Read Pochuri Naga ISAYA 30 Bible Online

ISAYA 30 - Pochuri Naga bible

ISAYA 30

¹“Azhü mküüna tsari kümhieküsara kütsüna,” ta VÜWA nüh küza, “mari tü rüzhe nüh sa veh, thitü eh ro nyu; thi mari tü kütsarü küsü sa, thitü eh sietse azhih nyu, jütisanü mari tü kükhiemuo vi kükhiemuo thsephe na küsa kenüh;

²mari tü Egypt vü tsuo nta tsezhu, eh küzhüphie müküna nüh, Faroah künyuote vünüh kümnyipe vi na küsa kenüh, thi Egypt küükhe vünüh kütote phah na küsa kenüh!

³Jükenüh Faroah künyuote nohri küzükrü sam naveh, thi Egypt kütote kükhu vü nohri sakürünyiem tü naveh,

⁴küpakenühnyunü ma küjiri tü ma mpa nüh Zoan vü peh wie ketünga thi ma zhüleküvüri Hanes jum wie ketünga,

⁵makeri’a nüh akünyia samkütsüra nyiri kenüh aveh nga zükrümthuoh, küükra thi akünyia vi müru nüh küzükrü thi saküüzükrü viküruri,”

⁶Negeb samwa kenüh azhüle küsü, küsüro thi amüsheküna azhih küsü vünüh, khievü nüh amiewuowa awie thi amiewuowa avo ru nüh, areji thi aresü küprüwa ru nüh, mari tü mari künyirhie rawuh küzahwa rügi vünüh vü, thi makünyirhieri ut künyiehvü rügivü nüh vü nü makeri nüh akünyia samkütsürari vü wa,

⁷küpakenühnyunü Egypt küükra tü amemkünyie thi kürütso wie, jükenüh hi nüh ma vü, “Rahab toke küpehwa,” ti ji,

⁸Tinü khinyi wa luo, mari atü vünüh jüma alopuo küsü rügivü rhüke luo, thi lasipha küsü lovü rhüke luo, jüma tü kürule tsotho vü kenüh küsuokürho povü küsü sanaveh,

⁹küpakenühnyunü mari tü azhümküüna nyiri atsa akürieri, VÜWA küsüphie küna na müküsa atsari;

¹⁰setsazhüküphrari vü, “Müno tümluo,” ti küza; hiri vü setsaküthsüzhü müza tüm; hiri vü azhü küünazüri phrahte luo, akürie setsaküthsüzhü phrahte luo,

¹¹aleh küpie luo, lekhuji vünüh anato vü tseke luo, hiri tü Israel kümtsewa zhüku müküna le tümluo, ti küza.

¹²Jükenüh Israel kümtsewa nüh hakümjie küza veh, “Nohri nüh azhü hama ma küm kenüh, thi kümrü thi küreletewa alehnom, thi jümari vü rüngakem;

¹³jükenüh künakhie hamatü nohri vü azie kümsie küsü vü akükuo, pou zhu, poum na sa küveh, jüma küülokhuo tü zhürüluo vünüh ru, küsükeri vünüh,

¹⁴thi ma kükuo tü zhihküfü küsara küfü kükuo kümjie jüma tü azhümzhü tsatsa wie thuoh nüh zokhuoriejam, zokhuonyah küm azhievü kükuorie vi nü nyitsope vünüh anyih küüravüh sana küsa nyutü afüji lovü nüh ajuh tiezhu na küsa nga müngura,” ti küza,

¹⁵küpakenühnyunü VÜWA Saküüwuowa, Israel kümtsewa nüh hakümjie küza veh, “Küshele thi kümnie vü nohri tü külera naveh; zota küpeh thi alehküno tü nohri sakükhrara naveh,” ta küza. Thi nohri nüh ma naveh,

¹⁶thitü nohri nüh, “Nyu! Hiri thuoüji rawu rügivü nüh zhütewa naveh,” ta küza naveh, jükenüh nohri tü zhütewa naveh; thi, “Hiri tü rawouh küzhücha rügi vünüh zhütewa naveh,” ta, jükenüh nohri küzheri tü zhü mühie sheh naveh.

¹⁷Nyi küsü nüh saküükrüvü anyie küsü zhütewa naveh, nyi münga nüh saküükrü nohri tü müjie küükhe küju nü zhü naveh aküzhi rügivü thsoshithsü athsoh kümjie, küzhiho rügivü thsoshi küsü kümjie.

¹⁸Jükenüh VÜWA tü nohri vü lozhisheh nta huo veh; nohri vü noküümze kütsa nta ma mpa nüh sakümsiesieti, küpakenühnyunü VÜWA tü kümsho Saküüwuowa; ma kühuori aveh thuoüji akütsia küvü tsari.

¹⁹Ah, O Jerusalem vü kürho Zion nyiri; nohri tü kükrie lewa nyu thuoh. Nohri nüh küzie jikhi vü ma tü nohri vü lozhisheh wie naveh; ma nüh jüma künara vü, ma nüh nohri rületsü wie naveh

²⁰Thi ma mpa VÜWA nüh mkünongü lohse thi kümnomna ajuh vi nohri tsü wie nga, nohri küsosiewa tü ma mpa nüh küüthi le wa nyu thuoh, thitü nohri notha tü nohri küsosiewa ngu naveh.

²¹Thi nohri khüna tü nohri ase vünüh azhü küsü künara vü, “Lehkhuji tü hama thuoh, jüma vü tsetu luo,” ta küza naveh, nohri nüh azhie wuovü küüreke vü nga nyutü nohri nüh azhu wuovü küüreke vü nga.

²²Jüta thuoüji nohri tü nohri rakasa küsote atsonyie kükhrükeri thi nohri suna akhu atsonyie külüri sakümnem naveh. Nohri nüh jümari tü mükümtse zanyori üta zhuhriem naveh; nohri nüh jümari vü, “Tewaluo,” ta küza naveh.

²³Thi nohri nüh azhih vü mahtsü küzhuhwa kenüh ma nüh atsohrütsü naveh, azhih vünüh küngura tü nyirhie thi zhisheh naveh. Jüma rülo vü nohri ase-ashuhri tü are khielota peh nü mühuo naveh;

²⁴thi shüvotsari thi rawuhküzahwa azhih kükhahouri tü amütsü küthse ashie, küüzhievüh thi asüha nüh heküümtse tsanaveh.

²⁵Thi khielota kürehthe rülo vü thi akhajieri küpruo vü aküzhi küürügi aveh rügi vü thi küzhiho kümsie aveh vü akuza juh li naveh.

²⁶Jümpa mkünyu asa küwie tü rünyi küwie üta sanaveh, thi rünyi küwie tü jüma nyiehvü nüh türükeri naveh, rülo türü aküwie üta, VÜWA nüh ma nyira aküna küriete, thi kümsamna kümnomna ma nüh fe kütsü saküüku rülo vü tü jüta sanaveh.

²⁷Halie, VÜWA nyo tü kületsuo vünüh ru veh, ma rükümtho vünüh tso, thi anyikhu aküsa vünüh shukütse; ma pomie tü rükümtho nüh pro, thi ma mizhi tü tsoküüra anyih küsü kümjie;

²⁸ma rütho tü akuza külichü küsü kümjie jüma tü wa nü aku vü ju veh; küzopriezosa huothaji vi nü akuoküjiri rüzhi naveh, thi ma nüh anyira khakhe vü kükhazih nyakuoli thsetsü na küsa kenüh.

²⁹Arüza vü kümtse akhu küsa üta nohri tü azah küsü peh naveh; thi aloküwie luoveh, nyiküsü nüh VÜWA küzhi, Israel Lokrüwa vü wa nta küsa vü pilechu jikhi vü tsezhu küwa üta.

³⁰Thi VÜWA nüh ma kümsie jikhi sa küüna naveh thi ma pie thsuo küturu khielota arüküshu vünüh thi anyih zanyokütsorie nyihzhu küsü, tsomrhü küsü, thi arazhi kütsa ngu naveh.

³¹VÜWA nüh azhietsü nüh vi küürhie vü Assiriari tü ma jikhi nüh sakümzhoh küüngothse naveh.

³²Thi VÜWA nüh mari vü kümnomnakütsü rükütsüh küürhie aveh tü akruokruo thi topito jikhi sanaveh; ake küro nü arie sataji ma nüh mari sie saluo naveh,

³³küpakenühnyunü akütso pe tü khana vünüh küchemthuoh; ah, jüma tü kajiwa kenüh sa küchemthuoh, ma kütsope tü sa küsheh thi kümza sa veh, anyih thi athsoh thseküpro saveh; VÜWA rütho nüh anyih kümjie jüma tsotsüveh.