Read Pochuri Naga SOLOMON KÜREIHIZAHRI 2 Bible Online

SOLOMON KÜREIHIZAHRI 2 - Pochuri Naga bible

SOLOMON KÜREIHIZAHRI 2

¹Hi tü Sharon küwu küsü, anyuovü asanü küsü.

²Asanü nüh kümokhümi azavü küpeh kümjie, jükümjie eh küümzewa tü rülavüri azavü pehveh.

³Asholo rhu nüh aküze athsoh azavü küpeh kümjie, jükümjie eh küümzewa nga vizari azavü pehveh. Khielota künolo vünüh hi tü ma rüzhe vü shupeh, thi ma vi tü hi nüh kümpo vü müngem.

⁴Ma nüh hi sie taji kütsazhu zhehvü ru, thi eh nyiehvü ma küphruothsü tü küümze.

⁵Thsovijuh vi hi sakürholuo, asholo vi hi sakürherholuo; küpakenühnyunü hi tü akülo vünüh nakümthuoh kenüh.

⁶O ma ke azhu wuovü tü eh lü kükhu vü küpehtüla, thi ma ke azhie wuovü tü hi kükhete tüla!

⁷O Jerusalem tsavühri, hi nüh nohri vü phrazhuveh, azhuh vü anguzuori nyutü asühnyiri, müjie kümngu küju nü noh tü akülo tü samküüngah nyutü samküsühra tüm.

⁸Eh küümzewa jikhi! Halie, ma tü tsethuoh, aküzhiri rügivü phepheta, küzhihori nyiehvü joke taji.

⁹Eh küümzewa tü anguzuo kümjie, nyutü asühvozah kümjie. Halie, ma tü hiri azie sevü tsie veh, mürhülehpieri vü nophoke nü, küwuozi vünüh nophieküze taji.

¹⁰Eh küümzewa nüh küza taji hi vü: “Sühraluo, eh küümzewa, eh küzüvühwa, thi tera wie luo;

¹¹küpakenühnyunü halie, akie tü tewathuoh, atsokürü tü küluomthuoh thi tewathuoh.

¹²Azhih vü aküwuri tü shuvehthuoh, azah küsa tsotho tü teru pehvehthuoh, thi hiri azhih vü tuturtu jikhi tü künara vehthuoh.

¹³Ampah rhuri tü ma vi tüketsethuoh, thi rheliviri tü wu vehthuoh; jümari tü kürhengu nyuohküze vehthuoh. Süraluo, eh küümzewa, eh küzüvühwa, thi tera wie luo.

¹⁴O eh mükhrietü, alokrü alokheri vü, alopie kükheteri vü, hi tü noh tso küüngu luo, hi tü noh jikhi küüna luo, küpakenühnyunü noh jikhi tü müngeküm kenüh, thi noh tso tü züchiekelelie.

¹⁵Hiri kenüh jiperüri re luo, jiperü küzahri, rhelivizhuh küzorieri, küpakenühnyunü hiri rhelivizhuh tü wu küvehthuoh kenüh,” ta phrahte.

¹⁶Eh küümzewa tü eh zhi thi hi nga ma zhi, asanüri azavü ma nüh ma nyihnyih kümrhuo.

¹⁷Arülowa tü rüthoküsah küju thi arüzheri tü teküwa vü, sühle luo, eh küümzewa, anguzuo küsü kümjie saluo, nyutü küzhiho hori rügivü asühvo küsü kümjieh saluo.