Read Pochuri Naga KÜSOSIEZHÜ 7 Bible Online

KÜSOSIEZHÜ 7 - Pochuri Naga bible

KÜSOSIEZHÜ 7

¹Anyo kümhie thuoüji avüjuhkürhe nyieh vünüh mhie veh; thi aküsü rülo tü aküwuo rülo nyieh vünüh rhe veh.

²Kütsazhu saküvehra zheh vü wa na küsanü, külu küvehwa zheh vü küwa nüh küümpha khe, küpakenühnyunü hamatü anyiri aveh kenüh asehkhewa küsa kenüh, jüta thuoüji akürhori nüh aluoveh lovü sana küveh kenüh.

³Küükhri thuoüji aluovehküna nüh küümpha khe, küpakenühnyunü alokürü atso thuoüji aluoveh tü alosaküwie küveh kenüh.

⁴Aküthsüluoveh tü luovehkünathsüra zheh lovü pehpehti, thitü zanyomküthsüra luoveh thuoüji külozheloku azheh lovüpehpehti.

⁵Anyiri kenüh zanyomküthsüra zah küna peh na küsanü, aküthsüra küshike küüna nüh küümpha khe,

⁶küpakenühnyunü aküfü kükhu vü arüzhü phuophuota kükuorie kümjie, zanyomküthsüra küükhri nga jükümjie wie; hama nga momasa wie.

⁷Kümrü nüh aküthsüri saküzhe tsa veh, thi athetü amüshe saküütsaküsüh veh.

⁸Zanyo küsate nyiehvü nüh ma sehkhe nüh küümpha khe; thi amüshe kürhieza nyiehvü nüh amüshe küsuo nüh küümpha khe.

⁹Arü premshu tümluo, küpakenühnyunü arüküshu tü zanyomküthsüra tüso vü pehpehti.

¹⁰Mokenüh khanavü arülori nyiehvü nüh khinyi rülo ri nüh küümpha khe lo? ti müküza tümluo, küpakenühnyunü noh nüh hama küüna tü zanyoküthsü vünüh nyu.

¹¹Zanyoküthsü tü aka vinyie thuoüji mühiem, arünyi künguri tü akünyia pehveh,

¹²küpakenühnyunü aküthsü künyuote thuoüji ame künyuote khewiethuoh; zanyoküthsü künyie thuoüji zanyoküthsü küpehwa kürho aküthsü nüh müshie küsa wiethuoh.

¹³Saküüwuowa küüroh müshenoluo; nyi küsü nüh saküükhuh kümwa thawa nüh sakümshora na lo?

¹⁴Kütsarhienyurhie rülo vü lozhesheh luo, thi amüngu kümsü rülo müshenono luo, Saküüwuowa nüh nyi küsüwa nga küpawa kümjie sakümhietsü; jüti küsa vünüh ma tü anyiri nüh ma nü zanyoküsü vü nga nüh ma sevü ta künguwa nyu.

¹⁵Hi momaküsa kürho vü hi nüh zanyo aveh ngumthuoh; künyitsari nga ma künyitsa vünüh pokahküm pehveh, thi kümsüküsari tü makümsü küsa vünüh ma kürho saküsuorarati.

¹⁶Künyitsa küluole temwa tüm, thi noh mpa nüh noh sanü zanyomküthsüle tüm; mokenüh noh mpa noh zorie na lo?

¹⁷Mükhusükhurüle tüm, zanyomküthsüle nga müsa tüm; mokenüh noh tsotho atüvü nüh noh tü sü na lo?

¹⁸Noh tü hama küjehte na küsa kümhieh küsü, thi jüma vünüh nohke nüh müvite nüh küsa kenüh; küpakenühnyunü Saküüwuowa kükrüri thuoüji jümari aveh vünüh jozhuteru na küveh kenüh.

¹⁹Aküthsü tü anyuji küsü vü atakrü türake nyieh vünüh aküthsüri vü akükhra tsüveh.

²⁰Azhih vü nyi küsü nga mükükhiemuotsatsa künyitsa thi zanyokümhie küsa münyie wie thuoh.

²¹Anyiri nüh küüza zanyori aveh vü mütsake tüm, noh siepewa nüh noh kümzü künara üsü nüh;

²²noh nüh küpari müzüküm noh luoveh nüh thsü veh.

²³Hamari aveh hi nüh aküthsü vi nü mütemthuoh; hi nüh, “Hi tü zanyo thsünaveh,” ti sa; thitü jüma tü hi vünüh kietuom.

²⁴Letsuokümwa, thi aküsheh, küshehshewa tü thawa nüh phahzhu sanalo?

²⁵Hi nüh eh müshe thsü nti thi phahzhu nti thi aküthsü thi zanyoaveh phahzhu nti, thi küzhehphrora kümsüküsa thi zanyo mküthsü aküzhe thsü nti phah.

²⁶Hi nüh nyimzari tü aküsü nyiehvü nüh akükha ngu ra, ma luovehtü küjurü thi aneh wiethuoh; thi ma ke tü akieveh wiethuoh; Saküüwuowa saküülozhewa thuoüji ma vünüh mürie ra veh, thitü kükhiemuori thuoüji ma nüh sietewa veh.

²⁷Halie, hamatü hi nüh küngura ti Küsosiewa nüh küza, phahzhu nti zanyo küsü vi nü azanyo küsü lovü thse,

²⁸eh müshe tü küneleneza nü phah, thitü hi tü jüma mphahra nüh sa. Anyie küsü azavü hi nüh nyi küsü phahra, thitü hamari aveh azhievü nyimzari küsü nga mpha ra.

²⁹Halie, hi tü hama mpa nüh phahra, jüma tü Saküüwuowa nüh anyiri sakütoketsü, thitü mari nüh aro küpapa khielota phahzhuteru.