Read Pochuri Naga ISAYA 33 Bible Online

ISAYA 33 - Pochuri Naga bible

ISAYA 33

¹Küzorieri, nohri kümhie küsara kütsüna, nohri zoriemüküsari; nohri aroküshishehri, nyi küsü nga noh vü aromküshiwa! Noh nüh küzoriewa leküm vü, noh tü zoriem naveh; thi noh nüh aroküshi sanü sehkhe saküm vü, noh vü aroshisheh naveh.

²O VÜWA, hiri lozhisheh luo; hiri tü noh huo veh. Rüne kürüzhu hiri apiewa saluo, küsüro vü hiri küülolewa saluo.

³Tsoküshikhi küshu vü nyiri tü teteti, noh mpa nüh noh kükhakevü akuoküjiri tü vorie te wa;

⁴akrevü nüh küsazhuh üta prüviküsari tü vizhuh saveh; ashukrie nüh küüpheke üta, anyiri tü jüma rügivü joke veh.

⁵VÜWA tü sakümsiemthuoh, ma tü kümsie vü rhoküveh kenüh; ma nüh kümsho thi künyitsa vi Zion saküpro naveh;

⁶thi ma nüh noh tsotho sakütohkütsüwa sanaveh, küülole, aküthsü thi zanyoküthsü saküwuzhi tsü naveh; VÜWA kükrü tü ma künyirhie wiethuoh

⁷Halie, luovehküzeri tü alie vünüh zie pehveh; ale sakütsüra refüri tü kriethesü veh.

⁸Ariejiri tü jakümsümthuoh, kütseshukari tü müsathuoh, kütsathuori tü kulemthuoh, apovüri tü kulemthuoh, anyira kenüh küsieke münyiethuoh.

⁹Azhihwa tü krie thi lorüveh; Lebanon tü rüza nü wazhütewathuoh; Sharon tü küpohu küsü kümjie thuoh; thi Bashan thi Karmel tü masü nyawa küzhüjamthuoh.

¹⁰“Khinyi thuoüji hi tü sühra na thuoh,” ta VÜWA nüh küza, “Khinyi thuoüji hi mpa nüh hi khake na thuoh; Khinyi thuoüji hi tü sakümsie na thuoh.

¹¹Nohri tü aguh moh nü amaguo wuozhu; noh rüthori tü nohri zoriem na küsa anyih küsü.

¹²Thi anyiri tü tso weji kümjie tsokümü üta sam naveh, rüzhü zahthuo nü anyih lovü tso küm kümjie,”

¹³Künaluo, nohri kületsuo vü küpehri, hi nüh mowa samthuoh ünüh; thi küshehnyi vü küpehri, eh kümzho thsüluo.

¹⁴Zion vü kükhiemuori tü krümthuoh; khekheta küüshü nüh mükünyitsari revimthuoh: “Hiri azhievü thawa nüh küzorie anyih sie kürho sarana lo? Hiri azhievü thawa nüh küsükürho anyih sie kürho sarana lo?”

¹⁵Nyitsasheh thi müshosheh nü phrahte nü kütsewa, kümrüra künyie kükulewa, ma ke kütheja kütsewa, athe vi üsü ta, azühküüthü zhü küüna vünüh ma khüna mürhekekütsewa thi kümsü küno vünüh ma notha sate kütsewa,

¹⁶ma tü kürügiri vü kürho sanaveh; ma küüthipe azhie tü kümzho lokrüri; ma lohse tü ma tsü naveh, ma juh tü kütoh naveh.

¹⁷Noh notha tü kajiwa aküzü vünüh ngu naveh; mari tü azhih hothake tacha küwa ngu naveh.

¹⁸Noh müshe tü kükrüküngo müsheke naveh: “Küürühwa tü khiela pehveh lo, alekhrü küütewa tü khiela pehveh lo? akhajie küürühwa tü khiela pehveh lo?” ta sanaveh.

¹⁹Noh tü anyi kümsüri küngu lewa nyuthuoh, noh nüh anyi jümari müküthsüra zhüküphra nyiri, noh nüh müküthsükümshi ra zhüküphrate küngu lewa nyuthuoh.

²⁰Zion rügi vü noluo, hiri nüh akhu kütekeküsa anyujiwa! noh notha tü Jerusalem ngu naveh, küüzoh küpehpe küsü, müküütselera juhthsü küsü, ma thsoshie tü piketü mülozhura wiethuoh, nyutü ma liri küsü nga mütuo ra.

²¹Thitü jüla VÜWA makümsiewa tü ehkeri nüh thuoh, rühku thi kuza kümza azhie küsü, jüla tü juhieküsuowa tü kühievü vi nü müwa ra, nyutü juhieküjiwa nga mükari ra,

²²küpakenühnyunü VÜWA tü hiri alesawa, VÜWA tü hiri takrüwa, VÜWA tü hiri kajiwa; ma nüh hiri külole naveh.

²³Noh li tü küjü nü küsoh vehthuoh; jüma tü ma pe vünüh athsü phete mükümzhora thuoh, nyutü juhiethsüwa shohmküta ra thuoh, jüta thuoüji küwale vünüh küka nü prüvi küsari tü küsuom nathuoh; rienyiküpriwa wie nga revi küsari vi naveh.

²⁴Thi anyuwa nyi küsü nga nüh, “Hi nü naveh,” ta küüzawa nyu; jüla kürho nyira künakhie tü noja tsü naveh.