Read Pochuri Naga ISAYA 45 Bible Online

ISAYA 45 - Pochuri Naga bible

ISAYA 45

¹VÜWA nüh ma nüh thsekümwa Sairas vü hakümjie küza, ma ke azhie wuovü hi nüh küjem thuoh, ma tüvü akuoküjiri küchara nti thi kajira küshih kütseke lejatsü, akheriri tü mükhe nüh sana küsa kenüh ma tüvü amükhieri sa nta.

²Hi nüh noh tüvü wa nü aküzhiri sakütom naveh, hi nüh asawuo mükhieri zokhuo kümjehmriem naveh, thi amürürüperi tethuoriem naveh,

³hi nüh aküzo künyirhieri vi noh tsü naveh, thi küüzhe azhievü küthi saküvehri, jüta küsa vünüh noh nüh jüma tü hi, VÜWA, Israel Saküüwuowa noh nyo vünüh noh küjiwa ta küsa thsü naveh.

⁴Eh siepewa Jacob rieh nüh, thi hi nüh kürüka Israel rieh nüh, hi nüh noh nyo vünüh noh ji veh, hi nüh noh nyo thotsü, noh nüh hi müthsü wie ketünga.

⁵Hi tü VÜWA, thi küpa münyie luo, eh nyievü Saküüwuowa küpa münyie luo; noh nü hi müthsü wie ketünga hi nüh noh tseke tü,

⁶rünyi küshu vünüh thi zhietu vünüh eh nyievü küpa münyie taküsa nyiri nüh thsü naveh; hi tü VÜWA, thi küpa münyie luo.

⁷Hi nüh aküwie sazhu thi aküzo saküje, hi nüh kümhie sa thi kümsü saküjetsü, hi tü VÜWA, zanyo hamari aveh küsawa.

⁸Atsorhü, O atülüri arügi vünüh, thi thajüwuri tü künyitsarüküüturu luo; azhih tü küüsaphie luo, külole tü küüsho zhu luo, thi jüma tü künyitsa nga saküüshi luo; hi VÜWA nüh jüma saküjetsü.

⁹“Thawa nüh ma küsawa sie kürükhrüluo veh ünüh kümhiera kütsüna, azhih küfü küsü thi küfüküsawa masü! Anyisa tü ma küsawa vü, ‘Noh tü mowa sa veh lo,’ ta küza veh ülo? nyutü ‘Noh küüroh tü küvipe müpe ülo,’ ta küza veh ülo.”

¹⁰Thawa nüh apa küsü vü, noh tü mowa wuotsü lo? ta küza veh ünüh küsara kütsüna, nyutü krevüh küsü vü, noh tü mowa vünüh atsanaveh lo? ta künaveh ünüh.

¹¹VÜWA, Israel kümtsewa, thi ma küsawa nüh hakümjie küza veh: “Noh tü eh tsari kenüh küüna sa nti ülo, nyutü eh kesie kenüh azhütsü nyi lo?

¹²Hi nüh azhih sa, thi jüma rügivü anyiri saküjeke; atülüri shoküüta tü eh kenüh, thi hi nüh ma shieji aveh vü azhütsü.

¹³Künyitsa vünüh hi nüh ma saküüjosüra, thi hi nüh ma lehkhuji aveh sa kümsho naveh; ma nüh eh nyuji sanaveh, thi eh nyiri reteküsari küshu naveh, ame nyutü jisuo nyu,” ta VÜWA nüh küza.

¹⁴VÜWA nüh hakümjie küza veh: “Egyptra künyirhie thi Ethiopiara asü sietsokrü, thi akrukümsie nyi Sabeanri, noh vü ru nü noh zhi sanaveh, mari tü noh se müze naveh; mari tü kievehke taji shuhru noh vü küngie tsuo naveh. Mari tü noh vü zhiekekhuo taji: Saküüwuowa tü noh vü müpa pehveh, thi küpa münyie luo, Saküüwuowa küsü nga eh nyievü münyie luo; ta küza.”

¹⁵Zhütsa, noh tü küthi nü küpeh Saküüwuowa, O Israel Saküüwuowa küülolewa.

¹⁶Mari aveh tü küzükrü vü thsemthuoh thi rüzarüpuomthuoh, anyuo küsari tü kürü kürüza vü tewathuoh.

¹⁷Thitü Israel thuoüji VÜWA nüh küsuokürho küülolerawa vi nü külolemthuoh; noh tü küsuokürho aveh vü küzükrüi vü küthsewa nyu, nyutü kürü arüpuowa nyu,

¹⁸küpakenühnyunü VÜWA nüh hakümjie küza veh, thawa nüh atülü saküje lo (ma tü Saküüwuowa!) thawa nüh azhih sa thi jüma sa lo (ma nüh jüma sazhu; ma nüh jüma tü kürüza vü nüh müsa, ma nüh jüma tü akürho kenüh satsü!) Hi tü VÜWA, thi küpa münyie luo.

¹⁹Hi tü küüzhe vünüh müphrahte, aküzo azhih küsü vü; hi nüh Jacob tsatoriwa vü müküza, ‘Hi phah luo.’ Hi VÜWA thuoüji küzhütsa phrahte, mowa nü kato veh ünüh hi nüh küzazhu.

²⁰Nohri mpa sehzhuh nü raluo, kürü nü shenyi raluo, nohri akuoküji rhoküvehri! Athsoh anguo khakütseri tü, mari zanyoküthsü münyie luo, thi müküülolera nyiaza[4] küsü vü khuopehpheti.

²¹Küzazhu luo, thi noh zhühke viru luo; mari tü kürüküzhüphie luo! Khanavü teküwa hama thawa nüh küza lo? Thawa nüh khanavü azhü jüma küzazhu lo? Jümatü hi VÜWA nüh nyu ülo? Thi eh nyievü nyiaza küpa münyieluo, künyitsa Saküüwuowa; eh nyiehvü küpa küsü nga münyie luo.

²²Hi vü sühle luo thi külole luo, azhih küpote aveh! küpakenühnyunü hi tü Saküüwuowa, thi küpa küsü nga münyie luo.

²³Hi nüh hi mpa nüh küshiemthuoh, künyitsa vünüh azhü müküshelera küsü eh po vünüh shutewathuoh. ‘Hi vü khotsü kheh naveh, amizhi aveh tü küshie naveh.’

²⁴Jümatü eh zhüku küza naveh, VÜWA vü müpa nüh künyitsa thi akükhra küpeh wie; ma vü ru taji zükrü naveh, ma vü khielota arüsaküüshuri aveh.

²⁵Israel tsatori aveh VÜWA vünüh khraraküm thi kütholathovü sanaveh.