Read Pochuri Naga ISAYA 32 Bible Online

ISAYA 32 - Pochuri Naga bible

ISAYA 32

¹Halie, kaji küsü tü nyitsanü kükaji sanaveh, thi akhjitsari tü kümsho vünüh kete naveh.

²Küsüküsü nga amürhü vünüh küüthi azhie küsü kümjie sana, Tsomrhü vünüh küsatera kümjie, azhie küüweh küsü vü akuzari juhkümjie, küthasü azhih küsü vü alokrü küji küsü küükhe kümjie.

³Jüta küsa vü aküngura notha tü küümawa nyu, thi küünarara khüna tü künara naveh.

⁴Aküprewa müshe tü thsümshirana, thi mizhi zhüphrakükhori tü shishita azhüphra thi mütse naveh.

⁵Zanyo mküthsüri tü küthsüri ta küji le wa nyuthuoh, nyutü mizhikümsüwa tü küchiekürhe ta müküzarathuoh,

⁶küpakenühnyunü zanyo mküthsüri tü küzhehphro azhüri phraphrati, thi ma müshe tü künakhie lekhuji phaphati, mükünyitsa kürho sa nta, VÜWA küsazih phrahte nta, kürümari vü küürütsom tütüti, thi küüriehri vü aküzhu vijam tü nta,

⁷arokümsüra ro tü müsüm; ma tü küshike kümsüküsa shikeketi, akürie zhüri vi nü kümkhuori ferie nta, ma mpa nüh küthotsara kükhuo tü awuhleh wie ketünga.

⁸Thitü zanyoküthsüri thuoüji aküthsü zanyori müshezhuzhuti, thi ma tü küthsü zanyori vünüh tsetseti.

⁹Süh luo, nohri nyimzari rüziküvehri, eh jikhi künaluo; nohri loji küveh tsavühri eh zhüküza vü künaluo.

¹⁰Pike mahvi küsü anyie vünüh nohri tü kükhe naveh, nohri lojiküveh nyimzari, küpakenühnyunü rhelivi kürhozhuh tü sazihm na küveh kenüh athsohvi kümahwie tü küruwa nyu.

¹¹Khekheti küshüh luo, nohri nyimzari kürüzi vü pehküvehri, kükhe luo, nohri loji küvehri; phrehm luo, nohri mpa anyiju saluo, thi nohri küzo vü tsakie tseke luo.

¹²Azhuhri kümhie, thi rhelivi khielota küüpe na küsa kenüh nohri tüso fe luo,

¹³küpakenühnyunü eh nyira zhisa tü arüzhüri thi aluo sho zhu tetsethuoh; O, loküzhe nyujiwa vü loküzhe azhehri aveh kenüh,

¹⁴küpakenühnyunü kajizheh wa tü kulem na thuoh, anyiküüzhüh nyujiwa tü jamthuoh; küzhihowa thi akhajiewa tü küsuokürho alopie küsam na thuoh, reza rawuhküzawa loküzhe, anyihnyih shiekümrhuope küsü sam na thuoh;

¹⁵kürügi vünüh Sietsewa hiri vü müjie küüshoke küju nü, thi rezawa tü azhuh kümtsekherü müjie küsa küju nü, thi kümtsekhrü azhuhwa tü areza müjie küreza küju.

¹⁶Jütisanü kümshowa tü tsamza vü kürho sanaveh, thi künyitsa tü aviküpesheh azhuh vü küpeke naveh.

¹⁷Thi künyitsa küüro avi thuoüji zazhüküka, thi künyitsa küzhühshu thuoüji küsuokürho küüzoh thi luovehkürüzi ti küpeh.

¹⁸Eh nyiri tü zazhüküka pe küsü vü rhopena, luoveh küjipe vü kürho vü, thi luovehkürüzi tü kümnyie azhieri peh naveh.

¹⁹Thi areza tü arazhi nüh vehnyakem naveh, thi anyujiwa tü saküsaji phakem naveh.

²⁰Nohri thari nüh ajuh nato aveh vü zhuh naveh ünüh akütsiaküvüri, thari nüh shüvotsara tüwuoh thi rawuhküzahwa leja nü kütseri tü akütsiaküvüri.