Read Pochuri Naga ISAYA 29 Bible Online

ISAYA 29 - Pochuri Naga bible

ISAYA 29

¹Halie, Ariel, Ariel, David nüh kürünape küsa nyujiwa! Amahvi vi amahvi thsephe luo; akhuri tü ma mari kümkiele vü küüzhü luo.

²Tü hi nüh Ariel müshe sakümnomna tsü naveh, jütisanü lorü thi rümuo naveh, jüti küsa vü ma tü hi vü Ariel küsü kümjie sanaveh.

³Thi hi nüh kürünape sa noh mükiele naveh, jütisanü khajieri taji noh mükieke naveh thi hi nüh noh vü mükieshe küm küüroh sakem naveh.

⁴Thi azhih aküsheh vünüh noh tü azhüphra naveh, azhitho kükhu vünüh noh zhüri tü shuru naveh; arüzhe jikhi kümjie noh jikhi tü azhih vünüh shuru naveh, thi noh zhüküphra tü azhitho vünüh hi eh pa azhühzhe zhu naveh.

⁵Thitü noh noküümara shieji tü azhitho kümnye kümjie wie naveh, thi mükünyishi ra shieji tü akuh ru kari küwa kümjie sanaveh,

⁶noh tü VÜWA nüh pharu naveh, atsoküshi mükhrüküzhü thi jikhi küji vünüh, nyiazamrhü thi tsomrhü vünüh, thi tsoküüra anyihzhu vünüh.

⁷Thi Ariel sie küsaluo akuoküjiri ashiejira aveh, ma sie küsaluo aveh thi ma shieku thi ma müshe saküümnomna tü, arüza vü kümohtsa amoh küsü kümjie naveh.

⁸Kürüma nyiküsü nüh tsavehta amoh motaji rüma nü küsühra vü mükümwa üta, nyutü küüriehri küsü nüh zhu taji moh nü thasü taji sühra, tü ma küürieh samküra nüh küsa üta, Zion küzhi sie küsaluo akuoküjiri aveh ashieji nga jükümjie sanaveh.

⁹Nohri mpa nüh zhehphrozhenyie luo thi küzhephrozhenyie vü pehluo, nohri mpa nüh küju luo thi küüju vü peh luo! Müshe luo, tü akhah küzhu vünüh müsa tüm; puolepuoza luo, thitü kümzo küzhu vünüh müsa tüm!

¹⁰ küpakenühnyunü VÜWA nüh nohri rügi vü küzehmophoke sietse küsü küshoke taji, nohri notha kümamthuoh, setsaküthsüri, thi nohri lü tiehmthuoh, tümari.

¹¹Thi kümohtsa hamari aveh tü nohri nü fete küm lasipha küsüazhüri kümjie wiethuoh. Nyiri nüh jüma küchiera nyi küsü vü, “Hama chie luo,” ti küza. Ma nüh, “Hi tü müchie ra, küpakenühnyunü jüma tü fete kümthuoh kenüh,” ti küza.

¹²Jüti küüza vü mari nüh anyi müküchiera wa nü lasiphawa kütsüvü, “Hama chie luo,” ti küza, thinü ma nüh, “Hi nü müchiera,” ti küza.

¹³ Thi VÜWA nüh: “küpakenühnyunü anyi hamari tü mari vi nü shenyithi mari pomie vi hi chierhe, mari luoveh thuoüji hi vünüh kietuo, thitü mari nüh hi kükrü thuoüji nyiri nüh kümuomuo vünüh azhükütsü küsü;

¹⁴ jükenüh halie, hi nüh anyi hamari sie nü kükrüküngo zanyori sahü naveh, aküngo thi kükrüküngo; thi mari küthsüyiri zanyoküthsü tü pokahm naveh, thi maküthsüri tü küthim tü naveh,” ti küza.

¹⁵Mari zhüphiekütsü VÜWA vünüh küthi küsheh kütseri tü kümhie küsara kütsüna, aküzo vünüh küürohri thi mari nüh, “Thawa nüh hiri ngu veh lo? Thawa nüh hiri thsü veh lo?” ta küza veh ünüh.

¹⁶Nohri tü azanyori khamlele mümüti! aküfüküsawa tü anyisa üta jinaveh ülo; zanyo saküsari nüh ma küsawa vü, “Ma nüh hi müsa,” ta küza mühie veh ülo; nyutü zanyo küsazhuwa nüh ma küsazhuwa wa vü, “Ma thuoüji küthsükümshi münyie ta küza mühie veh ülo”?

¹⁷Tsotho pike azhie Lebanon tü avi khielota küpe azhuh küsüsana ta küsa müjie ülo, thi avi khielota küpe azhuh tü areza küsü sam na ta küsa müjie ülo?

¹⁸Jüma rülo vü kürüpori tü lasipha küsü azhüri künara naveh, thi kütsozo vünüh notha küüjuri tü ngu naveh.

¹⁹Kürünyiri tü VÜWA vünüh loküzhe kürüthe ngu naveh, thi anyira azavü kümkhuori tü Israel kümtsewa vünüh rietsi naveh,

²⁰küpakenühnyunü mükünyishi wa tü zanyoküsü nga müküngu vü terunaveh, thi küriesarienyiri tü münyie nüh sam na thuoh, thi kümsü sa nta noküvehri tü vijam naveh,

²¹thawa nüh azhü küsü nüh anyi küsü alomküra küüsasati, akheri vünüh nyuri mükülehkütsüwa kenüh küjurü küsü sakhe sa veh, thi kürütso kükhuowa mlele taji awuhleh vü küpehwa saküürelemümti.

²²Jükenüh VÜWA nüh hakümjie küza veh, Jacob zhehlowa kenüh Abraham kürhesawa nüh: “Jacob tü küzükrü le wa nyu thuoh, ma nyieh tü mzhiteküwale wa nyu thuoh,

²³küpakenühnyunü ma nüh ma tsari küngu vü, eh ke nüh küürohwa, ma zavü, mari nüh eh nyo sakümtse naveh; thi Israel Saküüwuowa vü rüzhekrü nü tsü naveh.

²⁴Thi sietse vü zih kümri tü küthsükümshi vü ru naveh, thi küjakhujazhiri tü küsüphie vira naveh.