Read Pochuri Naga ISAYA 40 Bible Online

ISAYA 40 - Pochuri Naga bible

ISAYA 40

¹Luoveh sakürünyi, eh nyira luoveh sakürüünyi luo, ta nohri Saküüwuowa nüh küza.

²Kürünyi vünüh Jerusalem vü küza luo, thi ma vü zieluo ma küriesa tü jumthuo ta küsa, ma künakhie tü nojamtüthuoh, ma tü VÜWA ke vünü ngumthuoh ma kükhiemuo kenüh küütsa.

³ Jikhi küsü zie veh. “Shünyiza vü VÜWA leh küche luo, hiri Saküüwuowa kenüh rezavüvü arieji küsü sakümsho luo.

⁴Anyuo aveh tü khake kümsie naveh, aküzhi thi küzhiho aveh tü sakürünyiem naveh; azhih küükhuhwa tü saküto naveh, thi müküücho azhieri tü sakütake naveh.

⁵Thi VÜWA kütholathovü tü kütsaküngu naveh, thi nyiri aveh jüma ngu naveh, küpakenühnyunü VÜWA po nüh küzakümthuoh kenüh.”

⁶ Jikhi küsü nüh küüza, “Zie luo,” Thinü hi nüh, “Hi tü mowa zie na lo?” ti küna. Satsa aveh tü apra wie nü, thi ma küzü aveh tü azhuh vü aküwuri kümjie wie nü.

⁷Apra tü wazhütewa eh, aküwu tü tsetewa veh, VÜWA rütho jüma rügivü kümüke vü; azhütsa nyiri tü apra wie.

⁸Apra tü wazhütewa veh, aküwu tü tsetewa veh; thitü hiri Saküüwuowa zhü thuoüji küsuokürho tsie naveh.

⁹Noh tü aküzhi kümsie küsü vü tekuo luo, O Zion, zhüwa kümhie zhüwa; noh jikhi sakümsie luo, O Jerusalem, azhüwa kümhie zhüwa, sakümsie luo, mükrü tümluo; Judah nyujiri vü küzaluo, “Halie nohri Saküüwuowa,”

¹⁰Halie, VÜWA Saküüwuowa tü kükhra vi nü tse veh, thi ma pie tü ma kenüh takrü veh; halie, ma jisuo tü ma vü pehveh, thi ma noshekütsü tü ma tüvü pehveh.

¹¹ Nyihnyihkühuori küsü kümjie ma nüh ma nyihnyihra vo sanaveh, ma nüh nyihzhüzari tü ma pie vü khekezhuh naveh, ma nüh ma tüso rügi vünüh mari küruo naveh, thi azhüküzhüti atsa küsieri küjotse naveh.

¹²Thawa nüh ma ke küjehkuke lovü nüh ajuhri kütomthuoh lo, thi akha vünüh atülüri mürükemthuoh lo, azhih zhitho vi küütovüh küsü lovü thsesa thi küütevü vünüh aküzhiri küte thi küütovüh küsü lovü nüh küzhihori küte lo?

¹³Thawa nüh VÜWA Sietse jüjotsü thuo lo, nyutü ma zhüphiekütsü üta ma süphietsüthuoh lo?

¹⁴Ma saküüthsü kenüh thawa vü ma tü zaluo lo, thi thawa nüh kümsho lekhujiwa vi ma sosie lo, thi zanyoküthsü vi ma sosie lo, thi küthsükümshi lehwa vi ma kütsa lo?

¹⁵Halie, akuoküjiri tü ketsoku lovü kürütsuo küsü kümjie wiethuoh, thi küütevü rügiri vü zhitho halie, ma nüh achizhieri tü azhithori kümjie khake.

¹⁶Lebanon tü kütso thsoh kenüh küwalewa nyu, nyutü ma samwari tü kütso kükhurü kenüh küwale wa nyu.

¹⁷Akuohjiri aveh nga ma tüvü zanyoküsü nga mükünyu kümjie, ma nüh jümari tü zanyoküsü nga mükünyu thi kürütso nyiehvü nga kürütso vü kürükemthuoh.

¹⁸Thinü Saküüwuowa tü thawa kümjie ta nohri tü sana lo, nyutü mowa kümjie ta ma tü vikümjie na lo?

¹⁹Anyuo! jüma tü küürohri küsü nüh sa, thi suna küsari küsü nüh suna vi nü jüma küzhute, thi rakasa vi nü jüma kieveh satsü.

²⁰Kümkhuori tü akütsü kenüh mükümira athsoh rükakati; ma tü müküüse ra atsa sake na küsa kenüh asie küzhüri phahphahti.

²¹Noh tü müthsü ülo? Noh tü müküna ra ülo? küütü vünüh jüma tü noh vü küza müru ülo? Azhih ajupe ri vünüh noh tü müthsümshi ülo?

²²Azhih kümkieke nyiehvü shuküpehwa tü ma, thi ma küpehpehri tü ashukrieri kümjie; ma nüh küzietethsü küshohtarie kümjie atülüri shohkütarie, juhthsüzheh küsü lovü tu rho na küza kümjie jümari lerie;

²³ma nüh kajitsari tü saküpokatsüveh, thi azhih vü takrü ri tü zanyoküsü nga mükünyu üta samtü.

²⁴Mari tü zülasheh nü shie, zülasheh nü zhuh, mari rhurüzoh tü azhih lovü chake zülasheh, ma nüh jümari rügivü müünü jümari tü washütewa; thi mahkuo kümjie tsomrhü nüh vitewawati.

²⁵Thinü nohri tü hi vi thawa sie kümjie nti lo, hi tü ma kümjie sana küsa kenüh?

²⁶Kümsie vü noh notha toke nü noluo: hamari thawa nüh sa lo? Ma nüh mari shiejiwa küürüh vünüh sieru mari aveh anyo vünüh jitaji; ma kükhra küji vünüh, ma kükhra tü müzho küm kenüh küsü nga müküse.

²⁷Noh tü mokenüh, O Jacob, thi, O Israel, Eh leh tü VÜWA vünüh küthimthuoh; eh kümsho tü nyiaza nüh müchieketüthuoh, ti küza phrahte veh lo?

²⁸Notü müthsü ülo? Noh tü mükünara ülo? VÜWA tü küsükürho Saküüwuowa, azhi küpoteri saküüjewa. Ma tü müno nyutü thachu müwa, ma küthsükümshi tü mphahra.

²⁹Kümno ri vü ma nüh kümzho tsü veh, thi kükhra mükünyieri vü ma nüh akükhra saküzhi tsü veh.

³⁰Shefüri nga müno thi thasütewa naveh, thi rünguori tü ngatüm naveh;

³¹thitü VÜWA kühuori thuoüji makükhrari sakürüthe naveh, mari tü aluomüri kümjie aküsa vü nü müri kuo naveh, mari tü zhü naveh thi kümünowanyu, mari tü tse naveh thi küülowanyu