Read Pochuri Naga ISAYA 43 Bible Online

ISAYA 43 - Pochuri Naga bible

ISAYA 43

¹Thitü khinyi VÜWA nüh hakümjie küza veh, ma noh saküüjewa tü, O Jacob, ma tü noh küsazhiwa, O Israel: “Mükrütüm luo, hi nüh noh kürhesathuoh kenüh; hi nüh anyo vünüh noh jithuoh, noh tü eh zhi.

²Noh nüh ajuhri kariküwa vü hi nüh noh sietse wie naveh, thi arükuri kariküwa vü jümari tü noh kümzhiewuowa nyu; noh nüh anyih küütsokükari vü noh tü kütsowa nyu, thi anyihzhu tü noh tsoküürawa nyu.

³Küpakenühnyunü hi tü VÜWA noh Saküüwuowa, Israel kümtsewa, noh küülolewa. Noh huokütsü üta hi nüh Egypt vi noh tsü, noh kenüh Ethiopia thi Seba tü amüzhi vünüh,

⁴küpakenühnyunü noh tü eh notha vü kürhe kenüh, thi küsiakesiakhri, thi hi nüh noh külo kenüh, noh vü kütsü le kenüh hi nüh anyiri vi noh tsü, noh kürhokenüh amüzhi anyiri vi noh tsü.

⁵Mükrütüm luo, küpakenühnyunü hi nüh sie kütse kenüh; hi nüh zhieshu vünüh noh tsatoriwa sieru naveh, thi zhietu vünüh hi nüh noh vizhuh naveh;

⁶hi nüh zhietüwa vü, jam luo, thi zhiesehwa vü, müshohte tümluo; kületsuo vünüh eh tsarisieru luo thi azhih küpote vünüh ehtsavühri sieru luo,

⁷eh nyo vünüh küjiri aveh thuoüji, eh kütholathovü kenüh hi nüh thawa saküje nüh, hi nüh thawa sazhu thi sanüh,” ti küza.

⁸Anyiri, anotha nü peh wie ketünga küüjuri siezhu luo, akhüna nü pe wie ketünga kürüpori siezhu luo!

⁹Akuohji aveh tü sehzhuh nü küüsehrü luo, thi nyiri aveh tü küümhou luo. Mari azhievü thawa nüh hama küzazhu ra na lo, thi atükhu vü zanyori hiri kütsa ra na lo? Mari sakümsho na küsa kenüh mari tü mari povü vi küüru luo, mari tü küüna taji, jüma tü zhütsa ti küsa küüza luo.

¹⁰“Nohri tü eh povüri,” ta VÜWA nüh küza, thi hi nüh rükakümeh sieperi, jüta küsa vünüh nohri tü hi thsü thi tsotüra, thi hi tü ma taküsa thsümshira naveh. Eh tüvü Saküüwuowa küsü nga müsazhu, nyutü eh sevü küsüngaküpehwa nyu.

¹¹Hi, hi tü VÜWA, thi eh nyievü küülolewa küsü nga münyie luo.

¹²Hi nüh küzazhum, külole thi zhüchüthuoh, nohri azhievü nyiaza küpa mükünyievü; thi nohri tü eh povüri, ta VÜWA nüh küza.

¹³“Hi tü Saküüwuowa, thi nosü vünüh tuvü nga hi tü ma wie; nyi küsü nga eh ke vünüh vizhu teküwara münyie luo, hi nüh küroh veh thi jüma tü thawa nüh khetera na lo?”

¹⁴VÜWA, nohri kürhehsawa, Israel kümtsewa nüh: “Nohri rieh nüh hi nüh Babilon vü wuori küze nü arüpe aveh küüzochiem naveh, thi Khaldeo ri jikhi küsa tü kürümuo sam naveh.

¹⁵Hi tü VÜWA, nohri kümtsewa, Israel Saküüjewa, nohri kajiwa,” nüh hakümjie küza.

¹⁶VÜWA nüh hakümjie küza veh, thawa nüh ajuhküji vü aleh sa lo, akükhra juhri vü lekhuji sa lo,

¹⁷thawa nüh rawouhkheka thi rawouh, thopahiri thi arieküsari vizhu lo; mari tü küluzehtewathuoh, mari tü müsüra rathuoh, mari tü alati küsü kümjie zoküne thi pekünemthuoh:

¹⁸Atükhu vü zanyori mümsheke tümluo, nyutü kürüwi zanyori mümsheno tümluo.

¹⁹Halie, hi tü zanyo kürüthe sa veh; khinyi jüma tü kazhutse vehthuoh, noh tü jüma müngu ülo? Hi nüh areza vü aleh küsü thi küpohu vü arühkuri satsü naveh.

²⁰Asasüri tü hi siakesiakhri naveh, rezanyihnyihri thi amwari nüh; küpakenühnyunü reza vü hi nüh ajuh tsü veh, thi küpohu vü arühke tsü veh, hi nüh kürüka nyiri vü aküzhu tsü na küsa kenüh,

²¹hi nüh hi mpa eh kenüh nyiri küsazhu tü, eh küsiake küzazhu na küsa kenüh.

²²Tü noh tü hi küji müsanü, O Jacob; thitü noh tü hi vü münotewa nüh, Israel!

²³Noh tü akütso kütsü kenüh hi vü noh nyihzhü vimru, nyutü noh küsahthuori vi hi müsiakesiekhri. Hi tü kükhurüri vi nü noh khuosamküüzho, nyutü kürhengu vi noh samküümno.

²⁴Noh tü eh kenüh ame vi amüshe sü hi mütsü, nyutü noh küsahthuoh küthüri vi eh losam küra. Thitü noh kükhiemuori vi eh khuosaküüzho wie, noh tü noh künakhieri vi hi sakümnomthuoh.

²⁵Hi, hi tü ma thuoh hi müpa eh rieh nüh noh küvürieri khezhuküjawa, thi hi tü noh kükhiemuori kümshekewa nyuthuoh.

²⁶Hi tü kümsheke vü vithse luo, hiri kürü rüluo ünüh; noh zhüke vizhu luo, noh tü kato veh ta kütoh na küsa kenüh.

²⁷Noh pa apowa tü khiemuom, thi noh leküsari tü hi vü küvürie samthuoh.

²⁸Jükenüh hi nüh kümtsezhehwa kajitsari sakümnemthuoh, hi nüh Jacob tü zorie kümkhie vü vizhumthuoh thi Israel tü phoküüraluo vü thsemthuoh.