Read Pochuri Naga KÜSOSIEZHÜ 10 Bible Online

KÜSOSIEZHÜ 10 - Pochuri Naga bible

KÜSOSIEZHÜ 10

¹Aküsü wiezüri nüh arheküüngu avüju zheja veh; jükümjie zanyo mküthsü pike nüh aküthsü thi küchiekürhe kütezhuja veh.

²Zanyoküthsüra luoveh thuoüji azhie wuovü puoke veh, thitü zanyo mküthsüra luoveh thuoüji azhu wuovü puoke.

³Zanyo mküthsüri tü lehkhuji tsetse wie nga, anyiri aveh vü ma tü zanyo mküthsüri ta küza tse veh.

⁴Mükütüküzü atakrüri nüh noh vü arüshu ketünga, noh pe müja tümluo, küpakenühnyunü luoveh küsou vünüh mküleküsari sakükatorana küveh kenüh.

⁵Arünyi kükhu vü kümsü küsü hi nüh ngu, jüma tü atakrüwa vünüh küsazih küüze küsü kümjie:

⁶küzhehphro thuoüji azhie kümsie hozake vü sakesa khe veh, thi nyirhieri tü azhie kürünyie vü sakesa veh.

⁷Hi nüh arawuhri rügivü atükhari ngu, thi kajitsari tü atükhari kümjie ajih vünüh tseküveh hi nüh ngu.

⁸ Thawa nüh ashoku chüh naveh ünüh ma thuoüji jüma lovü küluke naveh; thi azie küfephiewa thuoüji aresü nüh ma shü naveh.

⁹Aloh küjiri thuoüji jümari nüh ma sake naveh; thi athsoku küüprori thuoüji jümari vünüh küüzüh pehveh.

¹⁰Mükütüküzü nyi küsü nüh amüvü küsü thi müküzah nüh mütu nüh sam thuoüji, ma tü akükhra müthse hü ji mümhiethuoh; thitü aküthsü thuoüji küsara küüsa nta kükratsü veh.

¹¹Mükütüküzü aresü tü ma müjie külajilale vünüh mko thuoüji, külajilalewa nyiehvü küsara münyiethuoh.

¹²Aküthsüra po vü azhü thuoüji küütso küsara veh, thitü zanyomküthsüra pomie thuoüji ma müzhu veh.

¹³Ma po vü azhü apokhuri thuoüji zanyomthsü, thi ma nüh küphrahte asehkhe vü thuoüji kümsüküsa aküzhe.

¹⁴Zanyo mküthsüri thuoüji azhü saküzhizhiti, mowa sanaveh ünüh nyi küsü nga müthsü wie ketünga, thi thawa nüh ma sewa ta küsa thsüra na lo?

¹⁵Zanyo mküthsüra küüroh tü ma saküm nonoti, jütaküsa vünüh ma tü anyujiwa aleh müthsü nüh sasati.

¹⁶Noh amngu kümsüwa, O azhihwa, noh kajiwa tü atsa küsü saküveh vü, thi noh kajitsari nüh arüne vü tsazhu küveh vü!

¹⁷Loküzhe tü noh, O azhiwa, noh kajitsari tü kürüzihri saküm vü, thi noh kajitsari tü atsotho vü khem ta tsazhu küveh vü, akükhra kenüh wie, kümshe kenüh nyu!

¹⁸Küüchu vünüh aluomuo tü krühke tewawati, thi küthachu vünüh azheh tü turu veh.

¹⁹Küükhrira kenüh alohse tü sa, thi akhah nüh akürho tü alosaküwie veh, thi ame tü azanyo aveh rületsü veh.

²⁰Noh kümshe lovü nga nüh kajiwa mümzü tüm, nyutü noh zeku vünüh nyirhieri mümzü tüm, küpakenühnyunü amürhü vü amüwa nüh noh jikhiwa vü tewa na küveh kenüh, nyutü saküsa aküsa küpe wuori nüh akerowa küza üsü nüh.