Read Pochuri Naga ISAYA 24 Bible Online

ISAYA 24 - Pochuri Naga bible

ISAYA 24

¹Halie, VÜWA nüh azhihwa tü küümsüjam naveh thuoh thi küüzoküzam na thuoh, thi ma nüh azhi atsowa tü saküüpam naveh thi ma nyieh nü rhoküpehri saküvoriem naveh.

²Thi jüma tü anyiri vü üta, navüwa vü nga jüüta sanaveh; tükhawa vü üta, ma vüwa vü nga jüüta sanaveh; siepevühwa vü üta, aküzhuwa vü nga jüüta sanaveh; aküsüwa vü üta, aküzhuwa vü nga jüüta sanaveh; aküphrewa vü üta, ashewiküvüwa vü nga jüüta sanaveh.

³Azhihwa tü kümsieja khehm naveh thi jakümsü khehm naveh; küpakenühnyunü VÜWA nüh azhü hama küüza kenüh.

⁴Azhihwa tü külu thi wazhü vehthuoh, azhihnyiehwa tü saküthasü thi wazhü vehthuoh; atülüri tü azhihwa nga sie nü thasü vehthuoh.

⁵Azhihwa tü ma kükhu vü kürhori vünüh saküümne vü pehmthuoh; küpakenühnyunü akhonyori vüriemthuoh azhühkheri wusa wuriehmthuoh, küsuokürho kütsathuowa zokhumthuoh.

⁶Jükenüh kümzü küsü nüh azhih shohriemthuoh, thi ma rügivü rhoküpehri tü mari künakhie kenüh münomnamthuoh; jükenüh azhihwa rügivü rhoküpehri tü rothemthuoh, thi anyi pike müpa nüh küükhesa.

⁷Akhah tü saküükriekrieti, rhelivirhu tü wazhü vehthuoh, luoveh vü loküzheri aveh tü sahzhile khehvehthuoh.

⁸Akruokruo külozhelokukhi küzohmthuoh, loküzhe jikhi tü lemthuoh, topito külozheloku küzohmthuoh.

⁹Mari tü azah sanü akhah müzhu le wie thuoh; kümzo küzhuvüh tü aküzhuri kenüh khatewa.

¹⁰Kürzarüpuo nyujiwa tü zoriejamthuoh, azheh aveh tü khe khehm nü nyi küsü nga mükütura samthuoh.

¹¹Akhah mükünyie kenüh ale vü azhüzie tsethuoh; loküzhe aveh tü ma münüleh jumthuo; azhihwa aloküwie tü zheküzemthuoh.

¹²Anyujiwa vü küüzoküza samthuoh, akheriri tü ferieferie khehmthuoh,

¹³küpakenühnyunü azhih azhie vü tü akuoküjira azavü jüüta vüvüh samwienathuoh, Olive rhu avi kürho üta, rhelivi lam nü amahse küphah üta.

¹⁴Mari nüh jikhi zie kümsie, mari tü loküzhe kenüh azah reihi; VÜWA küsieke rügivü nüh mari tü zhietu vünüh zie.

¹⁵Jükenüh zhieshu vünüh VÜWA vü kütholathovü tsü; juhküji nato vünüh, VÜWA, Israel Saküüwuowa anyo vü.

¹⁶Azhih küpohteri vünüh hiri tü küsiake zahri künara, künyitsawa kütholathovü. Thitü hi nüh, “Hi tü thasümthuoh, hi tü thasümthuoh. Hi tü amngu küümsümluo! küpakenühnyunü aroküshiri tü aroshi nü sa, aroküshiri tü aroshi sheh nüh samthuoh,” ti küza.

¹⁷Kümzhoh, küpieke, thi kütievüh tü noh rügivü peh veh, O azhih vü rhoküpehri!

¹⁸Thari nüh kümzhoh jikhi vünüh zhütewa nüh, jüma thuoh üji küphieke lovü küluke naveh, thi küpieke lovü nüh mürizhu teküwa wa thuoüji akütie vünüh küza naveh, küpakenühnyunü atülü mürhülehpieri tü samthuoh, thi azhihwa ajupe tü khekheta küshü veh.

¹⁹Azhihwa tü zokhuoriemthuoh, azhihwa tü müzükhririemthuoh, azhihwa tü küzhükhuomthuoh.

²⁰Azhihwa tü kümsheri kümjie puolepuozamthuoh, aphrü küsü kümjie kelekezamthuoh; ma küphrürie tü rügivü küzho nü pehmthuoh, thi külum nü müsürara le nüh samnathuoh.

²¹Jüma rü lo vü VÜWA nüh atülü shiejiwa kümnomna tsü naveh, atülü vü, thi azhihwa kajiri, azhih rügivü nüh.

²²Mari tü aküsiküsari üta küphieke küsü lovü kürü sehzhu naveh; mari tü küsizheh lovü khekem naveh, thi rülo hozake asevü nüh mari kümnomna tsü naveh.

²³Jü thuoüji asa tü sakürüzam na thuoh, thi arienyi tü zükrüm na thuoh; küpakenühnyunü VÜWA tü Zion küzhi rügi vü thi Jerusalem vü ti kükaji sanaveh thi ma kükhruori atü vü ma kütholathovü küthsüküngu tsü na küveh kenüh.