Read Pochuri Naga ISAYA 10 Bible Online

ISAYA 10 - Pochuri Naga bible

ISAYA 10

¹Awule künakhie wule kütsüri küsara kütsüna, thi akürhüri thari nüh kümrü rhüveh ünüh,

²Kümsho vünüh küthotsari anato vü saküürele nta, thi eh nyira kümkhuo mari kükato wa rühu nta, tünyivühri tü mari zhi sa nta, thi apa mkünyieri vi mari ashie sa nta!

³Noh tü kümnomna rülo vü noh tü mowa sanaveh, kületsuo vünüh tsomrhü küruwa vü? noh kükra kenüh noh tü thawa vü wa na lo, thi noh tü noh künyirhie khiela ja nti lo?

⁴Zanyoküsü nga mükükhe wie tü aküsiri azavü shikhoke nü peh nyutü rehthekümri azavü kütsuotsake wie, küpakenühnyunü hamari aveh vünüh ma rüküshu tü kürele temwa wie, thi ma ke tü thsuoke peh huo wie.

⁵ Ah, Assiria, eh rüküshu mürüzhietsüh, eh luoveh küüzü akütsüh!

⁶Mükünyitsara khuohji vü hi nüh ma küze, thi eh rükümtho nyiri vü hi nüh azhütsüküze, prüküvirari vi üta thi küthiküvirari revi üta, thi lekhujiri vü nyuohnyiza vü künyinyah kümjie mari nyinya üta.

⁷Thitü ma tü jüküthse mümshe, thi ma müshe tü jüüta mümshe; thitü ma mümshe vü thuoüji zorie nta küsa wie, thi pike müpa vünüh akuoküjiri saja nta müsa;

⁸küpakenühnyunü ma nüh: “Eh sierhüri aveh tü kajiri nyu ülo?

⁹Calno tü Karkhemish kümjie nyu ülo Hamath tü Arpad kümjie nyu ülo? Samaria tü Damaska kümjie nyu ülo?

¹⁰Eh ke tü anguora kajiperi juküm üta jümara kükhrüke tsorheri tü Jerusalem thi Samaria nyievü nüh jiveh,

¹¹hi tü Jerusalem thi ma nguori vü, Samaria thi ma nguori vü sakütsü kümjie samtsüra ülo?” taküza.

¹²VÜWA nüh Zion küzhi vü thi Jerusalem vü ti ma küüroh aveh sajura thuoüji Assiria kaji kürhiezarhiechiwa thi ma kükuotikuoshi kükuoti kümnomna tsü naveh,

¹³küpakenühnyunü ma nüh: “Hi nüh eh ke kükhra nüh jüma sa, thi eh küthsü vünüh, küpakenühnyunü hi tü küthsükümshi pehküveh kenüh; anyira rühri hi nüh vijamtüthuoh, thi mari künyirhiesatheküsari prüvimthuoh; kümzhori küsü kümjie hi nüh kükajipe rügivü küpehri asaji vü viturumthuoh.

¹⁴Eh ke tü aphra küsü küphahra kümjie anyira künyirhie phahrathuoh; thi arüji jamküm nyiri nüh küvizhuh kümjie jükümjie hi nüh azhih aveh vizhuhmthuoh; thi nyi küsü nga aküsa müküngah nüh sam, nyutü apo müka, nyutü akhi mkhu,” ti küza.

¹⁵Amüvü tü aküshüwa nyiehvü nüh jiveh ta küzara naveh ülo, nyutü thsohkürhovüh tü ma mpa nüh aküwewa vü saküjira naveh ülo? Mürüzhietsüh nüh ma mpa khakera naveh, nyutü mükütüküzü akütsüh nüh athsoh mükünyuwa mükhake üji mükümhie üta!

¹⁶Jükenüh nüh, kükhra VÜWA nüh, jaküm aküna küjiküsuo arieküsari azavü küze naveh, thi ma kütholathovü kükhu vü atso küsü küjie naveh, anyih tsa küveh kümjie.

¹⁷Israel aküwie tü anyih küsü sateru naveh, thi ma kümtsewa tü anyihzhu küsü satera naveh, thi jüma tü ma rüzhüri thi aluorüzhüri rülo küsü vünüh tso nü zoriem naveh.

¹⁸Ma kütholathovü reza thi ma zhih thsovi kürholi thi akümo[2] nga VÜWAzoriemtü naveh, thi jüma tü akünari nüh müsüküm üta sam naveh.

¹⁹Ma reza atshoh kümtori tü züla shehm naveh atsari küsü nüh kürhükhehra sam naveh.

²⁰Jüma rülo vü Israel kümtori thi Jacob zhehlo rhoküvehri tü mari rehthekümri vü kürüngake lewa nyuthuoh, thitü küzhütsa vünüh mari tü VÜWA, Israel kümtsewa vü rüngakem, nathuoh.

²¹Kümtori, Jacob kümtori tü Saküüwuowa kükhratsawa vü sühleteru naveh,

²² küpakenühnyunü noh nyi Israel tü ma mpa nüh juhküji vü shünyi üta wie ketünga, mari kümtori müpa shele küru sanaveh. Küzorie tü phrahkemthuoh, künyitsawa nüh lichü taji,

²³küpakenühnyunü VÜWA nüh phrakeküm üta azhih azhila aveh vünüh asekhe küsaju samnathuoh.

²⁴Jükenüh VÜWA nüh, “O eh nyiri, Zion vü kürhori, Egyptri nüh küsa üta Assiriari nüh azhietsüh nüh vi kürhie wie nga nyutü mari nüh nohri vü akütsüh khake wie nga mükrü tüm,

²⁵küpakenühnyunü tsotho pike vünüh eh rükümtho tü asehkhe vü teru naveh, thi eh rüküshu tü mari küzorie vü küjoküze na küveh kenüh.

²⁶Thi VÜWA nüh Oreb lokrü vünüh Midiari küürhiethe kümjie mari kürhie naveh; thi ma zhietsüh tü juhküjiwa nyiehvü rhie peh naveh, jütisanü ma nüh Egypt vü küsa üta khake naveh.

²⁷Thi jüma rülo vü ma khuoküzhowa tü noh safü vünüh tewa naveh, thi ma thsohkhuonyih tü noh ku vünüh zoriemtü naveh,” ti küza.

²⁸Ma tü Aiath vü teruthuoh; ma tü Migron kariwathuoh Mikhmash vünüh ma tü ma tsokrüri satheveh,

²⁹mari tü kuotseküwawa karimthuoh, arüza kenüh mari tü Geba vü pehtewa; Ramah tü khekheti küshühküm sa, Saul Gibeah tü zhütewa.

³⁰Zieluo, O Gallim tsavühri! künaluo, O Laisha! Ma rületsüluo, O Anathoth!

³¹Madmena nü prüteküwa vü pehvehthuoh, Gebim vü kürhori tü kütotera kenüh zhütewaluo.

³²Nosü hama rülo vü ma tü Nob vü zepe naveh, Zion tsavühra küzhi Jerusalem küzhihowa vü ma tü ma kesheküürülo vi küze naveh.

³³Halie, VÜWA nüh saküümzhohra kükhra vü apruo ri tajam naveh; kümsie aküjiri tü zahjam naveh, thi kümho tü asajivü viam naveh.

³⁴Ma nüh amüvü vi reza küremokeri puotsam naveh, thi Lebanon tü ma athsoji jiküzhri jiehm naveh.