Read Pochuri Naga ISAYA 50 Bible Online

ISAYA 50 - Pochuri Naga bible

ISAYA 50

¹VÜWA nüh hakümjie küza veh: “Noh zah sie küürüsuo lasikürhü khiela pehveh lo, mowa vi nü hi nüh ma zhejam lo? Nyutü eh shewiküvü khiema wa vü hi nüh noh zhumlo? Halie, noh künakhie kenüh noh tü zhuküzemthuoh, thi noh küphrürie kenüh noh zah tü zhejam.

²Moken lo, hi nüh jüla küru vü mokenüh nyi küsü nga münyie samlo? Hi nüh küji vü mokenüh nyi küsü nga hi kürüle münyie nüh samlo? Eh ke tü mülum ülo. Jütisanü mürheksa ra nüh sam ülo? Halie, hi nüh küshüke vünüh hi nüh juhküji sakümngem, hi nüh arükuri tü küpohu samtü; jümara nga tü ajuh mükütü kenüh primne thi ajuh kürieh nü süm.

³Hi nüh a künyi vi atülüri küümphie, thi anyirü vi mari küüzhu zhute,” ti küza.

⁴VÜWA Saküüwuowa nüh sosiekümra mizhi vi hi tsümthuoh, jütaküsa vünüh hi tü azhü küsü mapa wie nga vi nü küthasüri sakürhora hi tü thsü na küsa kenüh. Rünerüne ma nüh müchü, Sosie kümri üta hi tü müchüchüti.

⁵VÜWA Saküüwuowa nüh eh khüna saphie mtü thuoh, thi hi tü azhü müküüna müsa, asevü sühle tem wa.

⁶Hi nüh eh seru küprükenü hi küferi tsü, thi eh nakie vi eh khüne küshori tsü hi tü kükrü vünüh thi mütse kümshüke vünüh eh nyieh vü müküthi,

⁷küpakenühnyunü VÜWA Saküüwuowa nüh hi kükrakrati; jükenüh hi tü kürüza rüpuo müsa; hi tü eh nyieh tü aweloh kümjie sakemthuoh, thi hi tü küzükrü vü küthiwa nyu ta küsa hi nü thsü veh;

⁸ eh kümsho wa tü shenyi vehthuoh, thawa nüh hi sie kürükhrüluo na lo? Hi sie küwuluo wa tü thawa lo? Ma tü hi vü küüshenyi ruluo.

⁹Halie, VÜWA Saküüwuowa nüh hi kükra veh; thawa nüh hi tü nakhie ta küza zhu nalo? Halie, mari aveh nga thsünya wa kümjie sepham naveh; mütharü nüh jümari tsam naveh.

¹⁰Nohri azhievü tha wa nü VÜWA krü thi ma siepewa jikhi künaveh lo, thawa nüh aküzo vü tse taji aküwie münyie lo, tü VÜWA nyo vü aleh no thi ma Saküüwuowa vü rüngake veh lo?

¹¹Halie, anyih kütsokeri aveh thuoüji, thawa nüh anyih vi athsoshi vü tso veh ünüh! Noh nyih vünüh aküwie sanü tse veh ünüh, thi athsoshi khiewa vü noh nüh tsoke thuoh ünüh! Noh tü hama eh ke vünüh vike naveh: noh tü saküümnomna vü nüh zeh tsuo naveh.