Read Pochuri Naga KÜSOSIEZHÜ 9 Bible Online

KÜSOSIEZHÜ 9 - Pochuri Naga bible

KÜSOSIEZHÜ 9

¹Thitü hi nüh hamari aveh aluoveh lovü vithse, jümari aveh, künyitsari, aküthsüri thi mari nüh küroh küsa tü mokümjie Saküüwuowa ke vü pehveh ünüh ti rüzheno; Jümatü akülo ünü kümrhü nüh anyiri tü müthsü. Mari atüvü zanyo aveh momosa wie,

²Aküsü küsü aveh vü, künyitsawa vü thi kümsüküsawa vü, kümhiewa vü thi kümsüwa vü, kümtsewa vü thi mükümtsewa, küsahthuo küsawa vü thi müküsawa vü, ti aveh vü küru kümjie. Anyi kümhie nga thi kükhiemuori nga zarike wie; küüshiekürü nga thi küüshie mkütsawa nga zarike.

³Arünyi kükhu vü zanyo hamari küsa aveh hamatü kümsü küsü, aküsü küsü tü aveh vü ru veh; jüsevü anyira luoveh tü kümsü nüh pro veh, thi mari rho küveh vü mari luoveh lovü aküzhe nüh tü, thi jüma sevü mari tü aküsü vü tewa veh.

⁴Thitü akürhori aveh vü nyi küüperüri thuoüji küluozhe pehveh, küpakenühnyunü ashuh kürho tü amiewuo küsü nyiehvü nüh mphaküveh kenüh.

⁵Akürhori tü süwie nata mari nüh thsüküveh kenüh, thitü aküsüri thuoüji zanyo küsü nga müthsü, thi mari tü ajisuo münyiethuoh; thitü mari ase tü münyiethuoh.

⁶Mari külo, mari kümrhü thi mari noküüma tü pokahmthuoh, thi arünyi kükhu vü saküsa aveh vü küsuokürho mari suope münyiethuoh.

⁷Wa taji, aloküzhe vi noh lohse tsaluo; thi luoveh külozheloku vi nü noh khah zhu luo; küpakenühnyunü noh nüh mowa sasa veh ünüh kütoh kümtüthuoh kenüh.

⁸Noh thsünyawa tü atsotho aveh vü küümji luo; noh rügivü avüjuh tü müküüzüla tümluo.

⁹Arünyi kükhu vü noh kürho momaküsa rülori vi nü ma nüh noh kütsü noh nüh külowa noh vüvüh sie akürho loküzhe saluo, küpakenühnyunü arünyi kükhu vü jüma tü noh nüh küroh küsa no küüroh akürho vü noh suope wa küsa kenüh.

¹⁰Noh ke nüh momowa sa nta ngu naveh ünüh saluo, noh kükhra vi nü jüma saluo; küpakenühnyunü noh nüh wa na küsa küsürazhie vü thuoüji küüroh, nyutü kümshe, nyutü zanyoküthsü nyutü kümahtsa mükünyiethuoh kenüh.

¹¹Jüma sevü nga arünyi kükhu vü zhükütse vü, nyutü arie tü kümzho vü pehm veh, nyutü alohse tü aküthsüri vü, nyutü nyirhieri tü kümtsamlari vü, nyutü küütso tü aküzhüri vü kürhüküle mütse; thitü atsotho thi amngu tü mari avehvü sawie veh,

¹²küpakenühnyunü anyiri tü ma tsotho müküthsü kenüh. Anga nüh mükümhie aneh nüh tiezhuteküwa kümjie, thi küjurü vünüh amüwa tieteküm kümjie, jükümjie anyira tsari tü atsotho kümsü küsü nüh tietemthuoh, jüma tü zhürüluo mari vü kütsuotsake vü.

¹³Hi nüh arünyi kükhu vü aküthsü viküütie nga ngu, thi jüma tü eh kenüh aküji kümjie.

¹⁴Anyuji küzah küsü lovü anyiri pike peh; kaji küji küsü ru nü jüma sie saluo nü zhe, azheh küji aküwuküürohri tü jüma sie kürünyuo.

¹⁵Thitü jüma lovü kümkhuori aküthsü küsü ngu ra, thi ma nüh ma küthsü vünüh anyujiwa vizhutsü. Tü nyi küsü nga nüh anyi kümkhuo jüma mümshetü nüh sam.

¹⁶Thitü aküthsü thuoüji akükhra nyiehvü nüh mpha veh ti hi nüh küza, ma mpa nüh kümkhuowa aküthsü tü mam wie ketünga, thi ma zhüri vü amüshe müthse wie ketünga.

¹⁷Küüzoh vünüh aküthsüra zhü küüna thuoüji zanyo mküthsüri azavü atakrüri nüh azhü zie küveh nyiehvü nüh kümpha khe.

¹⁸Aküthsü thuoüji arie senyusevi nyiehvü nüh mpha veh, thitü kükhiemuori küsü nüh kümhie hozake zoriemümti.