Read Pochuri Naga ISAYA 46 Bible Online

ISAYA 46 - Pochuri Naga bible

ISAYA 46

¹Bel tü küngie tsuo, Nebo tü kükie wa, mari anguori tü asa thi aseshuri vü pehveh; nohri nüh küvü hamari tü asa küthasüra akhuo satsü nü küüzho.

²Mari tü kükietsuo, mari tü kürü küngietsuo, mari tü akhuoküüzhowa mükülolera, thitü mari mpa nüh aküsiküsa vü tewa.

³Hi vü kümrheke luo, O Jacob zhehlori, Israel zhehlo kümtori aveh, aküwuo vünüh hi nüh küruotekütseri avo lovü nüh vü teküruri;

⁴nohri kükhruo küze küju nga hi tü Ma Wie, thi alüküpru küju nga hi nüh nohri vü tse wie naveh, hi nüh satsü, hi nüh vü tse wie naveh; hi nüh vü tse wie naveh thi külole naveh.

⁵Noh tü hi thawa kümjieta sana lo thi thawa sie küzarike na lo, thi vikümjie na lo, jütisanü küthse luo na lo?

⁶Rakaku vünüh suna vükütseri thi küütoku vünüh rakasa kütekütseri, suna küsari küsü müsanü ma nüh jüma vi nyiaza küsü sa; jütisanü mari tü küngie-tsuo nü khurü!

⁷Mari nüh jüma vi mari safü rügivü khakükeke, mari nüh jümakha, mari nüh jüma vi ma pevü sa, thi jüma tü jüla küütoke; jüma tü ma pe vünüh müküngahra nüh sa. Mükütüküzü wuori nüh jüma vü zie wie ketünga mürülenyutü ma küsüro vünüh ma mükülole.

⁸Hama müsheke nü müshe nonoluo, amüshe vü jüma jile luo, nohri küvürieri,

⁹khana tükhu vü zanyori müsheke luo; küpakenühnyunü hi tü Saküüwuowa, thi küpa münyie luo; hi tü Saküüwuowa, thi hi kümjie küpa münyie luo,

¹⁰küsate vünüh asehkhewa zhüke küzazhu, thi zanyori müjie küsa vünüh atükhu vünüh küzazhu taji, ‘Eh küzhüphiezhü tü tsie wie naveh, thi eh ehkümshe aveh hi nüh sajunaveh,’ ta küza,

¹¹zhieshu vünüh rekütsa müwa küsü ji, kületsuo vünüh eh küzhüphie nyi küsü ji. Hi nüh phrahtemthuoh, tinü hi nüh jüma tü saküjuwie naveh; hi nüh mshe mthuoh, tinü hi nüh jüma sa wie naveh.

¹²“Hi vü kümrheke luo, noh aluoveh müküzikewa, küvizhu vünüh noh letsuokümwa:

¹³Hi nüh eh küvizhuwa vi shenyi ru, jüma tü mületsuo sheh, thi ehküülolerawa tü küüzhikewa nyu; hi nüh Zion vü küülolera sa naveh, Israel kenüh ehkütholathovü,” ti küza.