Read Pochuri Naga ISAYA 34 Bible Online

ISAYA 34 - Pochuri Naga bible

ISAYA 34

¹O kuohjiri, küna nti, kümrheke luo, O nyiri! Azhihwa thi jüla pro küvehri aveh künaluo; azhihnyie vü thi ma vünüh küruri aveh shenyi raluo,

²küpakenühnyunü VÜWA tü akuoküjiri aveh vü lomran savehthuoh, thi mari shiejiri aveh vü arümthomthuoh, ma nüh mari küpoka vü thsem thuoh, mari fethe naküsa kenüh tsümthuoh.

³Mari rehthekümri tü jam naveh, thi mari kümotü prikümchuo shuru naveh; aküzhiri tü mari azüh nüh li naveh.

⁴ Atülü shiejiri aveh rügi vü sahou kümjie luketewa naveh. Mari shieji aveh külum naveh, rhelivi rhu vünüh awa kükre üta, ampah rhu vünüh awa kükre kümjie,

⁵ küpakenühnyunü eh nyuchuwa tü atülüri vünüh ma zhu küpromthuoh; halie jüma tü Edom rügi vü thi hi nüh küüpokümü nyiri vü ashih ashi sana thuoh.

⁶VÜWA tü anyuchuwa küsü pehveh; jüma tü azüh nüh thsesa vehthuoh, jüma tü aküthü nüh vinü thsemthuoh, nyihzhüzahri thi nyisüra küthüh züh, nyihzhüvo mükreh küthü vi nüh thsemthuoh, küpakenühnyunü VÜWA Bozra vü küsahthuoh küsü pehveh, Edom vü khielota küürhiethe küsü pehveh.

⁷Süpri vo tü mari sie külu naveh, thi avozah tü avo kümzhori sie külu naveh. Mari azhih tü azüh vi küjiem naveh, thi mari azhitho tü aküthü vi thse kümhietsü naveh,

⁸küpakenühnyunü VÜWA tü amüthoh küsa rülo küsü pehveh, Zion kenüh künoshele mahvi küsü pehveh.

⁹Thi Edom kuzari tü mkümtseju jetewa naveh, thi ma zhisa tü mührülo jetewa naveh; ma zhih tü aküju mkümtseju juphrierale tewa naveh.

¹⁰ Rüza thi rülo jüma tü künewa nyu; ma nyikhu tü küsuokürho rügi vü kuo naveh. Wouhle küsü vünüh wouhle küsü küju jüma tü kümsüjam nathuoh; sehkhesehkhe küju nyi küsü nga jüla kari küwawa nyu.

¹¹Thitü küzowa thi aküprü nüh jüla pehna khujorü thi awuo nüh jüla rhom nathuoh. Ma nüh jümawa nyievü kürüza aliwa thsom nathuoh, thi ma sierhüri vü küürüza vü thsemtü naveh.

¹²Mari nüh jüma tü jüla kajipe Münyie ta thohmtü naveh, thi ma kajitsari aveh tü zanyoküsü nga mükünyu sam naveh.

¹³Jüma shiekuri vü arüzhüri sho naveh, ma shiekuri vü akhushuri thi rüzhüri sho naveh. Jümatü rezanyihnyih shüri sam nathuoh, thi amwa küjira lojiküpehpe sam nathuoh.

¹⁴Thi samwari tü küzhunaveh, anyisari tü ma arahsü lüpuori vü zie naveh; ah, jülatü küzowa ru ka naveh, thi ma kümnyiepe küsü ngura naveh.

¹⁵Jüla khujorü tü aphra sa, rüji, khuzhu, thi ma küsa kükhu vü matsari sazhuh naveh, ah, jüla tü aluozahri tü papa wie luo vünüh sezhuh naveh.

¹⁶VÜWA lasipha vü phah nü chie luo: Hamari küsü nga müküpehküsawa nyu; küsü nga ma nyina münyie nüh küsawa nyu, küpakenühnyunü VÜWA po nüh azhütsü kümthuoh kenüh, thi ma Sietsenüh Jümari sazhuhmthuoh.

¹⁷Mari kenüh ma nüh aküze sa, ali vi küte nü ma kenüh mari vü suope küsuotsümthuoh; mari nüh jüma tü küsuokürho vi naveh, awuhle wuhle küju mari tümari lovü kürho sanaveh.