sam, nyutü akhüna nüh küna nü müpro nüh sam.

⁹Mowa satse veh ünüh jüma tü sa wie naveh, thi mowa sanaveh ünüh jüma tü satse veh; thi arünyi kükhu vü zanyoküsü nga kürüthe münyieluo.

¹⁰“Noluo, hama nü rüthe veh,” ta küüza zanyo wuori pehveh ülo? Jümari tü khanavü nüh hiri atüvü nüh pehtetse wiethuoh.

¹¹Atükhu vü azanyori tü kümshekera münyie luo, nyutü azanyo asevü sana küsari kümshekera münyie luo.

¹²Hi, Küsosiewa tü Jerusalem vü Israel nyiehvü kajiwa sa ru.

¹³Hi nüh eh kümshe thse nü aküthsü vünüh atülü kükhu vü saküsari aveh no thi phah; anyi tsari nüh vi taji pre peh üta Saküüwuowa[1] nüh tsüküsa hamatü lomküzhe küsü.

¹⁴Arünyi kükhu vü zanyo aveh sa kheh küsa hi nüh nguthuoh; thinü halie, aveh nga momasa thi amürhü sevü akükhra thsekütse wie.

¹⁵Mowa kükhuhmthuoh ünüh samkümsho le rathuoh, thi mowa müju nüh samthuoh ünüh mükürüh le rathuoh.

¹⁶Hi nüh hi mpa, “Hi tü aküthsü aküji vimthuoh, eh tüvü Jerusalem nyiehvü küpeh aveh nyiehvü nüh küpasheh ra; thi eh müshe tü aküthsü thi zanyoküthsü küsheke pehmthuoh,” ti küza.

¹⁷Jütisanü hi nüh eh müshe tü aküthsü thsü nti thi aküzhe thi küzhehphro thsü nti akükhra thse. Ah, hanga hi nüh thsüthuoh thitü amürhü sevü akükhra thse kütsewie.

¹⁸Küpakenühnyunü aküthsü hozake küpeh vü aluoveh küüraküpre nga zhiküm kenüh, zanyoküthsü saküüzhiwa thuoüji luovehküna saküzhi veh.