Read Pochuri Naga KÜSOSIEZHÜ 6 Bible Online

KÜSOSIEZHÜ 6 - Pochuri Naga bible

KÜSOSIEZHÜ 6

¹Arünyi kükhu vü kümsü küsü peh küveh hi nüh ngu, thi jüma tü anyiri rügivü küzhosheh veh.

²Saküüwuowa nüh künyirhie, azhezhuh, thi küchiekürhe tsü veh, jüti sanü ma kümngu vünüh zanyoküsü nga müküzüla nüh sa naküsa kenüh, tü jümari vi nü aloküzhe naküsa kenüh Saküüwuowa nüh kümzho vi ma mütsü; thitü anyitheri nüh jümari vi aloküzhe sa; hamatü momasa; jüma tü müshekümnomna aküna küsü wie.

³Mükütüküzü nyi küsü nüh atsa müzake ngura, thi mahvi hothake rho, jüti sanü ma mahvi rülori tü hozake sa, thitü ma nüh akürho tü zanyo kümhie vi aloküzhe müsanüh sam, thi jüsevü nga ma küchohwu nga kümhie ta vünüh müküche nüh sam, jüta thuoüji hi nüh küza na nü ma thuoüji aküwuo tsotho müjie küju vünüh müküwuowa nüh küümpha khe.

⁴Küpakenühnyunü jüma tü momasanüh sam thi aküzo vü teküwa kenüh, thi aküzo vünüh ma nyowa tü küzhute kümthuoh kenüh;

⁵jüma nyiehvü nga jüma tü arünyi müngu nyutü zanyoküsü nga müthsü; tü jüma tü ma nyiehvü nüh kümnyie ngu veh.

⁶Ma mpa nüh mahvi anyie küsü küphrahte künyikeri rho nta wie ketünga kümhie küsü nga vi alomzhe, jümari aveh nga azhie küsü vü wa müveh ülo?

⁷Anyira küüroh aveh tü ma po kenüh wie, tü ma pokümhie tü alosamküraju wie,

⁸küpakenühnyunü aküthsüwa tü müküthsüwa nyieh vü küsara pehveh lo? Thi kümkhuowa tü rhoküvehri atüvü ma mpa nüh mokümjie rhotsü naveh ünüh ta sanü thsükütsewa nyiehvü mowa pehveh lo?

⁹Sangü nü tsekütsewa nyiehvü nüh anotha nüh nguküvehwa nüh küümpha khe; hama nga momasa thi amürhü sevü akükhra thsekütsewie.

¹⁰Momowa ru nta küsari rumthuoh ünüh, jümari tü thohmthuoh, thi anyiri nü mowa nüh jüma nüh thsümthuoh, thi ma tü ma nyiehvü akükhrawa sie müküjakünyara.

¹¹Azhü küzhi vü, momaküsa tü küzhiküzhi wie, thinü anyiri tü mowa vü mpha veh lo?

¹²küpakenühnyunü nyi küsü nüh ma rho küveh vü ma kürho momaküsa rülo pikeri vi rho küveh vü thawa nüh anyiri kenüh kümhie mowa thsü veh lo, ma tü arüzhe küsü kümjie kari tewa küveh kenüh? Küpakenühnyunü arünyi kükhu vü ma sevü mowa ru naveh ünüh thawa nüh anyiri vü küzara na lo?