Read Pochuri Naga KÜSOSIEZHÜ 4 Bible Online

KÜSOSIEZHÜ 4 - Pochuri Naga bible

KÜSOSIEZHÜ 4

¹Jüsevü nga arünyi kükhu vü kümrü aveh saküveh hi nüh ngu. Thinü halie, mürükümra rüthsü tü nyi küsü nga nüh mari luoveh saküürüzi münyie nüh sam. Mari kümrüra nato vü kümzho pehm, thi nyi küsü nga nüh mari luoveh saküürüzi münyie nüh sam.

²Eh kümshe vü sükümri tü rhoküvehri anyiehvü nüh münga veh ti müshe veh;

³thitü müjie küwuowa nüh jümasü nyieh vünüh mpha veh, thi arünyi kükhu vü saküsa kümsü küürohri müjie küngu kenüh.

⁴Thinü küüroh aveh thi aküzhü vünüh küsa aveh tü anyira zhephru küümaküshi vünüh ru veh ta küsa hi nüh ngu. Hama nga momasa thi amürhü sevü kükhra thsekütse wie.

⁵Zanyo mküthsüri tü ma ke shekhoke nü ma mpa ma sa tsatsati.

⁶Ake künyi khürü küüroh pro nü amürhü sevü akükhra thsekütse thuoüji ake küsü mpa pro nü zota küpeh nüh kümphakhe.

⁷Jüsevü nga, arünyi kükhu vü moma küsa hi nüh ngu:

⁸nyiküsü nga mükünyie ma mpa tsatsa küsa, atsa nga nyutü ajienü nga mükünyie, thitü ma küüroh aveh vünüh ma pote mükünyie, thi künyirhie vünüh ma notha tü aloküra mükünyie, jükenüh matü, “Tha kenüh hitü küroh veh thi hi mpa nüh aloküra khete veh lo”? ta müküna rhuo. Hama nga momasa thi alomküzhe küürohküli küsü.

⁹Künyi tü küsü nyiehvü nüh küümphakhe, küpakenühnyunü masü küüroh kenüh masü tü ajisuo kümhie pehküveh kenüh.

¹⁰Mükütüküzü masü külu wie ketünga nyi küsü nüh ma füwa sike na küveh kenüh; thitü nyi küsü mpa kütsewa tü ma nüh küülu vü nyi küsü nga nüh ma küsike mükünyieh kenüh kümsüwa waluo.

¹¹Jüsevü nga, nyi künyi kürü küzeh thuoüji masü tü zhem, thitü nyi küsü mpa tü mokümjie zhe na lo?

¹²Nyi küsü nüh nyi küsü mpa küsawa cha mhie veh, thitü nyi künyi thuoüji ma tsietem naveh. Ali küche kümlarü tü shita müzothuo.

¹³Küthotsa vizawa kümahtsa küpewa thuoüji küshike müküvira zanyo mküthsü kajiri kükhruo küsü nyiehvü nüh mpha veh,

¹⁴ma mpa nüh küsizheh vünüh kükajipe vü tu wie nga nyutü ma mpa ma kajipe vünüh mükhuo nü wuo wie nga.

¹⁵Rho nü arünyi kükhu vü küngah mükiele küveh aveh hi nüh ngu, ma müthoh vü tsie na küsa viza jümawa nga;

¹⁶anyiri aveh ma küpote münyieh vüh sa; ma tü jümari aveh anyiehwa sa. Tü asevü nüh küruri thuoüji ma vü nyierakükhruowa nyu. Hama nga momasa thi amürhü sevü akükhra thsekütse wie.