Read Pochuri Naga ISAYA 5 Bible Online

ISAYA 5 - Pochuri Naga bible

ISAYA 5

¹Eh küümzewa kenüh ma rhelivizhuh vü kenüh küümze zah raküüsaluo: Eh küümzewa tü küzhiho azhikhu küsü vü rhelivizhuh küsü pehveh.

²Ma nüh jüma chüh nü alohri sakümtsem thi rhelivi kürükatsari vi nü shie; ma nüh jüma zhila vü azie küsü jüke, jütisanüh jüma lovü akhah ate küsü za; thi ma tü rhelivi küpe nopeh, thitü jüma tü ato rhelivi petsü.

³Thi khinyi, O Jerusalem nü rhoküpeh thi Judah nyiri, künaluo, hi nüh noh vü khuo veh, hi thi eh rhelivizhuh azhiehvü.

⁴Eh rhelivizhuh kenüh mowa küsa pehü veh lo, hi nüh jüma lovü samküsa? Hi nüh jüma tü rhelivi küpe nopehküveh vü, mokenüh ato rhelivi pe lo?

⁵Thi hi nüh khinyi küza naveh, eh rhelivizhuh vü hi nüh mowa sanaveh ünüh. Hi nüh ma juosü kürüpe vijam naveh, jütisanü jüma tü küüzoriem naveh; Hi nüh ma zie zophuohm naveh, thi jüma tü nyiriem tü naveh.

⁶Hi nüh jüma tü jaküm küsü samtü naveh; jüma tü zahshe nyutü kütüthsewa nyuthuoh, thi atükrü thi arüzhüri nüh shophohm naveh; Hi nüh akülu vü nga atsokürü jüma rügi vü mükürüke azhütsüm naveh,

⁷küpakenühnyunü VÜWA rhelivizhuh tü Israel zhehlo küsakenüh, thi Judah nyiri tü ma nüh loküm aküshie küsa kenüh; thi ma nüh kümshowa no, thitü halie, azü küüthü müpa; künyitsa kenüh, thitü halie, akükrie küsü wie!

⁸Azheh vü samshukeküwawa vü kümhiera kütsüna azhuh küzhi küzhia kümkawa, küshothuo mükünyie küju, thi noh tü azhih jüla no mpa azhie vü küürho nta samtüthuoh.

⁹A VÜWA nüh hi nüh küünara vünüh küshiemthuoh: “Azheh hozake wie nga küüzoküzajam na thuoh, azheh küji thi aküzüri, mürho nüh.

¹⁰Rhelivizhuh azhuza türake vü avi pewie ketünga alokhe küsü mpa vi naveh, thi atha amlo küsü zhuwie ketünga müza küsü müpa vi naveh,” ta küshie.

¹¹Rüne kümto küsüra wa amngu kümsewa, mari tü kümzo küzhu vü tewa üsü nüh, arüza kümnü ko küwari nga akhah nüh mari mküzhuthe küju!

¹²Mari tü topito thi aza kükhuvüri viveh, mari akhuri vü akruokruo thi pilechu thi akhah peh thitü mari tü VÜWA nüh küsari thuoüji müchieke, nyutü ma ke nüh küürohri müngu.

¹³Jükenüh eh nyiri tü leküsou vü zheja mümüti zanyoküthsü kümngu kenüh; ma küchiekürhe nyiri tü avorüma vehthuoh, thi ma khururi tü ajuhküürieh nüh küwethemthuoh.

¹⁴Jükenüh küsürazhie tü ma vokürüma saküjimthuoh thi ma po tü müküütera kamzhamthuoh, thi Jerusalem vü zanyoküthsüri thi ma sierhüri tü tetsuo veh, masekünyiri, thi ma vünüh küsari nga.

¹⁵Anyiwa tü küngietsuo veh thi nyiri tü vikütsuomümti, thi kürhiezara notha tü sakürünyietewa veh.

¹⁶Thitü VÜWA thuoüji kümsho vünüh sakümsie veh, thi kümtse Saküüwuowa tü ma mpa nüh künyitsa vünüh kümtse kütsa veh.

¹⁷Jütiküsa vü nyihzhüzahri tü mari mpa mari ashiekürhuope vünüh mürhuo naveh, küülieri thi nyihnyihtsari tü küzorieri aza vünüh avosa naveh.

¹⁸Küzhüja kuliri vünüh kümkhie küvizhuri vü kümhiera kütsüna, küshovüh akuliri kümjie kükhiemuo küvizhuri vü,

¹⁹Mari nüh mari vü, “Ma tü küüpretsaprelo luo, hiri nüh no na küsa kenüh ma küüroh tü küüpreluo; Israel kümtsewa zhünyo tü küüshenyi raluo, thi jüma tü küüru luo, hiri nüh jüma tü thsü na küsa kenüh?” ta küza.

²⁰Thari nüh kümsü tü kümhie ta ji thi kümhie tü kümsü ta ji veh ünüh kümhiera kütsüna, thari nüh aküzo tü aküwie vü thse thi aküwie tü aküzo vü thse veh ünüh thari nüh kümnge kenüh akükha thse thi akükha kenüh kümnge thse veh ünüh kümhiera kütsüna!

²¹Thari nüh mari mpa ma nothari vü aküthsüri ta satse veh ünüh, thi mari mpa ma nothari küngu vü küthsüri ta msheveh ünüh, kümhiera kütsüna,

²²Akhah küzhu khrari thi kümzo khah wurü nü aluovehze tse küvehri, kümhie küsara kütsüna

²³thari nüh athe kenüh müküleh küsa vünvüh küthitewaveh nüh, thi mükükhieri ma jisouri khetetü veh nüh, kümhie küsara kütsüna!

²⁴Jükenüh anyih mizhi nüh müthakuo küzorie üta, thi apra küsü nüh anyihzhu lovü küzhike tekütu üta, jükümjie mari rüzoh tü miküm üta, thi mari küwu tü azhitho kümjie rügivü krüketewa; küpakenühnyunü mari nüh VÜWA khonyo kuleküm kenüh, thi Israel kümtsewa zhü maküm kenüh.

²⁵Jükenüh VÜWA rüküshu tü ma nyiri vijuzhuteru, thi ma ke mari vü thsuozhuru taji mari fe küzehkhehm, thi aküzhüri tü küshüh; thi mari kümo tü lekhujiri zhila vü jaküm üta sa. Hamari kenüh ma rüküshu tü sühletemwa thi ma ke tü küchuo peh huo wie.

²⁶Ma nüh athsoshi küsü akuoküji külutsuo küsü vü khake naveh, thi jüma kenüh azhih küpote vünüh müsi naveh, thi halie, mari tü küzeküzuo thi kürhüküleke nü ru!

²⁷Nyi küsü nga mümno, nyi küsü nga ajihmümshü, nyi küsü nga müküzheküngu nyutü müzeh, aküshihkütseke küsü nga mükükru, ajiküthsevüh ali küsü nga mütuo;

²⁸mari shüchu tü tsü, mari lawih tü he khe, mari rawuh tü wuori tü fürülo kümjie, thi mari khekajih tü nyiazamrhü kümjie.

²⁹Mari khikükhu tü amiewuo khi kümjie, amiewuo tsari kümjie mari tü khu; mari tü khikhu nü retsa, jüma tü mari nüh vü tewa, thi nyi küsü nga nüh müküloletsü ra nüh sa.

³⁰Jüma rülovü mari tü jüma nyieh vü küprinaveh, juhküji khi kükhu kümjie. Thi mükütüküzü nyi küsü nüh azhih wa vü noküze thuoüji, halie, aküzo thi amüsheküna; thi ma kühe nüh aküwiewa tü saküzo