Read Pochuri Naga ISAYA 41 Bible Online

ISAYA 41 - Pochuri Naga bible

ISAYA 41

¹Küüzhe vünüh eh zhüzaluo, O souzü nato vü küperi; nyiri tü ma kükhrari saküürtheluo; mari tü küüshenyiru luo, jütisanü mari tü küüphrahte luo; ashih kenüh hiri tü kürü shenyi wa ünüh raluo.

²Thawa nüh zhieshu vünüh kükezhu lo, lekha kürüzhu thawa nüh kükhrara setu lo? Ma nüh ma tüvü akuoküjiri jamthuoh, jükenüh ma nüh kajiri mphakhu vünüh nyinyamümti; ma nüh ma nyuchuwa vi nü azhitho kümjie mari satsütsüti, amaguo kümjie ma lawi vi sariemümti.

³Ma nüh mari zhe nü kütote vünüh tsewawati, lekhuji ma mpha tü münyite.

⁴Thawa nüh hama salo, küütü vünüh awuhleri ji taji nü? Hi VÜWA, apowa, thi sehkhewa; hi tü ma.

⁵Souzü nato vü küperi tü ngu taji krütewa, azhih küpoteri tü khekheta küshü; mari tü shenyi nü tseke ru.

⁶Aveh nga papara zhephrou kükra, thi ma nüri vü, “Luoveh ji luo,” ti küza!

⁷Asieküsari tü suna küsawaluoveh saküji, thi atsüvü vi saküüzhuwa nüh amrü kütsüh nü, küütsüwa vü, “Jüma tü mühiem,” ti küza; jütisanü mari nüh zephokem nü müküüngah ra samtü.

⁸ Thitü noh Israel, eh siepewa, Jacob, hi nüh rükakümwa, Abraham tsatoriwa, eh füwa;

⁹azhih küpote vünüh hi nüh noh küvirawa, thi kületsuotsa jükeri vünüh küjirawa, noh vü, “Noh tü eh siepewa, hi nüh noh küthe müja nüh noh rükamthuoh,” ti küza;

¹⁰mükrü tüm luo, küpakenühnyunü hi nüh noh siekütse kenüh, luoveh mzah tüm, küpakenühnyunü hi tü noh Saküüwuowa küsa kenüh; hi nüh noh sakükhratsü naveh, hi nüh noh kükra naveh, eh ke azhiewuovü kükhratsawa vi nü noh shohtse naveh.

¹¹Halie, noh vü arümthoküvehri aveh tü, saküzükrü thi kürüza vü thsem naveh; noh sie küürükhrüluori tü, zanyoküsü nga mükünyu üta sam naveh thi pokahm naveh.

¹²Noh tü noh kürholuori phah naveh, thitü noh tü mari küphahrawanyu; noh sie arie küsari tü zanyoküsü nga mükünyutsatsa sam naveh,

¹³küpakenühnyunü hi tü, VÜWA noh Saküüwuowa, noh ke azhie wuovü küjehte luo; Noh vü, “Mükrütüm luo, hi nüh noh kükra naveh ünüh taküzawa tü hi thuoh,” ti küza.

¹⁴Mükrütüm luo, noh Jacob jienyu, noh Israel nyiri! Hi nüh noh kükra naveh, ta VÜWA nüh küza veh; noh kürhesawatü Israel kümtsewa.

¹⁵Halie, hi nüh noh vi nü asuowi küsü sanaveh, kürüthe, akütu, thi aha küpe; noh nüh aküzhiri rütse nü jümari nehnyam naveh, thi noh nüh küzhihori tü aguh kümjie sa tsü naveh;

¹⁶noh nüh jümari wie naveh thi amürhü nüh jümari mürhütewa naveh, thi amürhü nüh jümari sariem naveh. Thi noh tü VÜWA vünüh nyierakhruo naveh; noh tü Israel kümtsewa vü nüh tholathovü naveh.

¹⁷Kümkhuori thi küthotsari nüh ajuh küphah vü, thi küsü nga münyie nüh saküm vü, thi mari mizhi tü ajuh küürieh nü küwehphake teküwa vü, Hi VÜWA nüh mari rületsü naveh, hi Israel Saküüwuowa nüh mari kükulewa nyu.

¹⁸Kürütso kümsieri vü hi nüh arühku saphietsü naveh, thi anyuo aza vü küwuzhuri saphietsü naveh; Shünyiza tü hi nüh ajuh kümsheke küsü satsü naveh; thi azhih küüweh tü ajuwi saküshu tsü naveh.

¹⁹Shünyiza vü hi nüh akani amüse, thi Olive thse naveh; küpohu vü hi nüh athso shie naveh, aküla nga kürü thse naveh;

²⁰anyiri nüh jü ngu nü thsü na küveh kenüh, kürü müshe thi thsümshi na küveh kenüh, VÜWA kenüh hama sa ta sana küsa kenüh, Israel kümtsewa nüh saküjethuoh.

²¹Nohri ashih vizhu luo, ta VÜWA nüh küza veh, nohri kürüluo viruluo, ta Jacob kajiwa nüh küza veh.

²²Mari tü jümari küüviru luo, thi mowa sanaveh ünüh hiri vü küza luo. Tükhu vü zanyori hiri vü küzaluo, jümari tü, mowa nüh, jütaküsa vünüh hiri tü jümari müsheno naveh, jütaküsa vünüh mari küzhühshu hiri tü thsü mühie veh; nyutü runa küsa zanyori hiri vü küüzazhu naveh.

²³Hala sevü mowa ru naveh ünüh hiri vü küza luo; jüta thuoüji nohri tü nyiazari ta küsa hiri nüh thsüra naveh; kümhie sa, nyutü kümsü saluo, jüta küsa vünüh hiri tü luovehzah thi sakümzhoh na küveh kenüh.

²⁴Halie, nohri tü zanyoküsü nga nyu, thi nohri küüroh tü momasa; thawa nüh nohri rüka naveh ünüh akükre.

²⁵Hi nüh vehküsü zhietü vünüh küke, thi ma tü ru, rünyi küshu vünüh, thi ma tü eh nyo jinaveh; ma tü anyisa rügivü künyi üta takrüri nyi naveh, küfüküsari nüh anyisa kürütse üta rütse naveh.

²⁶Thawa nüh atükhu vünüh jüma küzazhu lo, hiri nüh thsü na küsa kenüh, thi küütü tsotho vünüh hiri tü, “Ma tü awuleh,” ta phrahte mühie veh? Nyiküsü nga jüma küüzazhu münyie, nyi küsü nga noh zhüri küüna münyie luo.

²⁷Hi nüh küütü vünüh jüma Zion vü küzazhum thuoh, thi hi nüh Jerusalem vü azhüwa kümhie tsüthuoh.

²⁸Thitü hi nüh küno vü nyi küsü nga münyie; hamari azhievü zhüphiekütsü münyieluo, thawa, hi nüh küüna vü, kürüle tsüveh lo.

²⁹Halie, mari aveh tü zhünyo mnyie, ma küürohri tü zanyoküsü nyu; ma nüh akülü atsoritü kürütso mürhü wie.