Read Pochuri Naga ISAYA 1 Bible Online

ISAYA 1 - Pochuri Naga bible

ISAYA 1

¹ Amoz atsa Isaya kümohtsa, ma nüh Judah thi Jerusalem kenüh, Uzziah, Jotham, Ahoz, thi Hezekiah. Judah kaji hamari rülo vü kümohtsa küngu.

²Künaluo, O atülüri, thi künaluo, O azhihwa; küpakenühnyunü VÜWA nüh küzamthuoh ünüh: Hi nüh atsari küje nü saküükhruothuoh, thitü mari nüh hi siesaluomthuoh.

³Shüvotsa tü ma vüri thsü veh, thi rawuh küzahwa tü ma küsosiewa küzehpe thsü veh; thitü Israel thuoüji müthsü, eh nyiri tü müthsümümshi, ta küza.

⁴O, khielota kükhiemuo kuohjiri, künakhie vi nü akhuo küüzho nyiri, kümsüküsa tsatori, atsa kütsaküsüh nü küsari! Mari tü VÜWA kulemthuoh, mari nüh Israel Kümtsewa mamthuoh, mari tü küpeletewa khehthuoh.

⁵Noh tü mokenüh khinyi nga küürhie peh huo na lo, noh tü saisaluo peh huo taji? Alü aveh tü namüthuoh nü, thi aluoveh aveh tü thachumthuoh nü.

⁶Amütseh vünüh wa alüküju nga, jüma lovü asazüh kümhie münyiethuoh, thitü kümsamna thsopo thi akhüma mpa thi kümsamnari azüküthü mpa; jümari tü müte zhu wie, nyutü müriete, nyutü avüjuh vi künemkürüpah.

⁷Noh nyuji tü jaküüzomthuoh, noh nyujiri tü anyih nüh tsomthuoh; noh shütütsatsa vünüh anyilieri nüh noh zhih shohriemthuoh; jüma tü jaküüzomthuoh, anyilieri nüh khamlele küm üta.

⁸Thi Zion tsavühri tü rhelivizhuh küsü vü ashühzheh kümjie jamthuoh, amüzhi zhuh küsü vü thsolophrü kümjie jamthuoh, anyuji zhechieküm kümjie.

⁹ Mükütüküzü shiejira vüwa nüh, akürho pike kükhe müküsatüla, hiri tü Sodom kümjie samlanathuoh nü, thi Gomorrah kümjie satewala nathuoh nü.

¹⁰VÜWA zhü künaluo, nohri Sodom takrüri! Hiri Saküüwuowa küsosie vü künaluo, nohri Gomorrah nyiri!

¹¹ Nohri nüh küsahthuoh khielota küsa hi vü tü, mowa lo? ta VÜWA nüh küza veh; Hi tü nyizhüvo kütso kütsü khielota pehmthuoh thi samwa avo küsa a küthü nga; Hi tü shüvotsazah azüh nolo müvehthuoh, nyutü nyihzhüzah azüh nyutü nyisüvo azüh nolo müvehthuoh.

¹²Noh eh tüvü hi kütsa nta küru vü, eh nyula künyinyah hama thawa nüh noh küna lo?

¹³Mazhünyo mükünyie akütse vimru le tümluo; eh kenüh asierhe tü akükre. Asa kürüthe, kümnyi thi kümhu küjiluo tü eh kenüh akükre, Hi tü künakhie thi küükheke kümhu tü müküzhikera.

¹⁴Eh kürholi tü nohri asa kürüthe, thi nohri akhu küteke küsari mürhüm; jümari tü eh kenüh akhuoküüzho küsü sam, hi tü jümari vü nü münomthuoh.

¹⁵Noh nüh noh ke küchuo küüze vü, hi nüh noh vünüh eh notha küthim naveh; noh nüh kükhuo khielota sa wie ketünga; hi nüh küzawa nyu; noh ke künyi tü azü pro veh.

¹⁶Noh mpa nüh phrüm luo; noh mpa nüh sakümtsem luo; eh notha atüvü nüh noh küüroh kümsü vijam luo; kümsü küsa kütuom luo.

¹⁷Kümhie küsa thsüluo, kümrhümze müküsa phah luo, kümrü sakümsho luo; apa mkünyieri ajihphekraluo, tünyivühri kenüh khuo luo.

¹⁸Khinyi raluo, hiri kürü tsüaluo nüh, ta VÜWA nüh küza veh: nohri kükhiemuo tü ma mpa nüh müruküchiechie wie nga, jümari tü amüra üta müji naveh; ma mpa nüh jümari tü küsümo kümjie müru wienga, jümari tü akünehlo kümjie satera naveh,

¹⁹nohri nüh nyie ta, thi azhüvi nta thuoüji, noh zhihra zhi kümhie tsanaveh;

²⁰Thitü nohri nüh rüm, thi azhümküna nüh sam thuoüji; anyusuowa nüh zorieküm sanaveh; küpakenühnyunü VÜWA apo vünüh phrahte kümthuoh kenüh.

²¹Küzhütsanyitsa nyujiwa tü, mokümjie vünüh muomuokürho küsü samthuoh lo, kümsho pro küpehwa tü! Künyitsa tü ma vü peh, thitü khinyi thuoüji küfetheri samthuoh.

²²Noh rakasa tü arühsü jemthuoh, noh khah tü ajuh vi khremthuoh.

²³Noh kajitsari tü wuluom thi kürühura riekhuo sam. Anyiri aveh nga athe lom, thi müjuju kütsüra se zhem. Mari tü apa mkünyieri müphekra, thi tünyivühri nüh küsa tü mari tüvü müru.

²⁴Jükenüh VÜWA nüh, VÜWA nüh Israel kükhratsawa nüh: “O, hi nüh eh rüküshu hi mükünongüri vü küshoke naveh; thi hi mükünongüri vü hi mpa nüh ashewi sanaveh.

²⁵Hi nüh noh vü eh ke küüreleke naveh thi wejijuh küpe kümjie küsa noh rühsü kütsühzhujam naveh thi noh mürüküütsührü aveh vijam naveh.

²⁶Thi atükhu vü üta noh lesari satsü le naveh, thi küsatevü üta noh zhüphiekütsüri satsü le naveh. Jüma sevü nüh noh tü künyitsa nyujiwa ta ji naveh, künyitsazhütsa nyujiwa ta ji naveh.”

²⁷Zion tü kümsho vünüh rhehsam naveh, thi ma vü küpeh luovehkükhaphrüri nga, künyitsa vünüh.

²⁸Thitü azhümküünari thi kükhiemuori thuoüji, kürü nü zoriem naveh, thi VÜWA kükuleri thuoüji zoriem nathuoh,

²⁹küpakenühnyunü noh nüh nokülo anguzhe kenüh, zükrüm na küveh kenüh; thi noh nüh rükaküsa aphahriwa kenüh, noh tü anyiehküzüm naveh

³⁰küpakenühnyunü noh tü anguzhe ma nyawa küwane kümjie sam naveh, thi aphahri ajuh mükünyie kümjie sam naveh.

³¹Thi kümzhowa nga shoh naveh, thi ma küüroh tü anyihvi küüjem naveh, thi masükhürü nga tsorhiem naveh, nyi küsü nga masü zoküünewa nyu.