Read Pochuri Naga KÜSOSIEZHÜ 12 Bible Online

KÜSOSIEZHÜ 12 - Pochuri Naga bible

KÜSOSIEZHÜ 12

¹Noh kürüla küviza rülori vü noh Saküüjewa nga müsheke luo, kümsü rülori müjie küru vü, thi amahviri müjie shenyiteküru vü, jütaküsa vü noh nüh, “Hi tü jümari vü loküzhe münyie,” ta küza naveh;

²arünyi, aküwie, asa thi awutsiri müjie küzo atüvü thi aküluri nüh atsorüküm sevü müjie sheleküru vünüh;

³azheh kühuori nüh khekheta küüshüh rülo vü, thi anyi kümzhori müjie kükhote küwa vü, thi küürenyahri nüh mari tü zülale ta sanü küle vü, thi mürhülepie vü künori tü küüphrüh vü,

⁴thi alewa vü amükhieri kheküm vü; kürenyaküveh jikhi saji teküwa vü, thi nyi küsü nüh amüwa jikhi vünüh kükhu vü, thi atsa nyimzara zah aveh tü asaji vü vituru küm vü;

⁵mari tü mowa nü rügi veh ünüh jümari nga krü, thi kümzhohri nga aleh vü peh; akha rhu tü wuvehthuoh, ashukrie tü ma mpa nüh zhutse thi küsangüwa zülamümti; küpakenühnyunü anyiri tü ma awura zheh vü tewa veh, thi küüsori tü lekhujiri vü tsemükiele veh;

⁶rakasa külarüwa kürhekhuo tüvü, nyutü suna füjiwa küzokhuo tüvü, nyutü asüzahwa tü ajuhkhre vünüh küzokhuo tüvü, nyutü satürüawa tü ajehku vünüh küzokhuo atüvü,

⁷azhithowa tü atükhu vü küpeh üta azhihwa vü teküru tüvü, thi asietse tü Saküüwuowa, jüma kütsüwa vü sheleküru tüvü.

⁸Momaküsari nyie nüh momaküsa, ta Küsosiewa nüh küza; aveh nga momasa.

⁹Thsükümü nyiehvü nüh Küsosiewa nüh zanyoküthsü nga vi anyiri sosie, azhüzhüshe nü küthsüzhüri küte, thi saküüjike sa.

¹⁰Küsosiewa nüh akülo zhüri phah, thi ma nüh luovehmsho nü küzhütsa zhüri rhü.

¹¹Aküthsüwa nüh küüzari tü awuze küju kümjie, thi Nyihzhükühuowa nüh vizhu taji küsosiezhüri tü zephohke küsa kümjie.

¹²Eh tsa, zanyo hamari nyiehvü nüh thuoüji azhüzhüluo. Lasipha hozake sana küsa ma küpote münyie luo, thi hozake küchie tü asazüh kenüh küthasü.

¹³Akero küpote tü aveh künaramthuoh. Saküüwuowa krü luo, thi ma nüh azhükütsüri vi luo; küpakenühnyunü hamatü anyira küüroh ajüwa küsa kenüh,

¹⁴küpakenühnyunü Saküüwuowa nüh küüroh aveh ashih vü viru na küveh kenüh, küüzhe aveh, ma mpa nüh mhieluo nyutü müsüluo.