Read Pochuri Naga SOLOMON KÜREIHIZAHRI 7 Bible Online

SOLOMON KÜREIHIZAHRI 7 - Pochuri Naga bible

SOLOMON KÜREIHIZAHRI 7

¹Noh mpha jiküthsevüh lohvü küzake nga lozhisheh lo, O kükajivüh rülavüwa! Noh thüchi kürülo künyi tü asihthe kümjie lie, avüküsawa ake küüroh nü.

²Noh vozhu tü kalekhu kürülo, jüma tü akhah küwurü piketü müzüla. Noh vo tü hiemtha kümproke küsü, asanü vi mükieshe.

³Noh tüso künyi tü müsüzah kütsate künyi kümjie, anguzuo küwuhshie kümjie.

⁴Noh ku tü aruoha khajie kümjie Noh notha künyi tü Heshbon vü ajuhkhre wiethuoh, Batrabim kheriwa vü. Noh nyaku tü Lebanon khajie küsü kümjie, Damaska wuovü noke küüze.

⁵Noh tü Karmel kümjie noh kajilüwe satsü veh, thi noh shehri liküveh tü küsümo kümjie; kaji küsü tü maküzü nüh retemthuoh.

⁶Noh tü küzakelenga zü thi mhiem lo, O lokümwa, rülawa!

⁷Noh küzü thuoüji aluophi rhu üta, thi noh tüso künyi tü ma khrü kümjie.

⁸Hi nüh aluophi rhu müri naveh thi ma tsuonari küthuo naveh. O, noh tüso künyi tü rhelivi akhrüri kümjie küüsaluo, thi noh rütho rhetü asholo kümjie küsaluo,

⁹thi noh küüme tü akhah kümhietsawa kümhieta kuoli kütsuo kümjie saluo, apomie künyi thi ahari nyiehvü küürieh taji.

¹⁰Hi tü eh küümzewa zhi, thi ma küsangüwa tü eh kenüh.

¹¹Raluo, eh küümzewa, hisü kürü azhuhri vü tse-zhuwa ünüh, thi anyu vü wape ünüh;

¹²hisü kürü rhelivizhuh vü kümto wa ünüh raluo, jüti sanüh rheliviri tü shivehthuoh ünü nyu nüh no ünüh, rhelivi küwuri tü garie vehthuoh ünü nyu nüh thi akatohri tü wuvehthuoh ünü nyu nüh no ünüh raluo. Hi nüh jüla nüh eh küümzewa noh tsü naveh ünüh.

¹³Nazithsori tü kürheküüngu küshuraveh, thi hiri mükhieri rügivü tü kürüka thsoviri aveh pehveh, kürüthe nga thi kürüwi nga, jümari tü hi nüh noh kenüh sa kheh veh, O eh küümzewa.