Read Pochuri Naga SOLOMON KÜREIHIZAHRI 8 Bible Online

SOLOMON KÜREIHIZAHRI 8 - Pochuri Naga bible

SOLOMON KÜREIHIZAHRI 8

¹O noh tü eh prawa kümjie küsatüla, eh zah tünü vünüh kürohza wa! Mükütüküzü hi nüh alie vünüh noh mütu thuoüji, hi tü noh kümetsü na nü, thi nyi küsü nga nüh hi kümawa nyu nü.

²Hi nüh noh küjo thi noh sie taji eh zah zheh vü ru na nü, thi awiepa hi kümoh vü sietu na nü. Hi nüh akhah kürhengu noh tsü nü küüzhu na nü, eh katoh juh.

³O ma ke azhu wuovü tü eh lükükhu vü küpeh tüla, thi ma ke azhie wuovü tü hi kükheke tü la!

⁴Hi nüh noh küüshiezhü phrate tsüveh, O Jerusalem tsavühri, noh tü müjie kümngu küju nü noh tü akülo tü saküngah nyutü samküsühra tüm.

⁵Shünyiza vünüh kütsewa tü thawa lo, ma küümzewa vü rüngake taji? Asholo rhu kükhu vünüh hi nüh noh saküsühra. Jüla noh zah kümnomnasa, noh küwuowa tü jüla nüh kümnomnasa.

⁶Hi tü noh luoveh vü tsükie üta feke luo, tsükie üta noh pie vü feke luo; küpakenühnyunü küümze tü aküsü üta müzhoküm kenüh, noküüjizhi thuoüji arüku üta kutehkurü. Ma küüphrie tü anyih küüphrie üta, kümzho anyihzhuta.

⁷Ajuh hozake nüh kümze küürie samkürara, nyutü anyuoküza nüh jüma mükürhothe ra. Mükütüküzü nyi küsü nüh küümze kenüh ma zheh vü künyirhie aveh tsüketünga, jüma tü müküchieküzhü jum naveh.

⁸Hiri tü atsevü küza küsü pehveh, thi ma tü tünü müjiepe. Hiri tü hiri tsevüwa kenüh moti sana lo, ma nüh jüma kenüh küphrahte rülo vü?

⁹Mükütüküzü ma tü azie küsü tüla, hiri nüh ma rügi vünüh rakasa azhe küsü sana nü; thitü mükütüküzü ma nüh amükhie küsü tüla, hiri nüh amüsethsoh awieh vi ma vü kümhiete sana nü.

¹⁰Hi tü azie küsü, thi eh tünü künyi tü akhajieri kümjie; jüti küsa vü hi tü ma notha vü nyi küsü nüh luovehkürüzi vikütse üta.

¹¹Solomon tü Baal-hamon vü rhelivizhuh küsü peh; ma nüh rhelivizhuh tü akühuori vü küliem; mari nyi küsüsü wie nga ma vi kenüh rakasa akre anyie küsüsü viru na küsa sa.

¹²Eh rhelivizhuh, eh zhi tsawa, tü hi mpa eh zhi; noh, O Solomon, tü anyie peh mhie veh, thi avi kühuori tü müza künyi peh mhie veh.

¹³O noh aphariri vü kürhowa, eh refüri tü noh jikhi küna peh veh; hi tü jüma küüna luo.

¹⁴Pre luo, eh küümzewa, thi anguzuo küsü kümjie saluo nyutü asüvo küsü kümjie saluo, küüngukümie aküzhiri rügi vü.