Read Pochuri Naga ISAYA 19 Bible Online

ISAYA 19 - Pochuri Naga bible

ISAYA 19

¹Egypt kenüh ahzhü küsü, Halie, VÜWA tü akülu zhükütse küsü rügi vü peh nü Egypt vü tse veh; thi Egypt anguori tü ma tsatüvü khekheta küshüh naveh, thi Egyptra luoveh tü mari lovü nüh ram naveh.

²Thi Egyptri müpa nüh Egyptri sie küüruohluo nta hi nüh küketsünaveh, thi mari tü saluo naveh, anyiri aveh nga ma mpa ma jienü siesaluo naveh, thi anyiri aveh nga ma zhephruwa siesaluo naveh, anyuji küsü nüh anyuji küsü, thi kajipe küsü nüh kajipeküsü siesaluo naveh

³thi Egyptra sietse tü mari mpa malorivü nüh mzhikürütsom naveh, thi hi nüh mari kürüzheri tü saküürüüzatsü naveh; thi mari tü anguori thi kütüma kürhori vü, thi tüshitümari vü thi amahzhieri vü küzaluo sanaveh;

⁴thi hi nüh Egyptri vi küüroh kükho küsa vü küsü nga ake vü thsem naveh; thi kaji aküze küsü nüh mari nyievü küütakrü naveh, ta VÜWA nüh küsa.

⁵Thi Nile ajuhri tü ngetewa naveh, thi arüku tü chüküweh thi ngem naveh;

⁶thi ma juhleri tü primnem naveh, thi Egypt Nile tsuonari tü sakürhieh thi ngem naveh, amüshühri thi apra ri tü pritewa naveh.

⁷Nile nato zhieri vü, ma poteposhuri vü mütham naveh, thi Nile nato vü mahtsüküzhuh aveh tü küwehm naveh, mürhüjam naveh, thi münyie nüh sam naveh.

⁸Ngakütieri tü lorünü nü krie naveh, Nile vü müluokhu küthseri aveh nga; thi mari tü kriekhe naveh aneh ajuh vü küjakeri tü.

⁹Akükhie vinü küürohri rüzarüpuona, thi akükhie vi asie küsari tü amüngukükhem naveh.

¹⁰Azhih jüla aloh khuo küsari tü tonyam naveh, thi ake vünüh küürohri aveh tü ashesü naveh

¹¹Zoan kajitsari tü azanyomthsü nüh sakhehmthuoh; Faroah küthsü küzhühphie tü küzhekümiera küzhühphie tsü veh. Noh tü mokümjie Faroah vü, “Hi tü aküthsüra tsa küsü, alanyira kajiri atsa küsü ta phrahtera na lo?”

¹²Thinü jüta thuoüji noh zanyo küthsü nyiri tü khiela pehveh lo? VÜWA nüh Egypt vü mowa samtü nüh noh vü küüza thi saküüthsüluo.

¹³Zoan kajitsari tü zanyomthsü nüh samthuoh, thi Memfis kajitsari tü müramthuoh; ma kuoh jühkelohri nüh Egypt küjo zihmthuoh.

¹⁴VÜWA nüh ma lovü kürüza sietse küsü küürurümthuoh; kümsheri nüh ma küüwuo vü küpuolepuoza üta, mari nüh Egypt tü ma nüh zanyo küsa aveh vü küpuolepuozamthuoh.

¹⁵Thi Egypt kenüh küsara alü nyutü anürü küpewa nga aluophi tsuona nyutü amüshüh nga zanyo küsü nga küpehwa nyuthuoh.

¹⁶Jüma rülo vü Egyptri tü nyimzari kümjie sam naveh, thiVÜWA mari rügivü viküüze ake atüvü krü nü khekhetaküshüh naveh.

¹⁷Thi Egyptri kenüh Judah azhih tü küngothse küsü sam naveh; thathari vü jüma küzamthuoh ünüh krü naveh, küpakenühnyunü VÜWA nüh makeri nüh mokümshewa mshesatü vehthuo ünüh.

¹⁸Jüma rülo vü Egypt zhih vü Kanan zhü küphra thi VÜWAvü kütsarü küüshie kütsü anyuji münga peh naveh. Nyuji ha küsü thuoüji Rünyi Nyuji ta ji naveh.

¹⁹Jüma rülovü Egypt zhih azhila vü VÜWA vü kükhurüpe küsü pehnaveh, thi ma rüshu nü VÜWA vü alokhuo küsü peh naveh.

²⁰Egypt zhih vü jüma tü VÜWA vü athsoshi küsü thi povüküsü sanaveh; kümrü kenüh mari nüh VÜWA vü küzie vü ma nüh mari vü küülolewa küsü küze taji mari küütote thi küüvizhunaveh.

²¹Jütisanü VÜWA tü ma mpa nüh Egyptri vü saküthsü naveh; thi jüma rülo vü Egyptri tü VÜWA thsü na küsahthuo, thi akütso kütsü vi khurü naveh, thi mari tü VÜWA vü küphrahzhuri sanü jümari sazhunaveh

²²Thi VÜWA nüh Egypt kürhie naveh, kürhie naveh thi sakümhietü naveh, thi mari tü VÜWA vü sühle ru naveh, thi ma nüh mari zhiekekükhuo vü kükhetü nü mari sakümhietsü naveh.

²³Jüma rülo vü Egypt vünüh Assiria küju alerü küsü peh naveh, thi Assiriari nüh Egypt vü ru naveh, Egyptri nüh Assiria vü wa naveh, thi Egyptri nüh Assiria sie nü khurü naveh.

²⁴Jüma rülo vü Israel tü Egypt thi Assiria sie rü kücheawa sanaveh, azhih azavü akütsia küsü sanaveh,

²⁵VÜWA nüh mari vü tsiatsü taji, “Eh nyi Egyptri, eh ke nüh küsa Assiria thi Israel eh kawa ti kütsia küvüwa saluo,” ti küza.