Read Pochuri Naga ISAYA 11 Bible Online

ISAYA 11 - Pochuri Naga bible

ISAYA 11

¹ Jesse totsoh vünüh azhu küsü shizhu naveh, thi ma arüzohri vünüh atsuona küsü shizhu na avi pe naveh.

²Thi VÜWA Sietse tü ma rügi vü peh naveh, aküthsü thi küthsükümshi sietse, küzhüphie thi akükhra sietse, zanyoküthsü thi VÜWA kükrü sietse ma vü peh naveh.

³Thi ma nokülo tü VÜWA kükrü vü peh naveh. Ma tü ma notha nüh künguwa vi nü ashih küsawa nyu, nyutü ma khüna nüh küünarawa vi nü küsathuowa nyu;

⁴ thitü ma tü künyitsawa vi nü kümkhuowa ale sanaveh, thi azhihwa kenüh küzarike vünüh sathuo naveh; thi ma nüh ma po zhietsüh vi azhihwa kürhie naveh, thi ma pomie künyi arütho vi nü kümsüküsawa rehthe naveh.

⁵ Ma küshih tü künyitsa vi tseke naveh, thi küzhütsanyitsa vi ma küzo vü peh naveh.

⁶ Rezanyihnyih tü nyihzhüzah vü nyi kürho sanaveh, thi amie tü wa tü nyihzhüzah vü nyi zeh naveh, thi mieshüzah, amiewuowa thi nyisüzah tü kürü naveh, thi atsa kürünguo küsü nüh mari küjotse naveh.

⁷Amieshü thi awie tü kürü ashietsanaveh; mari atsa tü kürü zeh naveh; thi amiewuowa tü shüvotsa kümjie amaguo tsanaveh,

⁸Atsanüküveh wa nüh areji kuküpie vü saküzhie naveh, thi atsa nyinyuowa nüh mre ku lovü ma ke rümie küze naveh.

⁹ Eh kümtse küzhiri aveh vü mari tü sakümnomna nyutü küzorie wa nyu, küpakenühnyunü ajuh nüh juhküji külüwute üta VÜWA zanyoküthsü nüh azhih tü pro na küveh kenüh.

¹⁰ Jüma rülo vü Jesse rüzoh tü anyiri vü küükrüthsü üta toke naveh; akuoküjiri tü ma phah naveh, thi ma kürhope tü kütholathovü sanaveh.

¹¹Jüma rülo vü VÜWA nüh ma ke thsuozhu naveh: tü akünyiawa nü thuoüji ma nyi jaküm kükhe küsari savile naveh, Assiria vünüh, Egypt vünüh, Pathros vünüh, Ethiopia vünüh, Elam vünüh, Shinar vünüh, Hamath vünüh, Hamath vünüh thi juhküji natari vünüh.

¹²Akuohjiri kenüh ma nüh küükrüthsü küsü khake naveh, thi Israel zhejakümri ma nüh sazhuh naveh, thi azhih juhke müzü vünüh Judah voriekümri vizhuh naveh.

¹³Efraim notha noküsatü tü tewa naveh, thi Judah kümnomna kütsüri tü rethem naveh; Efraim tü Judah kenüh noküümawa nyu, thi Judah tü Efraim saküümnomnawa nyu.

¹⁴Thitü mari tü zhietu wuovü nüh Filistinra safü rügivü the turu naveh, thi kürü nü mari tü zhieshu nyiri prüvi naveh. Mari tü mari ake vi Edom thi Moab vü thse naveh, thi Ammonri nüh mari azhüküüna sanaveh.

¹⁵ Jütisanü VÜWA nüh Egypt juhküji mizhi zorie kümkhemtü naveh; thi ma chiküweh mürhü vi nü rükhuwa rügivü chiwa naveh, thi nyiri nüh küüwekuokike vünüh kariwa na küsa kenüh jüma nüh akuhleh türüri kürhie naveh.

¹⁶Thi ma nyiri kümnyie kümtori kenüh Assiria vünüh alerü küsüpeh naveh, Israel nüh Egypt zhih vünüh tse küshuhru üta sanaveh.