Read Pochuri Naga KÜSOSIEZHÜ 5 Bible Online

KÜSOSIEZHÜ 5 - Pochuri Naga bible

KÜSOSIEZHÜ 5

¹Noh tü Saküüwuowa zheh vü küwa vü noh lekha azhüzhüluo; shenyi ru nü küüna tü zanyomküthsüri küsahthuo kütsü nyieh vünüh mpha veh; küpakenühnyunü mari tü kümsü sa veh ta küsa müküthsü kenüh.

²Noh po vi nü müpreratsaramie tüm, nyutü Saküüwuowa tüvü noh luoveh tü azhü phrahzhu nti müprelepreza tümluo, küpakenühnyunü Saküüwuowa tü atülü vü pehküveh kenüh, thi noh thuoüji azhih vü pehküveh kenüh; jükenüh noh zhü tü küüzüla luo.

³Küpakenühnyunü amoh tü küüroh khielota vünüh ruruti, thi zanyomküthsüwa jikhi azhü hozake vünüh ruruti.

⁴Noh nüh Saküüwuowa vü küphrahzhu küsü phrahzhu thuoüji jüma sakütsü müküzhike tümluo; küpakenühnyunü ma nü zanyo mküthsüri vü aloküzhe mükünyie kenüh. Noh nüh mowa phrahzhu nüh jüma satsüm luo.

⁵Noh nüh phrahzhu nü jüma samkütsüwa thuoüji müküphrahzhuwa nüh küümpha khe.

⁶Noh po tü noh sie nü kükhiemuo vü müküwa tüm, thi jüma tü küsazih küsü ti zhüleküvüwa tüvü müküza tüm; mokenüh Saküüwuowa tü noh jikhi vü arüküüshu na lo, thi noh ke nüh küüroh küüzorie na lo?

⁷küpakenühnyunü amoh küzhi vü azhüju küzhiküzhi tewawati.

⁸Mükütüküzü zhieküsü vü kümkhuori mürü, kümsho thi awulehwa vürie nü vijam ketünga akero jüma kenüh müngotüm; küpakenühnyunü kürügi vü küjiwa nüh arügi vünüh note küveh kenüh, thi jüma nyieh vü nga mari anyieh vü kürügiwa pehü veh.

⁹Thitü aveh vü wie nga kajiwa nüh azhuh satsaküsa azhih aveh nga khewie.

¹⁰Ame külori tü ame vünüh walethuoh ta küsa münyie; nyutü künyirhie külori tü jüma künyiera vünüh walethuoh ta küsa münyie luo, hama nga momasa wie hü.

¹¹Azanyori zhiküru vü jüma kütsari nga zhiteru veh; jümari vüwa tü anotha nüh jümari küngu küchie nüh mowa künyie pehveh lo?

¹²Küürori tü tsa zülaluo nyutü tsazhiluo zehrarati; thitü nyirhie küwalewa thuoüji müzehkera.

¹³Rünyi kükhu vü kümsü küsü küpeh hi nüh ngu: jüma thuoüji künyirhie tü ma vüri nüh sataji mari mpa mari saküümnomna wie,

¹⁴thi künyirhie jümari tü lekhuji kümsü vünüh kümiem; thi ma tü atsa küsü apa, thitü ma tü ma kevü zanyo küsü nga münyie luo.

¹⁵Ma tü ma zah vo lovü nüh küshuru üta ma tü tewa le naveh, anyiju ma tü ru, ma küüroh kenüh zanyo küsü nga küviwa nyu, ma ke vünüh vi küwara zanyo küsü nga küviwa nyu.

¹⁶Hama nga asheküsü kümsü küsü: ma nüh mokümjie vünüh ru nüh jüüta vünüh ma tü tewa wienaveh; thi ma tü amürhü kenüh küroh nü mowa nyie veh lo,

¹⁷aküzo thi msheküsü vünüh ma rülo aveh küzem taji, küsaküna thi rükümtho hozake vünüh peh.

¹⁸Halie, kümhie thi kükato thuoüji, Saküüwuowa nüh ma kürho kenüh arünyi kükhu vünüh rülo pike vi ma tsü nü ma nüh küroh küsa küüroh aveh vünüh tsa thi zhu ti sataji aloküzhe nguküveh hi nüh ngu, küpakenühnyunü hamatü ma jisuo küsa kenüh.

¹⁹Nyi küsüküsü nga Saküüwuowa nüh künyirhie thi asuopekütsü thi akükhra vi lozhe üta tsümthuoh, ma suopesakütsüwa vike nü ma küüroh vünüh külozhe ngu na küsa kenüh, hamatü Saküüwuowa nüh küte.

²⁰Thi ma tü ma kürho rülori hozake kümsheke müsa ra, küpakenühnyunü Saküüwuowa nüh aloküzhe vi ma luoveh lovü kümkate kümthuoh kenü