Read Pochuri Naga SOLOMON KÜREIHIZAHRI 1 Bible Online

SOLOMON KÜREIHIZAHRI 1 - Pochuri Naga bible

SOLOMON KÜREIHIZAHRI 1

¹ Azahri azahwa, jüma tü Solomon azhi.

²O noh nüh noh po nüh küümeri vi hi küme thuoüji! küpakenühnyunü noh küümze tü akhah nyiehvü nüh mhie küveh kenüh,

³noh nüh küthse vü juri tü rheküngum, noh nyo tü vüjuh Küüshozhu wiethuoh; jükenüh rülavüri tü noh lom.

⁴Hi noh sevü shohke luo, pre nüh raluo, kajiwa nüh ma wiepa vü hi sie ruthuoh. Hiri tü noh vü rietsi thi nyierakhruo naveh; hiri nüh akhah nyiehvü nüh noh küümze sanaveh; mari tü siakümsie katosheh nü noh kümze veh.

⁵Hi tü nyi shehm, thitü züshehm, O Jerusalem tsavühri, Kedar juhthsüzhehri kümjie, Solomon küzietethsü kümjie.

⁶Hi mürephoke tüm, küpakenühnyunü hi tü noh nüh, hi tü arünyi nüh hi chüküm kenüh. Eh zah atsari tü hi vü arüshutewa; mari nüh hi tü rhelivizhuh kühuowa küsa; thitü, hi mpa eh rhelivizhuh thuoüji hi tü mühuo!

⁷Hi vü küza luo, noh thawa vü eh kürholi loveh ünüh, noh nyihnyihri khiela kümrhuo veh ünüh, rünyiküzeto vü jüma khiela küüzeh veh ünüh; hi tü mokenüh akütseri küsü kümjie sana lo.

⁸Mükütüküzü noh nüh müthsü thuoüji, O nyimzari aza vü küzütsawa, amüwara lekhuji müzhe luo, thi nyihzhükühuora juhthsüzhehri nato vü noh nyihnyihtsari arekümrhuo luo.

⁹Hi nüh noh vikümjie veh, eh küümzewa, Faroah rawuhkheka awie küsü vü.

¹⁰Noh khajie tü süriesüvo vünü küzü üta, noh ku tü asithe zho küthse.

¹¹Hiri nüh suna vi süriesüvo sanü noh tsü naveh, rakasa nüh saküüzü.

¹²Kajiwa nüh ma küjinyieze vü pehküveh vü, eh rheküüngu sazhuküze.

¹³Eh küümzewa tü eh kenüh athsorhe chükhu küsü wiethuoh, jüma tü eh tüso azhie vü küpeke veh.

¹⁴Eh küümzewa tü eh kenüh küwu akhrü wukümshiephoke küsü wiethuoh, Engedi rhelivizhuh vü.

¹⁵Halie, noh tü züshehm lie, eh küümzewa; halie, noh tü züshehm lie; noh notha tü mükhrietü wiethuoh lie

¹⁶Halie, noh tü züshehm lie, eh küümzewa, lotsam lie. Hisü aküjinyiezewa tü müzhim lie;

¹⁷hisü azheh arüvühri tü cedar thso nüh küsa, hisü amüruohri tü aküla.