Read Pochuri Naga ISAYA 22 Bible Online

ISAYA 22 - Pochuri Naga bible

ISAYA 22

¹Hamatü kümohtsa anyuo kenüh azhüle küsü. Noh tekükhru tü mazhühnyo mowalo, nohri aveh, azheh rügiri vü,

²nohri küüjakünyasheh nyujiwa, loküzhe nyu ülo? Noh nyi rehthekümri tü anyuchuwa nüh mürehthe, nyutü ariepe vünüh müsü.

³Noh takrüri aveh tü kreta zhütewa, alawih müvi nüh mari tü revitewa. Nohri künguri aveh thuoüji revitewa kheh, ma mpa nüh mari tü kületsuo vü zhütewa wie ketünga.

⁴Jükenüh hi nüh: “Hi vünüh notheriem luo, hi tü arüthsü khieloti küshu kükrie küsam luo; eh nyira tsavühri zorieküm kenüh eh luoveh kürüzi nti küsa küüroh müsa tüm,” ti küza

⁵küpakenühnyunü VÜWA Saküüwuowa tü kümohtsa anyuowa vü nyinyaküm thi kürüzarüpuo rülo pehküveh kenüh, azieri fephuoküm thi aküzhiri vü küzieke.

⁶Thi Elam tü rawuhkheka thi rawuhnyiri sie nü shüchuku vü, thi Kir tü ajohuo müküzhute nüh sa.

⁷Nohri nüh kürükatsa anyuori tü rawuhkheka nüh pro, thi rawuhnyiri nüh akheriri vü mari kütsiepe vi.

⁸Ma nüh Judah küüzhutewa vijamthuoh, jüma rülo vü noh nüh Reza Zhehwa rietsokrüri no,

⁹thi David nyujiwa küütheleri zhiküm noh nüh ngu, thi noh nüh juhkhre lahwa ajuhri vizhuh,

¹⁰jütisanü noh nüh Jerusalem azhehri kürüh, thi noh nüh aziewa sakümzho na küsa kenüh azhehri zochiem.

¹¹Noh nüh ajuhkhre kürüwi juh kenüh azie künyi azhievü ajuküsatheku küsü sa. Thitü noh tü jüma küsawa müno, nyutü khanavü nüh jüma kürüzhewa küchiekemüsa.

¹²Jüma rülo vü VÜWA Saküüwuowa nüh akükrie thi kürümuo kenüh, alüse kümtse thi tsakie vi tseke;

¹³thi halie, loküzhe thi aloküwie, shüvotsa sühthe thi nyihzhü fethe, asa tsa thi akhah zhu, “Hiri tsa thi zhu ünüh raluo küpakenühnyunü hiri tü thuotü süm na thuoh nüh,” ti sa.

¹⁴A VÜWA nüh ma mpa eh khüna vü küthsü küngumthuoh: “Nohri müjie küsü küju nü künakhie hamatü nomjara,” ta VÜWA Saküüwuowa nüh küsa.

¹⁵Kümsietsa VÜWA Saküüwuowa nüh, raluo, alieküno, hama vü waluo, Shebna vü, azheh alüwa, thi ma vü:

¹⁶Noh tü hala mowa sa nti thi thawa nüh hala noh sieru taji noh mpa noh kenüh arüku phie lo, noh kümsie vünüh arüku küphiewa, thi noh mpa noh kenüh alokrü vünüh küpehpe kühoukewa?

¹⁷Halie, VÜWA nüh noh vi akükhra anyiwa. Ma nüh noh shote nü küjephoke naveh,

¹⁸thi noh shoh küzülezüza naveh, thi saküüzhierü küsükümjie azhih kümza vü vija naveh, thi jüla nüh noh rawuhkheka küzhu sanaveh, noh vüwa azheh saküüzükrüwa.

¹⁹Noh müpezheh vünüh hi nüh noh müzhuthem naveh, thi noh shohjam naveh.

²⁰Jüma rülo vü hi nüh Hilkiah atsa Eliakiam eh siepewa ji naveh;

²¹thi hi nüh noh kruzhu küühawa vi ma küzhutsü naveh, thi noh kütsekevüh vi ma tseketsü naveh, thi noh akükhrawa ma ke vü phraketsü naveh; thi ma nüh Jerusalem vü rhoküpehri thi Judah zhehlora apa küsü sanaveh.

²² Thi hi nüh ma safü rügivü David zhehlora lepie küsa vü thsetsü naveh; ma nüh saküm vü nyi küsü nga nüh mükhe ra; thi ma nüh kheküm vünüh küsü nga nüh müsa ra nüh sam.

²³Thi hi nüh azhie küütoh küsü vü kümchi küsü kümjie ma zekem naveh, jütisanü ma tü ma pa zhehlo vü küchiekürhe kükajipeküsü sanaveh.

²⁴Thi mari nüh ma rügivü ma pa zhehlo küüzho aveh haketsü naveh, atsatoriwa thi shuküru, küfüküjuh kütazütara aveh, ahuori vünüh wa küfüri küju aveh.

²⁵Jüma rülo vü, ta ashiejira VÜWA nüh, azhie küütoh küsü vü kümchi zephoke küsawa tü vijam nathuoh; thi jüma tü rehjam nü tsuotsatewa na thuoh, jütisanü akhuo jüma rügivü küpehwa tü vijamtü naveh, küpakenühnyunü VÜWA nüh küzakümthuoh kenüh.