Read Pochuri Naga ISAYA 2 Bible Online

ISAYA 2 - Pochuri Naga bible

ISAYA 2

¹Amoz atsa Isaya nüh Judah thi Jerusalem kenüh küngu azhü.

²Rülo asehkhe vü thuoüji VÜWA zheh aküzhiwa tü, aküzhi kümsietsari üta vizhu naveh, thi küzhihori nyieh vünüh sakümsiem naveh; thi akuoküji aveh tü jümawa vü li naveh,

³thi anyiri hozake ru taji: “Raluo, hiri kürü VÜWA aküzhi vü wa ünüh, Jacob Saküüwuowa zheh vü; jüti sanü ma nüh ma lehkhujiri vi hiri küüsosie naveh, thi hiri tü ma lekhujiri vü tse naveh,” ta küza naveh, küpakenühnyunü Zion vünüh Khonyowa tü shuwa na küveh kenüh, thi Jerusalem vünüh vüwa zhü tü shuwa na küveh kenüh

⁴ Ma nüh akuoküjiri azhievü ashih sanaveh, thi mari tü mari nyusuori tü mieshüm khuri vü küüfe naveh, thi mari tü jümara aviri tü, atsuonaküjehpuke küükhori vü hake naveh; akuoküji küsü nüh akuoküji küsü vü, anyuchuwa kükhakewa nyu, nyutü mari tü arie küsü nga küthsüwa nyuthuoh

⁵O Jacob azheh, raluo, VÜWA küwie vü tse ünüh,

⁶küpakenühnyunü noh nüh noh nyiri kuleja kümthuoh kenüh, Jacob azhehwa, küpakenühnyunü mari tü zhietü wuovü nüh, mahtsazhü küphrari proküm kenüh thi Filistinri kümjie nyiaza zhüküphrari pro küm kenüh, thi mari tü alienyiri sie ake küsirü kenüh.

⁷Mari zhih tü rakasa thi suna nüh pro, thi mari künyirhie küsathe tü küpote münyie luo; mari zhih tü arawuh nüh pro, thi mari rawuhkheka tü küpote münyie luo.

⁸Mari zhih tü anguori nüh pro; mari tü mari ke nüh küsari vü küngietsuotsuoti, mari tüjüri nüh küsari vü küngietsuotsuoti.

⁹Jükenüh anyiri tü rünyiem, thi anyiri tü vikütsuom, mari nomja nüh sam!

¹⁰ Alokrü lovü tu luo, thi azhihlo vü küthi luo, VÜWA kükrüküngo atüvü nüh, ma küzü kütholahthovü vünüh.

¹¹Anyura kürhiezarhiechi nothari tü vi küsajim naveh, thi anyira kürhiezarhiechi tü sakürünyiem naveh; thi jüma rülo vü VÜWA mpa saküümnyie sanaveh,

¹²küpakenühnyunü akükhratsara VÜWA tü, kürhiezari vü thi khake nü kütseri vü, rülo küsü pehküveh kenüh, tokekütseri thi kümsieri kenüh rülo küsü pehveh;

¹³Lebanon vü müsethsoh ri aveh vü, kümsie thi saküütokeri; thi Bashan vü anguzheri aveh vü;

¹⁴aküzhi kümsieri aveh vü, thi küzhiho toke küvehri aveh vü;

¹⁵Khajie kümsie aveh vü; thi azie sakümzho küsari aveh vü;

¹⁶Tarshish juhieri aveh vü; thi asie küzü aveh vü rülo küsü pehveh.

¹⁷Thi anyira Kürhiezarhiechi tü rünyiem naveh, thi anyira kürhiezarhiechi tü asaji vü vimtü naveh; thi jüma rülo vü VÜWA mpa wie nüh sakümsie naveh.

¹⁸Thi anguori tü rakümtsem naveh.

¹⁹Thi anyiri tü alokrüra lopie lovü, thi azhih küpie lovü tetu kheh naveh, VÜWA kükrüküngo atüvü nüh, thi ma küzü kütholathovü vünüh, azhihwa saküümzho nta küsüra vü.

²⁰Jüma rülo vü anyiri tü mari rakasa anguo thi mari suna anguori vehjakhehm naveh, jümari tü mari nüh khurü nta mari müpa nüh küsa, aphrühie thi ahulari vü sakütsü,

²¹alokrüra küpieku lovü thi aloh kühahkhera lokhe vü totu naküsa kenüh, VÜWA kükrüküngo atüvü nüh, thi küzü kütholathovü vünüh, azhih saküümzho nta ma nüh küsühra vü.

²²Anyaku lovü arütho tüküveh anyiri vünüh sühlete waluo, küpakenühnyunü ma tü mowa küchieke pehveh lo?