Read Pochuri Naga ISAYA 13 Bible Online

ISAYA 13 - Pochuri Naga bible

ISAYA 13

¹1 Amoz atsa Isaya nüh Babilon kenüh azhüle küsü küngu.

²Aho kümtse küsü vünüh thsoshi küsü shuhru, mari vü zie kümsie taji, mari kütuna küsakenüh ake lahe luo sierhüra lepie lo vü.

³Hi nüh sakümtsekümri vü hi mpa nüh azhütsümthuoh, kümzhori vü eh rüküshu saküütsa nti jiküzemthuoh, eh kürhiezari huthuothuoh.

⁴Künaluo, ashieji aküji küsü aküzhiri rügi vü akuoh küpapari sezhu küveh üta! Künaluo, kajiri akhi thopahiri kürü sehzhuküveh! VÜWA tü arie küsa kenüh ashie ji sazhuvehthuoh.

⁵Mari tü kükietuo azhi vünüh ru, atülüri küpote vünüh, VÜWA thi ma rükütho rietsokrüri, azhih ajü zorie na küsa kenüh.

⁶ Reraluo, küpakenühnyunü VÜWA rülo tü shienyimthuoh ünüh; küzorie üta jüma tü kükhrashehwa vünüh ru naveh!

⁷Jükenüh ake aveh tü thasüm naveh, thi anyiri aluoveh aveh tü süm naveh,

⁸thi mari tü luoveh zatewa naveh, Kümnomna thi amüshekümnomna nüh mari nyiehvü tewa naveh; mari tü nyimzari küsü nüh atsaküwuoküna üta amüshe na naveh. Mari tü küsü nüh küsü vü lorü nü noluo naveh; mari anyieh tü müru teru naveh.

⁹Halie, VÜWA rülo tü tetsethuoh, khukemsü, arükümtho thi khielota arüküshu vi nü, azhihwa saküüzomluo nta thi jümawa vünüh ma kükhiemuori zoriem luo nta,

¹⁰ küpakenühnyunü atülü wutsiri thi wutsi küpari tü mari küwie mütsü nüh samnathuoh; arünyi tü ma shuküru vü zom naveh thi asa nga ma küwie mütsü nüh sam naveh.

¹¹Azhihwa tü ma kümsü kenüh hi nüh kümnomna tsü naveh, thi kümsüküsari tü mari künakhie kenüh kümnomna tsü naveh; hi nüh kürhiezarhiechira kükara vi asehkhe samtü naveh, thi mükünyishira kürhieza küsaji vü thsemtü naveh.

¹²Suna kümhie nyievü nüh hi nüh anyiri tü saküürhena, Ofir suna nyiehvü nüh nyiri kürho saküürhena.

¹³Jükenüh hi nüh atülüri tü khekheta küüshüh naveh, thi azhih nga ma pe vünüh küzhühm naveh, VÜWA rükümtho, khielota ma nü küshu rülo vü.

¹⁴Thi anguzuo küüka kümjie, nyutü anyihzhü thama nüh küzhezhuh kümjie, anyiri aveh nga ma mpa ma nyiri vü shele tewa naveh, thi anyiri aveh na ma mpa ma zhih vü zhütewa naveh.

¹⁵Thathari ngu naveh ünüh jümari thuoüji shükükhari naveh, thi kürerari thuoüji anyuchuwa vünüh tsuotsanaveh.

¹⁶Matsa nyinyuoteri tü asükhrisükhri vünüh zonyam naveh; ma nothari nüh ngu vünüh ma azhehri tü rühuokhemtü naveh thi mavüvühri tü müramtü naveh.

¹⁷Halie, mari sie küüsaluo na küsa kenüh hi nüh Mederi küketsü naveh, jümari tü rakasa küchiekeri nyu thi suna nokülori nyu.

¹⁸Mari lawih nüh vizari kükathe naveh; mari tü avo lovü nüh küturu aviri vü noküümzewa nyu, mari notha tü kürünguori vü noküümze wa nyu.

¹⁹ Thi Babilon, kajiperi kütholathovüwa, Khaldeari nüh vikürhiezarhiechi küzhuwa tü Saküüwuowa nüh jümari khaküja vü Sodom thi Gomorrah kümjie samnaveh.

²⁰Jüla tu küpehlewa nyuthuoh, nyutü awuhle aveh nga jüma lovü tukürhowa nyuthuoh; Arabri küsü nga jüla ma juhthsü kükhakewa nyuthuoh, nyihnyihkühuori küsü nga mari nyihnyih jüla tsuoküüze nga küsawa nyu.

²¹ Thitü rezasari nüh jüla küzeh sanaveh, thi jüma azhehri tü samwa khiküpapa kükhuri nüh pro naveh; jüla mwaküjiwa nüh kürho sanaveh, thi aküngokürholiri nüh jüla kütsih sanaveh.

²²Ma khajieri vünüh rezashuri nüh khu naveh, thi jiperüri nüh akülo zhieri vünüh khu naveh; ma tsotho tü shenyi phakemthuoh thi ma rülori tü müsuorathuoh.