Read Pochuri Naga ISAYA 16 Bible Online

ISAYA 16 - Pochuri Naga bible

ISAYA 16

¹Mari nüh azhih jüla takrüri vü nyihzhüzahri küzemthuoh, Sela vünüh shünyiza le vünüh, Zion tsavühra küzhi vünüh,

²müwari küprürie kümjie müwaphra vünüh zheküprürie kümjie Arnon tazhü vü Moab tsavühri kümjie.

³“Küzhühphie tsüluo, kümsho satsüluo; rünyizeto müsie küveh vü, noh rüzhe tü arüza kümjie küsaluo; zhezhujakümri küthi luo, prikütseri zhumtsa tüm;

⁴Moab zhezhujakümri tünohri aza nü küürholuo; küzorieri vünüh mari vü kümnyipe küsü saluo. Kümrüri münyiethuoh üji, thi küzorie lemthuoh üji, thi azhihwa vünüh ampha kükhulovü künyinyah ratewa thuoüji,

⁵jüta thuoüji mükükhaphrükhale küümzevünüh mükajipe küsüvishu naveh, thi jüma nyiehvü David juhthsüzheh lovü küzhütsanyitsa shupeh naveh, lesa küsa thi kümsho küphahwa thi künyitsa rhü üta küsawa,”

⁶Hiri nüh Moab kürhiezarhiechi künarathuoh, ma tü küzakele nga rhieza nüh; ma kükuoti ma kürhiezarhiechi, thi ma mizhiküsü ma kükuotiri tü akürie.

⁷Jükenüh Moab tü rietsiluo, nyiri aveh nga Moab kenüh rietsiluo. Külu luo, lorü thuoke taji, Kir-harseth tieshuju kenüh.

⁸Heshbon azhuhri küwazhü kenüh, thi Sibma rhelivirhu kenüh; akuoküjira vüri nüh ma tsuonari kürhiejamthuoh, Jazer küju wa thi küpohhu vü tseteküwa wa; ma küshiri tü shota kümzawathi juhküjiwa nyievü kari wa.

⁹Jükenüh hi tü Jozer akükrie nyi nü krie Sibma rhelivirhu kenüh; hi nüh eh rüthsüri vi küüjiephuo, O Heshbon thi Eleale nohri avi thi nohri kümahwie vünüh arieküsa küüzie tü tsuotsamthuoh.

¹⁰Thi avi khielota küpe azhuhwa vünüh loküzhe thi loküra vitewathuoh; thi rhelivizhuhri vü azah küsü nga müsathuoh, jikhi küsie küsü nga münyiethuoh; akhah kütsüzhu peri vü kürütseri tü mürütsethuoh; rhelivi kümahwie khi tü küzohmthuoh.

¹¹Jükenüh eh kürholi tü Moab kenüh topito küsü kümjie krieveh, thi eh luoveh tü Kir-heres kenüh krieveh.

¹²Thi Moab tü ma mpa nüh küru nü, ma tü azhie kümsiewa vü ma mpa nüh münowie ketünga, ma kümtsezheh vü kükhuo sa nta ma nüh küru vü, ma tü müsara nüh sam naveh.

¹³Azhü hama tü teküwa tsotho vü VÜWA nüh Moab kenüh küphrahte.

¹⁴Thitü khinyi thuoüji VÜWA nüh, “Mahvi küche vünüh, akeküsie küsü mahviri kümjie, Moab kütholathovü tü momakütalo vü viturm naveh, ma shieji küji müthoh aveh vünüh thi kürhorari tü züla sheh thi mükhra nüh sam naveh,” ta küza veh.