Read Pochuri Naga KÜSOSIEZHÜ 2 Bible Online

KÜSOSIEZHÜ 2 - Pochuri Naga bible

KÜSOSIEZHÜ 2

¹Hi nüh hi mpa, “Khinyi raluo, aloküra sa mütenono ünüh; noh mpa alosaküraluo,” ti küza. Thitü halie, hama nga momasa wie.

²Hi nüh küükhri tü “Jümatü aküzhe lo,” ti sa, “thi aloküra tü, jüti mowa sana lo?” ti sa.

³Anyira tsari mari rülo pike kürho vü atülü kükhu vü mowa nü mühie veh ünüh sanü no na küsa kenüh hi nüh akhah vi taji eh satsa mokümjie lorara naveh nüh ünüh ti eh müshe vi nü phah, eh müshe tü aküthsü vi nü hi küjotse wie, thi hi nüh küzhehphro nga sa.

⁴ Hi nüh küüroh aküji sa; hi nü eh kenüh azheh sa, thi rhelivi shie;

⁵hi nüh hi mpa nüh aphahri thi kümnyieperi sa, thi jümari vü athsovi rhu küpapa shie.

⁶Areza vü athsoh sho küvehiri ajuh zü na küsa kenüh hi mpa nüh ajuhkhre sa.

⁷ Hi nüh tükhapa thi tükhavühri sü, thi eh zheh vünüh küwuo tükhari peh; eh tüvü nüh Jerusalem vü pehteküruri nyiehvü nüh hi tü mieshümiesa thi anyihnyih khielota peh.

⁸Hi tü hi mpa eh kenüh rakasa thi suna thi kajiri thi azhi vü rhoküvehri kenüh vizhuh; hi tü nyimpa thi nyimza azah küsari, thi müsüvüh anyiri nüh nokülori peh.

⁹ Jüti sanü hi tü eh tüvü nüh Jerusalem vü küpehri aveh nyiehvü nüh ji thi mpha ra; eh küthsü nga hi vü peh huora.

¹⁰Thi eh notha nüh mowa sangü nüh hi tü jüma mükhe; alokülora küsü vü nga nüh eh luoveh mükhete, küpakenühnyunü eh luoveh tü eh küüroh aveh vü aloküra kenüh, thi hama tü eh küüroh aveh kenüh eh jisuo küsa kenüh.

¹¹Jüti küsa vü hi tü eh ke nüh küüroh küsa aveh müsheno, thinü halie, aveh nga müjuju thi amürhü asevü akükhra thsekütse wie, thi arünyi kükhu vü zanyoküsü nga akünyia münyieluo wie.

¹²Jükenüh hi nüh aküthsü, aküzhe thi küzhehphro müshenono; küpakenühnyunü kajiwa sevü küru anyiwa tü mowa sara na lo? Ma nüh mowa saküzemthuoh ünüh jü mpa wie nga nüh.

¹³Thinü aküwie nüh aküzo nyieh vünüh küchara üta aküthsü küzhehphro nyieh vünüh khrara veh.

¹⁴Anyi zanyoküthsüwa notha tü alü vü peh veh, thitü küzhewa thuoüji aküzo vü tsetseti; tü aküsü küsü mari aveh vü ruveh ta küsa hi nüh thsüra veh.

¹⁵Jüti küsa vü hi nüh hi mpa, “Zanyo mküthsüri vü mowa ru veh ünüh hi vü nga ru wie naveh; thinü jütathuoüji hi tü mokenüh zanyothsü sheh na lo?” ta sa. Thi hi nüh hi mpa hama nga momaküsawie ti küza.

¹⁶Kükennyunü zanyomküthsüri kümjie zanyoküthsüri tü müsheke küpeh münyie luo; ru na saküvehri wie nga kümam wie na küsa ngu küveh kenüh. Zanyoküthsüri mokümjie süveh ünüh jükümjie zanyomküthsüri nga sü wie naveh.

¹⁷Jükenüh hi tü akürho mürhüm, küpakenühnyunü arünyi kükhu vü mowa sasa veh ünüh jüma nüh hi saküshüthuoke; küpakenühnyunü aveh nga momasa thi amürhü sevü zhekütse wie kenüh.

¹⁸Hi tü hi nüh arünyi kükhu vü küroh küsa aveh mürhüm; eh sevü nüh ru na küsa anyiri vü samümji mükümhie kenüh;

¹⁹ma tü aküthsüri ünü zanyomküthsüri nüh thawa nüh thsü veh lo? Tü hi nüh küroh küsa aveh nyiehvü avü thi arünyi kükhu vü eh kümahtsa vi naveh. Thitü hama wie nga momasa wie.

²⁰Jükenüh hi nüh sühle taji arünyi kükhu vü küüroh hi nüh saküsa aveh vü eh luoveh vi akükrie vü thse,

²¹küpakenühnyunü küsüsükeri nü nyi küsü nüh kümahtsa, zanyoküthsü thi zanyoküsathsü vi taji küroh sa wie ketünga thawa nüh jüma müküroh ünüh jüma nüh aloküüzhe nta aveh samtütüti. Thi hama nga momasa wie thi kümsü küji küsü.

²²Nyi küsü nüh arünyi kükhu vü küroh nü ma küüroh thi ma satsa küshohrie aveh vünüh mowa ngura veh lo?

²³küpakenühnyunü ma rülo aveh vü aküna nüh pro, thi ma küüroh tü küpoka küsü sam; arüza vü nga ma müshe tü kümnyie münyie nüh sam. Hama nga momasa wie hü.

²⁴ Anyiri kenüh thuoüji tsa thi zhu ti sanü ma küüroh vü lozhe taji kütse nyiehvü münyie luo. Hama nga Saküüwuowa ke vünüh ti küsa hi nüh ngu;

²⁵küpakenühnyunü ma vünüh mükünyu nü thawa nüh tsa ra na lo nyutü thawa nüh lozhera na lo?

²⁶ Saküüwuowa saküülozhe anyiwa vü tü ma nüh kümahtsa, zanyoküthsü thi aloküzhe tsü veh; thitü kükhiemuori vü thuoüji ma nüh küsezhuh thi kümproke küüroh tsü veh, thawa nüh Saküüwuowa sakülozhe veh ünüh jümawa vü mpa tsü naveh. Hama nga momasa thi amürhü sevü akükhra thsekütse wie.