Read Pochuri Naga ISAYA 14 Bible Online

ISAYA 14 - Pochuri Naga bible

ISAYA 14

¹VÜWA nüh Jacob vü rüthaküna peh naveh thi Israel rüka le naveh, thi masü azhih vü satsü naveh, thi anyilieri tü mari rüngake naveh.

²Thi anyiri nüh mari vü taji mari sie nü mari vi ru naveh, thi Israel zhehlori nüh mari vi nü VÜWA zhihvü tükhavüh thi tükhapa küsanaveh; mari nüh mari siküwari vi mari küsi sanaveh, thi mari kümrüri nyievü takrü naveh.

³VÜWA nüh nohri küna, kürhoküsü, thi küüroh kükho vi nohri küüsa vünüh münyiera thuoüji,

⁴Babilon kajiwa vü noh nüh künyie hama vike naveh: kümrüri tü mokümjie lemthuoh lo, khielota rükümtho tü lemthuoh!

⁵VÜWA nüh kümsüküsara rükütsüh zoshimtüthuoh, atakrüra kajikütsühwa,

⁶rükümtho vünüh müküütuo küürhie vi nü jüma nüh nyiri kürhiethe, mükütuo kümnomna arüküshu vinü jüma nüh akuoküjiri takrü sa.

⁷Azhih ajü tü kümnyie thi küüzoh vü peh; mari tü azah küsa vü shuteküru sa.

⁸Athsojiri tü nohri vü nyierakhruo veh, Lebanon kani ri nüh, ‘Noh tü kürünyie vü thsekümthuoh kenüh, küshüchiehri küsü nga hiri vü müruthuoh,’ ti küza.

⁹Noh küru vü noh mütu na küsa kenüh küsürazhie kükhu tü kükezhumthuoh, noh rüluo nta jüma tü küükheri saküjokemthuoh, azhih vü sierhüri aveh; mari kükajiperi vünüh jüma tü sürarati, akuoküjiri nü kaji küsari aveh tü.

¹⁰Mari aveh nüh azhüphra taji noh vü “Nohri nga hiri üta thasümthuoh! Nohri nga hiri kümjie samthuoh,” ta küza.

¹¹Noh loküzheri tü küsürazhie vü viturumthuoh, nohri takhu ra khi; nohri aze kükhu vü tü amütheri ri pehveh, thi nohri küüzhute tü ajienyuri.

¹² “Noh tü mokümjie atülü vünüh tsuotsamthuohlo, O rülo Wutsi, küthoriewa atsa! Noh tü mokümjie vünüh azhih vü tethuo küzemthuoh lo, noh akuoküjiri kürünyie vü vithsekümwa!

¹³Saküüwuowa wutsiri anyievü, kümsie vü hi nüh eh kükajipe sake naveh; zhietü kületsuo vü aküzhi küsehzhu vü hi tü shupeh naveh;

¹⁴Hi tü akülu kümsieri anyievü tsekuo naveh, hi tü hi mpa nüh kümsietsawa kümjie sanaveh,” ta küza veh.

¹⁵Thitü noh tü küsüraazhie vü viturumthuoh, küchühke aküshehri lovü viturumthuoh.

¹⁶Noh künguri nüh noh nophoke naveh, thi noh vü rephoke taji: Azhih küsawa anyi hamatü khekheta küshüh veh ülo, kajiperi küüzhühwa.

¹⁷Azhihwa sanüh shünyiza kümjie saküm thi ma nyujiri khamlelekümtüwa ma küsiküsari azhehlovü müküüzewa ülo? ti küza.

¹⁸Akuohjira kajiri aveh tü kütholathovü vü zeh veh, mari nyi küsüsü nga mari mpa mari rükulovü;

¹⁹thitü noh thuoüji vizhujamthuoh, noh rüku vünüh letsuomthuoh, tsotho mküjie vünüh küwuo kümjie, rethekümri vi müphiete, anyuchuwa nüh shüthekümri, küphieke alohri vü tekütsuori, aküsü kümo ampha nüh nyinyakümri kümjie.

²⁰Noh tü mari vü nyi küchowu nyu, küpakenühnyunü noh tü noh zhih zoriekümthuoh kenüh, noh tü noh nyiri rethemthuoh. Kümsüküsara küthsoküzhiri tü anyo müküüthohle wietümluo!

²¹Ma tsari kenüh sühthe na küsa küche luo ma pari künakhiekenüh, mari tü sühra nü azhihwa vim üsü nüh, thi azhihnyiehwa nyiehvü anyuji saküüprom üsü nüh.

²²“Hi tü sühra nü mari siesaluo naveh,” ta VÜWA nüh küza, “thi Babilon anyo thi kümtori vünüh, thi küruleri kenüh vünüh rethuom naveh, ta VÜWA nüh küza.

²³Thi hi nüh jüma vi asüfü azhi küsam naveh, thi ajuh müshekeküsam naveh, thi hi nüh jüma tü küzorie luofü vi rhüm naveh, ta VÜWA nüh küza,” ti küza.

²⁴ VÜWA nüh küshiemthuoh: “Hi nüh rüzhekümthuoh üta, jükümjie wie naveh, thi hi nüh kümshe üta, jüüta jüma tü tsie naveh,

²⁵jüti küsa vünüh hi nüh eh zhihvü Assiria zorie khehm naveh, thi ma thsokhuonyi tü mari vünüh tewa naveh, thi ma khuo tü mari safü rügi vünüh fojam tü naveh,” ta küshiemthuoh.

²⁶Kümshe hama tü mshetse azhih aveh kenüh; thi ake hamatü akuoküjiri aveh nyiehvü küthsuokewa wie thuoh,

²⁷küpakenühnyunü VÜWA nüh mshekümthuoh kenüh, thi thawa nüh jüma sakümieranalo? Ma ke tü küchuo küzemthuoh, thi thawa nüh jüma vishele ra na lo?

²⁸ Kajiwa Ahaz süküm mahvi vü azhü hama ru:

²⁹ “Nyiera mkhruo tüluo, O Filistin, nohri aveh, nohri küürhie zhietsühwa tü zoshimthuoh, küpakenühnyunü aresüwa rüzoh vünüh amre shuru naveh, thi ma vi tü aküprü resü küsü sanaveh.

³⁰Thi kümkhuori küwuo khuwa tü avo sanaveh, thi küthotsari tü lohji nü zeh tsuo naveh; thitü hi nüh kümkhuoji vi noh rüzoh zoriem naveh, thi noh kümtori hi nüh rehthem naveh.

³¹Krie luo, O akheriwa; zie luo, O nyujiwa; akükrü vünüh ratewaluo, O Filistinri, nohri aveh! küpakenühnyunü zhietü vünüh anyikhu shutse veh, thi ma thopahiri vü akükrü münyie,” ti küza.

³²Nyi küsü nüh akhuojiwa zhüleküvüri vü mowa rületsü na lo? “VÜWA nüh Zion vizhumthuoh, thi ma nyiri amüshekümnomnari tü ma vü kümnyipe ngu ra veh.”