Read Pochuri Naga KÜSOSIEZHÜ 8 Bible Online

KÜSOSIEZHÜ 8 - Pochuri Naga bible

KÜSOSIEZHÜ 8

¹Thawa nü aküthsüwa kümjie lo? Thi thawa nü azanyo rületsüthsü veh lo? Anyira küthsü tü ma nyieh saküwietsüveh, thi ma tso kükhowa tü khaphrümthuoh.

²Kajiwa nüh azhükütsü müzhe luo, thi noh nüh kümtse küüshiekütsa kenüh luovehmzah tüm;

³ma tsatü vü nüh tewa luo, akerowa alomzhe thuoüji müküzhiketüm, küpakenühnyunü ma nüh momowa lo veh ünüh ma tü saküvehkenüh.

⁴Kajiwa zhü tü khrashem, thi ma nüh ma vü, “Noh tü mowa sa veh lo?” ta küna mühie veh.

⁵Azhükütsü küvitsa thuoüji kükho küsüro kümtwa nyu, thi zanyoküthsüwa kümshe thuoüji atsotho thi lehkhuji thsü naveh,

⁶küpakenühnyunü akero aveh tü ma tsotho thi lehkhuji thsüküveh kenüh, mampa nüh anyira küsüro tü ma vü küzhopehwie ketünga.

⁷Mowa sanaveh ünüh ma tü müküthsü kenüh, jüma tü mota sanaveh ünüh thawa nüh ma küzara naveh lo?

⁸Sietse kheterana küsa nyi küsü nga münyie luo; nyutü aküsü rülowa nyiehvü kükhra pehveh lo; arie vünüh shele tekürura münyie, nyutü kümsüküsari jüma lovü thseküm müvizhu ra.

⁹Hi nüh eh müshe vi nü rünyi kükhu vü zanyo saküsari aveh vü küthse vü hamari aveh hi nüh ngu, anyiri tü ma mpa nüh ma kümnomna vünüh anyiri nyiehvü avü sasati.

¹⁰Thi nüh kümsüküsari küchowu hi nüh ngu; mari tü kümtse azhiewa vü tsetu thi tseshuru ti küsa hi nüh ngu, jüti sanü mari nüh jükümjie sakümwa anyujiwa vünüh mari siake. Hama nga momasa wie hü,

¹¹küpakenühnyunü kümsü küüroh küsa kümnomna tü shita mütsü, anyiri tsara luoveh tü kümsü vü pehjukümthuoh kenüh.

¹²Kükhiemuori küsü nüh müzakeri kümsü sanü ma kürho saküsuo wie ketünga, Saküüwuowa kükrüri vü thuoüji jüma tü mhie na küveh hi nüh thsü veh, küpakenühnyunü mari tü ma tüvü krüküvehkenüh;

¹³thitü jüma tü kümsüküsawa vü kümhiewa nyu, nyutü arüzhe kümjie ma rülori tü küsuowa nyu, küpakenühnyunü ma nüh Saküüwuowa tüvü mükükrü kenüh.

¹⁴Momaküsa tü azhih vü azhie küsü pehmümti, kümsüküsawa nüh küüroh küsa kümjie müzhe nü künyitsari tü satewawati, thi künyitsari nüh küüroh küsa kümjie müzhe nü kümsüküsarivü tü sasati.

¹⁵Thi hi nüh loküzhe azhükütsü sa, küpakenühnyunü anyiri tü arünyi kükhu vü tsazhu thi ma mpa nüh aloküzhe küsa wie küchie nüh zanyo kümhie münyie, hamatü Saküüwuowa nüh arünyi kükhu vü vi ma kütsü ma kürho rülori ma küüroh tü ma vü nyiwa wie na küveh kenüh.

¹⁶Aküthsü thsü nti hi nüh eh kümshe küthse vü, thi azhih vü küüroh saküsa no nti küsa vü, arülovüluo nyutü arüzavüluo nyi küsü anotha nga aküzeh müngu;

¹⁷jüti küsa vü Saküüwuowa küüroh aveh hi nüh ngu, jüma tü anyiri nüh arünyi kükhu vü küüroh saküsa mphahra nüh sam. Jüta wie ketünga anyi hozake nüh jüma phah nta akükhra thse wie ketünga, ma tü jüma mphahzhu ra; ma mpa aküthsüri nüh jüma thsürana ta phratewie nga, ma tü jüma mphah zhu ra.