Read Pochuri Naga ISAYA 31 Bible Online

ISAYA 31 - Pochuri Naga bible

ISAYA 31

¹Kümhiera kütsüna, Egypt vü küükra kenüh küwari, rawuhri lehkünori vü, rawuhkhekari vü lehkünori vü küpakenühnyunü jümari aküzhi kenüh, thi rawuhnyiri vü lehküno kenüh, küpakenühnyunü jümari tü müzho küm kenüh, thitü Israel kümtsewa nü müno nyutü VÜWA müshe mküünari!

²Thi jütawie ketünga ma tü zanyothsü thi kümnomna viru veh, ma tü ma zhüri müvi shele, thitü sühra nü kümsüküsara zhehlo sie saluo naveh, thi künakhie küüroh küükrari sie kürünyuo naveh.

³Egyptri tü anyiri wie, Saküüwuowa nyu; thi mari rawuhri tü asazüh wie, asietse nyu. VÜWA nüh ma ke thsuozhu küru vü, kükrari tü müshü naveh, thi thawa nü kükrathuoh ünüh külumnaveh, thi mari aveh tü kürü pohkam naveh.

⁴Hakümjie küsa kenüh VÜWA nüh hi vü, Amiewuo küsü nüh nyutü amiewuo atsa küsü nüh sashie kenüh khi kükhu üta, thi nyihnyihkühuori riekhuo küsü jizhuru nü ma sie küürükhrü luo üta, tü mari nüh küzie nüh mümzhoh nyutü mari jikhi vü luoveh müzah, jükenüh VÜWA tü turu nü Zion küzhi thi ma ho rügi vünüh saluo naveh,

⁵Amüwari nü rügivü prünü noküveh kümjie VÜWA tü Jerusalem nyuote naveh; ma nüh jüma nyuote nü vizhu naveh, ma nüh jüma küse thi küloletsü naveh.

⁶Noh tü thawa vünüh kürele tewa thuoh ünüh ma vü sühle luo, O Israel nyiri,

⁷küpakenühnyunü jüma rülo vü nohri ake nüh khiemuosheh nü nohri kenüh küsari ma rakasa anguori thi ma suna anguori vijam naveh.

⁸“Thi Assiriari tü anyira zhi mükünyu anyuchu küsü vünüh külunaveh; thi anyira zhi mükünyu anyuchu küsü nüh ma kürhieriem naveh; thi ma tü anyuchuwa vünüh zhütewa naveh, thi ma nyi vizari tü vi nü wurie taji küüroh naveh.

⁹Ma lokrü tü kümzhoh vünüh karitewa naveh, thi ma küjiri tü kümzhoh vünüh arie wule wa jam naveh,” ta VÜWA nüh küza, ma nyih tü Zion vü pehveh, thi ma nyithü tü Jerusalem vü pehveh.