Read Pochuri Naga ISAYA 21 Bible Online

ISAYA 21 - Pochuri Naga bible

ISAYA 21

¹Ajuhküji reza kenüh zhü kütsü. Negeb vü nyiazamrhüri nüh rhühküwa üta, jüma tü küpohu vünüh ru, kükrüküngo azhih vünüh.

²Kümohtsa kükho küsü hi vü küza; prüküviri nüh prüviviti, thi küzorieri nüh zorierieti. Tse khru luo, O Elam, mükiele luo, O Media; ma nüh saküümnomna aveh hi nüh saküramthuoh.

³Jükenüh eh küzo tü amüsheküna nüh promthuoh; kümnomna nüh hi retemthuoh, nyimzari atsaküna vü kükho kümjie; hi nüh küngie tetsuo jüta thuoüji hi tü mükünara nüh sana küsa kenüh, hi tü luovehzamthuoh, jüta thuoüji hi tü küngurawa nyu.

⁴Eh müshe tü küraküpremthuoh, kümzhoh nüh eh züh saküngemthuoh; küthohrie hi nüh kümnguwa tü eh kenüh khekhetaküüshü satewathuoh.

⁵Mari nüh toküsape küche, mari nüh aphori shie, mari tü tsa, thi zhu. Süraluo, O kajitsari, vüjuh viajohuo thse luo!

⁶küpakenühnyunü VÜWA hakümjie hi vü: “Wa nü künoteri küsü saluo, ma tü mowa ngu nüh ma nüh vi küüzaluo.

⁷Awieluo vünüh rawunyiri rawu rügivü kütse, rawuküzahri rügivü kütse, utri rügivü kütse, ma tü kükhakükhe nü küüna luo, kükhakükhe sheh taji,” ta küza.

⁸Thinü akünguri nüh: “Künotekhajie rügi küsü vü hi nüh tsie, O VÜWA, arülovü mükütuo wie thuoh nüh, thi rüza ajü hi nüh riekükühuope vü hitü küpe.

⁹ Thi halie, rawu rügivü kütseri tü hala tsethuo rawu rügi nyikünyinyi vünüh.” Thi ma nüh küüza, “Külumthuoh, külümthuoh Babilon tü; thi ma zhehzheri atso aveh, ma nüh azhih vü küloriemthuoh.”

¹⁰O eh mütha kürütsepe thi eh rahewa, hi nüh VÜWA vünüh mowa künara nüh, Israel Saküüwuowa, hi nüh noh vü küthsü veh.

¹¹Duna kenüh azhüle küsü. Nyi küsü nüh Seir vünüh hi ji, “Künotewa, arüza tü küthake na lo? Künotewa, arüza tü küthake na lo?” ti sa.

¹²Künotewa nü: “Arüne tsüthuoh, thi arüza nga tsethuoh. Mükütüküzü nohri nüh kürü nta thuoüji kürü luo; shele ru luo,” ti rületsü.

¹³Arabia kenüh zhü kütsü. Nohri tü Arabia kürehmoke vü nori rhonaveh, O Dedan refüri.

¹⁴Küüriehri vü ajuh viru tsüluo, alohse vi prikütseri mütu luo, O Tema zhih vü rhoküpehri,

¹⁵küpakenühnyunü mari tü anyuchuri vünüh zhüteküwathuoh kenüh, anyuchuwa shozhuküru vünüh, lawih hehküsa vünüh, thi arie küchieluo küveh vünüh,

¹⁶küpakenühnyunü VÜWA nüh hi vü hakümjie, “Akeküsie mahvi müzhenü mahvi küsü azhie vünüh Kedar kütholathovü aveh tü asekhe vü terum naveh;

¹⁷thi Kedar atsari lawihküvi kümnyie kümzho nyiri tü zülam naveh; küpakenühnyunü VÜWA Israel Saküüwuowa nüh küzakümthuohkenüh,” ti küza.