Read Pochuri Naga ISAYA 3 Bible Online

ISAYA 3 - Pochuri Naga bible

ISAYA 3

¹Küpakenühnyunü halie, VÜWA, kükhratsa VÜWA tü Jerusalem thi Judah tivitewa na saküveh kenüh aküpeh thi akütsü, alohse küpeh ajü, thi ajuh küpeh ajü;

²anyi akükhrawa thi arienyiwa, alesawa thi setsaküthsüwa, mah tsazhüküphrawa thi kükhruowa,

³tünyiekera zhezhiwa, thi mümsiesierhü nyiwa, zhüphiekütsüwa thi küsathsü kümahtsa wa thi nyuri mshekürevü roküthsüwa.

⁴Thi hi nüh vizanguori vi mari kajitsari küsanaveh, thi kürünyiri nüh mari nyiehvü takrü küsanaveh.

⁵Thi nyiri küsü nüh küsü mürü naveh, anyi aveh nga ma füwa thi anyi aveh nga ma zhephruwa mürü naveh; vizari nüh kükhruori müra naveh, thi akhuji vü küpe afüwa nüh küchiekürhewa müra naveh.

⁶Nyi küsü nüh ma pa zheh vünüh ma nü shohte taji: “Noh tü athsü pehveh; noh nüh hiri sierhüwa sanaveh, thi sammsü küm hamatü noh takrü kükhu vü peh naveh,” ti küza;

⁷jüma rülo vü ma nüh küza zhu taji: “Hi nüh thuoüji saküümhiewa küsawa nyu; heh vü tü alohse nga nyutü athsü nga münyie luo; noh tü hi vi nü anyira sierhü küsawa nyu,” ta küza naveh,

⁸küpakenühnyunü Jerusalem tü ajihmshümthuoh, thi Judah tü külukümthuoh kenüh; masü azhüküphra vünüh thi mari küürohkülih vünüh VÜWA sie wuluo kümthuoh kenüh, ma kütholathovü küpeh nyie taji.

⁹Masü kümrhümze povüri nüh mari wuluom thuoh, sodom kümjie mari kükhiemuo tü zhüchüm thuoh, mari nüh jüma müküthi nüh santhuoh. Masü vü ngukümsü luo! küpakenühnyunü masü mpa nüh masü anyiehvü kümsü viküruthuoh kenüh.

¹⁰Jümatü masü kenüh mühie naveh ti künyitsari vü küza luo, küpakenühnyunü mari tü mari ke nüh küsa aviri tsana küvehthuoh.

¹¹Kümsüküsari vü küpokamluo! Jümatü ma vü na naküveh kenüh, küpakenühnyunü ma ke nüh mowa sanüh jümawa ma vü satsü le naküveh kenüh.

¹²Vizari nüh eh nyiri mürüm, thi nyimzari nüh mari nyieh vü takrü sa veh. O eh nyiri, noh sierhüri nüh nohri küjomsü veh, nohri lekhujiri sakürüzamtü thuoh.

¹³VÜWA nüh kükhrathse nta mape vikemthuoh, ma nyiri ashih sa nta tsievehthuoh.

¹⁴VÜWA nüh ma nyira kükhruori thi kajitsari sie nüh ashih lovükuotuthuoh: “Rhelivizhuh zorieküm tü nohri nüh, kümkhuora zhi viteküwari tü nohri azheh vü pehveh.

¹⁵Eh nyiri zonya nta küsa tü mowa zhünyo lo, kümkhuora anyie kürenya taji?” ta VÜWA Saküüwuowa[1] nüh küza veh.

¹⁶VÜWA nüh küüza: küpakenühnyunü Zion tsavühri tü rhiezam thi aku khroke nü tsem, mari notha küphra nü vingüsheh taji, mari nüh küwa vü sakütsa taji, mari khihzakhi khu taji;

¹⁷VÜWA nüh amavüh vi nü fe naveh Zion tsavühra lü, thi mari küüzhe rüleri vü VÜWA nüh saphieküngum tü naveh.

¹⁸Jüma rülo vü VÜWA nüh mari kürükhih saküüte, asuonyiri thi azhokari

¹⁹akeruori, akhihri, aku küüzhuvühri,

²⁰alüküütehvühri, thi akhiri;

²¹tsükie tüjükheri thi nyaku tsükieri,

²²akhu kruzhuri, ake nüh küsohchükhuri;

²³nyikünovühri, thsünyawari, külohzülo thsünyawari, alüweri, thi anyiehkütietethsüri vijakhehmtü naveh.

²⁴Arheküngu müthoh vünüh aküprü tsü naveh; thi kütsekevüh müthoh vünüh ali tsü naveh; thi alüshe kümhie müthoh vünüh alükümtse tsü naveh; thi künyirhie thsümnyi müthoh vünüh atsahkie tseketsü naveh; aküzü müthoh vünüh küzükrü tsü naveh.

²⁵Noh nyiri tü anyuchuwa vünüh külum naveh thi noh nyi akükhrari tü ariepe vünüh külum naveh.

²⁶Thi Zion kheriri tü külu thi shükheke naveh; zoriekhem taji, ma tü azhih vü shupeh naveh.